كورەرمەندەر كوڭىلىنەن شىعۋعا ءار تەاتر ۇجىمى تالپىنادى, قىزىقتى جۇمىستار توقتامايدى. ءى.وماروۆ اتىنداعى قازاق دراما تەاترىنىڭ اداعى جوسپارى اۋقىمدى. بيىل مامىر ايىندا تەاتر قازاقستاننىڭ وزبەكستانداعى كۇندەرىنە وراي وزبەك كورەرمەندەرى الدىندا ونەر كورسەتۋگە شاقىرىلدى. بۇل تەاتر ۇجىمى ءۇشىن زور مارتەبە. سونىمەن قاتار شىلدەدە تەاتر موڭعوليانىڭ بايان-ولگەي ايماعىنا گاسترولگە بارادى. سونداعى قانداستارىمىزعا ءوز رەپەرتۋارىنان بىرنەشە سپەكتاكل ۇسىناتىن بولادى.
ءتول مەرەكەسىنە وراي وتكەن سالتاناتتى جيىندا وبلىستىق مادەنيەت باسقارماسىنىڭ باستىعى ەرلان قالماقوۆ وبلىس اكىمى ارحيمەد مۇحامبەتوۆتىڭ اتىنان ارتىستەردى حالىقارالىق تەاتر كۇنى مەرەكەسىمەن قۇتتىقتادى.
«قوستاناي ءوڭىرى قازاق دراما تەاترىنىڭ نەگىزىن سالعان سەركە قوجامقۇلوۆ, ەلۋباي ومىرزاقوۆ, قاپان بادىروۆ سەكىلدى ءىرى تۇلعالاردى بەردى. ەل تاۋەلسىزدىگىنىڭ ارقاسىندا كوپ جىلعى ۇزىلىستەن كەيىن قوستانايدا دا قازاق دراما تەاترى اشىلدى. وبلىستاعى ورىس دراما جانە قۋىرشاق تەاترلارى كوپتەگەن جەتىستىكتەرگە جەتىپ, كورەرمەندەرىن قۋانتىپ كەلەدى. ارقالىقتا ىرگەتاسىن ونەر جاناشىرى وزبەكالى جانىبەكوۆ قالاعان قازاق دراما تەاترى دا كورەرمەنىمەن بىرگە جاساۋدا. وسى ونەر وتاۋلارىنىڭ بارلىعىندا كۇندەلىكتى قايناعان جۇمىستى كورەمىز. ولار حالقىمىزدىڭ رۋحاني سۇرانىسىن قامتاماسىز ەتەدى, ۇلتتىق داستۇرلەرىمىزدىڭ قارا شاڭىراعىنا اينالعان» دەدى ەرلان بولات ۇلى.
مۇنان كەيىن ول تەاترلار ارتىستەرىنە وبلىس اكىمىنىڭ ماقتاۋ گراموتالارىن تاپسىردى. مەرەكە كۇنى ارتىستەر ءوزىنىڭ قۋانىشىن بولىسۋگە كەلگەن كورەرمەندەرگە اننەن شاشۋ شاشتى, سپەكتاكلدەردەن ۇزىندىلەر ۇسىندى.
ءنازيرا جارىمبەت,
«ەگەمەن قازاقستان»
قوستاناي
