ۋ.موزەر ءار جىلدارى اقش مەملەكەتتىك حاتشىسىنىڭ ورىنباسارى قىزمەتىن اتقارعان, سونىمەن بىرگە امەريكانىڭ ۋكراينا, قازاقستان, مىسىر, سۋرينام جانە ماليدەگى ەلشىلىكتەرىندە جۇمىس ىستەگەن, اقش-تىڭ مولدوۆاداعى ەلشىسى لاۋازىمىندا بولعان.
تمد كەڭىستىگىندەگى قىزمەتتەرى اسەر ەتكەن بولار, ۋيليام موزەر ورىس ءتىلىن مەڭگەرگەن ەكەن.
قازاقستان پرەزيدەنتىنە سەنىم گراموتاسىن تاپسىرۋ سالتاناتىنان كەيىن جۋرناليستەر الدىنا شىققان ەلشى وسىدان 20 شاقتى جىل بۇرىن الماتىداعى ەلشىلىكتە جۇمىس ىستەگەندىگىن جانە قازاقستانعا اسقان ىقىلاسپەن ورالعاندىعىن, سونىمەن بىرگە قازاقستان پرەزيدەنتى قاسىم-جومارت توقاەۆقا سەنىم گراموتاسىن تاپسىرۋ وزىنە زور مارتەبە ەكەندىگىن اتاپ ءوتتى.
– مەنىڭ قازاقستانعا العاش كەلگەن جانە سوڭعى بولعان ۋاقىتىمنىڭ ارالىعىندا قازاقستان زور تابىستارعا قول جەتكىزگەندىگىن اتاپ وتكىم كەلەدى, – دەگەن ۋ.موزەر ەلوردانىڭ بىرەگەيلىگى مەن زاماناۋي ارحيتەكتۋرالىق قۇرىلىمىنا ءتانتى بولعاندىعىن جاسىرمادى.
– قازاقستاننىڭ وتكەن وركەندەۋ جىلدارى مەنى قاتتى تاڭعالدىردى. وسى ۋاقىتتا حالىقتىڭ جاعدايى جاقسارىپ, ءال-اۋقاتى ارتا تۇسكەن. ءبىز قازاقستانمەن اراداعى كەڭ ستراتەگيالىق ارىپتەستىكتى جوعارى باعالايمىز, – دەدى اقش ەلشىسى.
سونىمەن قاتار قازاقستاننىڭ تۇڭعىش پرەزيدەنتىنىڭ مەملەكەتتەر اراسىنداعى بايلانىستى نىعايتۋداعى جەتىستىكتەرىنە ەرەكشە توقتالدى.
– ءبىز نۇرسۇلتان نازارباەۆتىڭ ستراتەگياسىن, يادرولىق قارۋدى تاراتپاۋ بويىنشا قازاقستاندى جاھاندىق كوشباسشى قىلۋداعى ەڭبەگىن جوعارى باعالايمىز. بۇل مىندەتتەمەلەر ءبىزدىڭ ارىپتەستىگىمىزدىڭ نەگىزى بولىپ قالا بەرەدى. ءبىز, سونىمەن قاتار قازاقستاننىڭ امەريكالىق كومپانيالار تاراپىنان كەلەتىن كوممەرتسيالىق ينۆەستيتسيالارعا اشىقتىعىن اتاپ وتكىمىز كەلەدى, – دەدى اقش ەلشىسى.
ديپلومات ءوز سوزىندە قازاقستاننىڭ تەك ورتالىق ازيا عانا ەمەس, سونىمەن بىرگە حالىقارالىق ارەنادا كوشباسشى مەملەكەتكە اينالعاندىعىن اتاپ ءوتتى. ونىڭ ىشىندە ەلىمىزدىڭ كوپتەگەن حالىقارالىق پروتسەستەردەگى, بۇۇ قاۋىپسىزدىك كەڭەسىندەگى بەلسەندىلىگى, بارلىق جاھاندىق كيكىلجىڭدەردىڭ بەيبىت شەشىلۋىنىڭ جاقتاۋشىسى رەتىندەگى ءرولىن جوعارى باعالايتىنىن ايتتى.
اقش ەلشىسى ءسوزىنىڭ سوڭىندا: «قازاقستاننىڭ تۇڭعىش پرەزيدەنتى نۇرسۇلتان نازارباەۆقا بىرنەشە ونداعان جىل دانالىقپەن ەلگە باسشىلىق جاساعانى ءۇشىن قۇرمەتىم مەن ريزاشىلىعىمدى بىلدىرگىم كەلەدى. ول ەڭ قيىن كەزەڭدەردىڭ وزىندە قازاقستاندى تاۋەلسىزدىككە, ەگەمەندىككە, گۇلدەنۋگە باستادى. قۇرمەتتى پرەزيدەنت قاسىم-جومارت توقاەۆپەن بىرلەسكەن جۇمىسىمىز جەمىستى بولارىنا سەنىم ارتامىن», دەپ اعىنان جارىلدى.
* * *
سونداي-اق مەملەكەت باسشىسى قاسىم-جومارت توقاەۆ قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان سياومەن كەزدەستى.
كەزدەسۋ بارىسىندا قاسىم-جومارت توقاەۆ قازاقستان مەن قىتاي اراسىنداعى قارىم-قاتىناستاردىڭ قارقىندى دامىپ كەلە جاتقانىنا توقتالىپ, ەكى ەل حالىقتارىنىڭ يگىلىگى جولىنداعى بايلانىستاردىڭ ودان ءارى نىعايا تۇسەتىنىنە سەنىم ءبىلدىردى.
توتەنشە جانە وكىلەتتى ەلشى چجان سياو قاسىم-جومارت توقاەۆقا قازاقستان رەسپۋبليكاسىنىڭ پرەزيدەنتى لاۋازىمىنا كىرىسۋىنە بايلانىستى قىتاي حالىق رەسپۋبليكاسىنىڭ توراعاسى سي ءتسزينپيننىڭ قۇتتىقتاۋىن جەتكىزىپ, دوستىق پەن ستراتەگيالىق سەرىكتەستىك رۋحىنداعى ەكىجاقتى ىنتىماقتاستىقتى دامىتا تۇسۋگە كۇش سالاتىنىن ايتتى.
سەرىك ابدىبەك,
«Egemen Qazaqstan»
