بۇل كۇن – رۋحاني ىزگى قاسيەتتەردى, ۇلتتىق قۇندىلىقتاردى ۇلىقتاپ تەاتر توڭىرەگىندە ەڭبەك ەتىپ جۇرگەن شىعارماشىلىق شابىتتى جاندار ءۇشىن ەرەكشە كۇن. سەبەبى قازاق تەاترى دا الەم تەاترلارىنىڭ بولىنبەس بولشەگى. قازاقستانداعى 40-قا جۋىق تەاتردىڭ باسىن بىرىكتىرىپ 2016 جىلى قۇرىلعان قازاقستان تەاترلارى اسسوتسياتسياسى بۇگىنگى ساحنا ونەرىندەگى وزەكتى ماسەلەلەردىڭ شەشىمىن تابۋعا اتسالىسىپ, تەاترلار اراسىندا بايلانىس ورناتىپ وتىرعان بىرەگەي بىرلەستىك. شەتەل تەاتر ۇيىمدارىمەن كورپوراتيۆتىك بايلانىستاردى نىعايتا ءتۇسۋ, تەاتر قىزمەتىنىڭ كوركەمدىك-ەستەتيكالىق, زياتكەرلىك الەۋەتى مەن مۇمكىندىكتەرىن ارتتىرۋ, جاستاردىڭ كاسىبي شىڭدالۋىنا مۇمكىندىكتەر جاساۋ, تەاترلار ۇجىمىنداعى شىعارماشىلىق ىزدەنىس مونيتورينگىن قالىپتاستىرۋ, جاڭا ەسىمدەردى انىقتاۋ, جاستاردىڭ اعا تولقىن وكىلدەرىنەن تاجىريبە الۋىن, كاسىبي باعدارلارىن ايقىنداۋىن ءبىر ىزگە ءتۇسىرۋ, تەاتر قايراتكەرلەرىن ەسكە الۋ كەشتەرى مەن مەرەيتويلارىن بىرلەسە وتكىزۋ, حالىقارالىق فەستيۆالدەر, الەمدىك دەڭگەيدەگى شەبەرلىك ساباقتارى مەن كونفەرەنتسيالار ۇيىمداستىرۋ, الەمدىك تەاتر ونەرىندەگى باعىت-باعدارمەن تانىسىپ, كاسىبي ساۋاتتىلىققا قول جەتكىزۋ – وسىنىڭ ءبارى بۇگىنگى قازاقستان تەاترلارى اسسوتسياتسياسىنىڭ اتقارىپ وتىرعان قىزمەتىنىڭ نەگىزگى قىرى.
اسسوتسياتسيانىڭ ۇيىمداستىرۋىمەن وتكەن مەرەكەلىك كەشكە الماتى قالاسىندا ورنالاسقان م.اۋەزوۆ اتىنداعى قازاق مەملەكەتتىك اكادەميالىق دراما تەاترى, ع.مۇسىرەپوۆ اتىنداعى قازاق مەملەكەتتىك اكادەميالىق جاسوسپىرىمدەر مەن بالالار تەاترى, اباي اتىنداعى مەملەكەتتىك اكادەميالىق وپەرا جانە بالەت تەاترى, م.لەرمونتوۆ اتىنداعى ورىس مەملەكەتتىك اكادەميالىق دراما تەاترى, ن.ساتس اتىنداعى ورىس مەملەكەتتىك جاسوسپىرىمدەر مەن بالالار تەاترى, مەملەكەتتىك رەسپۋبليكالىق اكادەميالىق نەمىس دراما تەاترى, ق.قوجامياروۆ اتىنداعى مەملەكەتتىك اكادەميالىق ۇيعىر مۋزىكالىق دراما تەاترى, مەملەكەتتىك كورەي مۋزىكالىق كومەديا تەاترى, الماتى مەملەكەتتىك قۋىرشاق تەاترى, «استانا» ميۋزيكل مەملەكەتتىك تەاترى, ءاسانالى ءاشىموۆ اتىنداعى «الماتى اۋەندەرىنە» قاراستى «جاڭا عاسىر» تەاترىنىڭ ارتىستەرى قاتىسىپ, ساحنادا ءار تەاتر ءوز تالانتتارىنىڭ ونەرىمەن تانىستىردى. تەاترلار العاش رەت مازمۇنى تەرەڭ سپەكتاكلدەرىنەن ۇزىندىلەر كورسەتىپ, رەپەرتۋار جاڭالىقتارىمەن ءبولىستى. بيىلعى جاستار جىلىنا وراي اتالعان تەاتر ساحنالارىندا ونەر كورسەتىپ جۇرگەن 40-تان استام جاس بۋىن ءارتىس اسسوتسياتسيانىڭ العىس حاتىمەن ماراپاتتالدى. «اكتەر – شابىتتىڭ ادامى. ول ونەرىن تاماشالاۋعا كەلگەن كورەرمەنىنە ءاردايىم قۋانىش سىيلاۋعا دايىن تۇرادى. تالعامدى قالىپتاستىراتىن, جاڭالىقپەن تانىستىراتىن, كوپشىلىكتى العا قاراي سۇيرەيتىن وسى ماماندىقتىڭ وكىلدەرى. ءوز ومىرىمەن قوسا, ساحنالىق ءومىرىن دە بىرگە الىپ جۇرەتىن, سول سەبەپتى اتى مەن ابىرويى ۇزاق جاسايتىن ادام, ول – اكتەر. ول قاي كەزەڭدە دە كەرەكتى ماماندىقتىڭ, ۇلى ماماندىقتىڭ ساپىندا بولعان ساناتىنان ەشقاشان تومەندەمەك ەمەس», دەدى قازاقستان تەاترلارى اسسوتسياتسياسىنىڭ توراعاسى, كسرو حالىق ءارتىسى, ەڭبەك ەرى ءاسانالى ءاشىموۆ ءوز قۇتتىقتاۋىندا. ول, سونداي-اق, ەلباسىمەن كەزدەسكىسى كەلەتىنىن, كەزدەسۋ بارىسىندا ىلگەرىرەكتە ساحناعا ەڭبەگى سىڭگەن ونەر ادامدارى ءۇشىن بەرىلگەن «حالىق ءارتىسى» اتاعىن قايتارۋ تۋرالى ۇسىنىس جاسايتىنىن ايتتى. توراعانىڭ بۇل ۇسىنىسىنا تەاترعا جيىلعان ارىپتەستەرى قىزۋ قولداۋ ءبىلدىردى.
ت.جۇرگەنوۆ اتىنداعى ۇلتتىق ونەر اكادەمياسىنىڭ رەكتورى اسحات ماەميروۆ مادەنيەت جانە سپورت ءمينيسترى ا.مۇحامەدي ۇلىنىڭ قۇتتىقتاۋ حاتىن وقىپ بەرىپ, يۋنەسكو جانىنداعى حالىقارالىق مادەني بايلانىستار ۇيىمى حاتشىسىنىڭ قازاقستاننىڭ تەاتر الەمىنە قۇتتىقتاۋ جولداعانىن جەتكىزدى. ۇلتتىق ساحنا ونەرىنىڭ ماقتانىشتارى ەسمۇحان وباەۆ, مەرۋەرت وتەكەشوۆا جانە تىلەكتەس مەيراموۆ وپەرا جانە بالەت تەاترىنىڭ ساحناسىندا اتىراۋ قالاسى اكىمدىگىنىڭ قولداۋىمەن جارىققا شىققان ا.ءاشىموۆتىڭ ءۇش تومدىق تاڭدامالى جيناعىنىڭ تۇساۋىن كەستى. مەرەكەلىك كەش ساحنا شەبەرلەرىنىڭ كونتسەرتىمەن جالعاسىن تاپتى.
ايگۇل احانبايقىزى,
«Egemen Qazaqstan»
الماتى
