قۇرمەتتى جيىنعا قاتىسۋشىلار! – دەپ باستادى ءسوزىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ.
ءبىز بۇگىن وسى قۇرامدا العاش رەت باس قوسىپ وتىرمىز.
قازىر – وتە جاۋاپتى كەزەڭ.
ەلباسىنىڭ دانا شەشىمىنىڭ ارقاسىندا بيلىك ساباقتاستىعى ەشبىر دۇربەلەڭسىز جۇزەگە استى. بۇل – ەلىمىزدىڭ باياندى بولاشاعى, قوعامنىڭ تۇراقتىلىعى مەن ۇدايى دامۋى ءۇشىن جاسالعان بىرەگەي قادام.
ءبىزدىڭ ستراتەگيالىق ماقساتىمىز بەلگىلى, مىندەتتەرىمىز ايقىن. ونى ەش وزگەرىسسىز جۇزەگە اسىراتىن بولامىز.
ءسوز باسىندا ءبىر ماسەلەگە توقتالىپ وتكىم كەلەدى. ەل تاريحىنداعى ەلباسىنىڭ ولشەۋسىز ەڭبەگىن ۇلىقتاۋ – بارىمىزگە ورتاق پارىز. بۇل – ادىلەتتىلىك.
ءبىز ەلوردامىزدىڭ اتاۋىن نۇر-سۇلتان دەپ وزگەرتتىك. بۇل – وتە دۇرىس شەشىم, تاريحي وقيعا. مۇنداي ماسەلەگە نەمقۇرايلى قاراپ, اسىعىس جانە ويلانباي ارەكەت جاساۋعا بولمايدى. سابىرلىلىقپەن, پاراساتتىلىقپەن جۇمىس ىستەۋ كەرەك.
استانا مەن قالالاردىڭ كوشەلەرىن وزگەرتۋ تاۋەلسىز قازاقستاننىڭ نەگىزىن قالاۋشى رەتىندە ءبىزدىڭ ەلباسىنىڭ ەرەكشە ەڭبەگىن كورسەتەتىن تاريحي وقيعا ەكەنىن تاعى ءبىر مارتە اتاپ ايتقىم كەلەدى. بۇل – قازاقستان رەسپۋبليكاسى تۇڭعىش پرەزيدەنتىنىڭ ەڭبەگىنە قاتىستى تاريحي ادىلەتتىلىكتىڭ كورىنىسى.
وسىعان وراي, مەن استانا اكىمىنە ەلىمىزدىڭ باس قالاسىن قايتا اتاۋعا بايلانىستى بۇكىل مۇددەلى قىزمەتتەر مەن ۆەدومستۆولاردىڭ جۇمىسىن رەتتەۋدى تاپسىرامىن. اقپارات مينيسترىنە اتالعان شەشىمدى ءتۇسىندىرۋدى جالعاستىرۋدى تاپسىرامىن.
ىشكى ىستەر مينيسترلىگى, ۇقك-ءنىڭ شەكارا قىزمەتى استانانى قايتا اتاۋعا وراي بۇعان دەيىن بەرىلگەن ۆيزالار مەن رۇقسات قۇجاتتارعا ولاردىڭ قولدانىس مەرزىمى اياقتالعانعا دەيىن ەشقانداي كەدەرگىلەر مەن بيۋروكراتيالىق توسقاۋىلدار قويماسىن.
باستى نازار شەكارانىڭ وتكىزۋ بەكەتتەرىنە, ونىڭ ىشىندە اەروپورتتارعا, ۆوكزالدارعا, تەمىر جول ستانسالارىنا اۋدارىلۋى كەرەك. پرەزيدەنت اكىمشىلىگىنە اتالعان جۇمىستىڭ ورىندالۋىن باقىلاۋعا الۋدى تاپسىرامىن.
حالىققا قايتا اتاۋعا بايلانىستى ماسەلەلەردىڭ بارلىعى تابيعي تۇردە, ەشكىمگە قولايسىزدىق تۋعىزباي جۇزەگە اسىرىلاتىنىن ءتۇسىندىرۋ ماڭىزدى.
قۇرمەتتى كەڭەسكە قاتىسۋشىلار! – دەپ جالعادى ءسوزىن مەملەكەت باسشىسى.
ءبىرىنشى. ەكونوميكالىق دامۋ
ەكونوميكالىق ءوسىم مەن ەكونوميكانى ارتاراپتاندىرۋعا قول جەتكىزۋدىڭ شەشۋشى فاكتورلارى ينۆەستيتسيالار, ەكسپورت جانە يندۋستريالاندىرۋ بولىپ تابىلادى. مۇندا مەملەكەت پەن بيزنەستىڭ, سونداي-اق ورتالىق پەن وڭىرلەردىڭ ۇيلەسىمدى جۇمىستارى قاجەت. بۇل اسىرەسە ينۆەستيتسيالار تارتۋ سەكىلدى سالادا ماڭىزدى. وسى جىلى تىكەلەي ينۆەستيتسيالار قورى قۇرىلدى.
سونىمەن بىرگە بىرقاتار وبلىستا ىسكەرلىك بەلسەندىلىكتى تەجەيتىن اكىمشىلىك كەدەرگىلەر مەن شەكتەۋلەر ساقتالىپ قالىپ وتىر. ءىس جۇزىندە قازىرگى ساتتە الەۋەتتى ينۆەستور قول جايۋشى كەيپىن كيگەن. مۇنىڭ جەر الۋ, ينجەنەرلىك جانە ەلەكتر جەلىلەرىنە قوسىلۋ, ءتۇرلى رۇقساتتار الۋ ماسەلەلەرىنە قاتىسى بار. ماسەلەلەردى ورتا دەڭگەيدەگى اكىمدىكتەردە كونسترۋكتيۆتى جانە جەدەل شەشۋدىڭ ورنىنا سوزبۇيدالىق پەن بيۋروكراتياعا سالۋ بەلەڭ العان. وسىنىڭ سالدارىنان الەۋەتتى ينۆەستوردىڭ سالى سۋعا كەتىپ, ول باسقا ەلدى تاڭداۋعا ءماجبۇر بولادى. جانە بۇل تەك شەتەلدىك قانا ەمەس, وتاندىق ينۆەستورلارعا دا قاتىستى.
اكىمدەر مەن ۇكىمەت انىقتالعان ءتۇرلى پروبلەمانىڭ جولىن كەسۋ ءۇشىن بارلىق مۇمكىندىكتى قاراستىرىپ, ءتيىستى لاۋازىمدى تۇلعالاردىڭ جەكە جاۋاپكەرشىلىگى تۋرالى شەشىم قابىلداۋى كەرەك.
تىكەلەي ينۆەستيتسيالار قورىنا قاتىستى ايتاتىن بولسام, ەلباسىنىڭ شەشىمىمەن ۇلتتىق قوردان 370 ميلليارد تەڭگە كولەمىندە قارجى ءبولىندى. سوندىقتان مەن قور وسى جىلدىڭ وزىندە-اق ايتارلىقتاي ناتيجە اكەلەدى دەپ ۇمىتتەنەمىن.
مينيسترلەر مەن اكىمدەر تارتىلعان ينۆەستيتسيالار كولەمى مەن شيكىزاتتىق ەمەس ەكسپورت ولاردىڭ قىزمەتىن باعالاۋدا شەشۋشى كورسەتكىش بولاتىنىن ناقتى تۇسىنۋلەرى كەرەك. پرەزيدەنت اكىمشىلىگى مەملەكەتتىك ورگانداردى باعالاۋدا قولدانىستاعى جۇيەگە ءتيىستى وزگەرىستەر ەنگىزۋى قاجەت.
ءارى قاراي ەلدىڭ ستراتەگيالىق جانە باعدارلامالىق قۇجاتتارىن قالىپتاستىرۋدا جەرگىلىكتى اتقارۋشى ورگانداردىڭ ءرولى مەن جاۋاپكەرشىلىگىن ارتتىرۋ كەرەك. بۇرىندارى ورتالىق مەملەكەتتىك ورگاندار قۇجاتتاردى كوپ جاعدايدا وڭىرلەردىڭ پىكىرىن تولىققاندى ەسەپكە الماي جاسايتىن. ءوز كەزەگىندە وڭىرلەر دە قۇجاتتاردىڭ ورىندالۋىنا اركەز ءتيىمدى جانە جاۋاپكەرشىلىكتى نەگىزدە قاراي بەرمەيتىن.
وسى جىلى ەلباسىنىڭ تاپسىرماسى بويىنشا بىزگە ورتا جانە ۇزاق مەرزىمدى كەزەڭدەرگە ارنالعان بىرقاتار باعدارلامالىق قۇجات دايىنداۋ قاجەت. بۇلار – ەلىمىزدى 2030 جىلعا دەيىن اۋماقتىق-كەڭىستىكتىك دامىتۋدىڭ بولجامدىق سىزباسى, وڭىرلەردى 2025 جىلعا دەيىن دامىتۋدىڭ باعدارلاماسى جانە يدمب-نىڭ ءۇشىنشى بەسجىلدىعى. اكىمدەر اتالعان قۇجاتتاردى جاساۋ مەن تالقىلاۋعا بەلسەندى كىرىسۋلەرى قاجەت. ولاردا وڭىرلەردىڭ پروبلەمالارىن شەشۋدىڭ جولدارى كورىنىس تابۋى ءتيىس. ۇكىمەت ءوزى تاراپىنان اكىمدەردىڭ ۇسىنىستارىن جان-جاقتى تالقىلاۋ مەن ەسەپكە الۋدى قامتاماسىز ەتۋى كەرەك.
ەكىنشى. ازاماتتاردىڭ ءال-اۋقاتى مەن ءومىر ساپاسى
قاسىم-جومارت توقاەۆ كەلەسى كەزەكتە الەۋمەتتىك ادىلەتتى مەملەكەت باعىتى جالعاستىرىلاتىنىن ايتتى. ول ەلباسىنىڭ جاستار جىلىنىڭ اشىلۋى مەن Nur Otan پارتياسىنىڭ 18-ءشى سەزىندە بەرگەن بەس الەۋمەتتىك باستاماسى مەن تاپسىرمالارىنىڭ «نۇرلى جول» باعدارلاماسى شەڭبەرىندە كەشەندى جۇزەگە اسىرىلاتىن بولادى. الەۋمەتتىك قولداۋدىڭ باسقا باعىتتارى بويىنشا دا جەدەلدەۋ قاجەت دەپ سانايمىن, دەدى پرەزيدەنت.
مەن بيۋدجەت سالاسىنىڭ تومەن جالاقى الاتىن قىزمەتكەرلەرىنە ەڭبەكاقىلارىن ءبىر اي بۇرىن – 1 ماۋسىمنان باستاپ كوتەرۋدى تاپسىردىم. اتالعان شارا ميلليوننان استام قىزمەتكەردىڭ ومىرىنە وڭ ىقپال ەتەتىن بولادى.
باسپانامەن قامتاماسىز ەتۋگە قاتىستى ايتسام, الەۋمەتتىك ءالجۋاز ازاماتتار ءۇشىن 40 مىڭنان استام جالدامالى پاتەرلەر ءبولۋ قاراستىرىلىپ وتىر. اكىمدەرگە پاتەرلەردى ۇستىمىزدەگى جىلدىڭ مامىرىنان بولە باستاۋدى تاپسىرامىن.
ءبىز سونداي-اق ءار قازاقستاندىقتىڭ ءومىر ساپاسىن جوعارىلاتۋ تۋرالى ويلاۋىمىز كەرەك. سوندىقتان حالىقتىڭ ءومىر ساپاسىنا تىكەلەي اسەر ەتەتىن ينفراقۇرىلىمدىق سيپاتتاعى ماسەلەلەرگە نازار اۋدارۋ قاجەت. بۇل تكش سالاسىنداعى, ياعني جىلۋمەن جانە سۋمەن قامتاماسىز ەتۋ, كارىز جۇيەسى, سونداي-اق جولدار, گازداندىرۋ ماسەلەلەرى, ەكولوگيا جانە قاۋىپسىزدىك پروبلەمالارى. بۇلاردى شەشۋگە «قۇتتى مەكەن» جانە «اۋىل – ەل بەسىگى» جوبالارى باعىتتالىپ وتىر. اتالعان جوبالاردى جۇزەگە اسىرۋعا الداعى ءۇش جىلعا تريلليوننان استام تەڭگە قاراستىرىلعان.
ۇكىمەت پەن اكىمدەرگە بيۋدجەت قارجىلارىنىڭ ناقتى ەكونوميكاعا جەدەل جەتۋىن قامتاماسىز ەتۋ قاجەت. وسى ورايدا اتالعان جوبالارعا وتاندىق وندىرۋشىلەردىڭ بارىنشا مول تارتىلۋىن باقىلاۋعا الۋدى تاپسىرامىن. بۇل تەك الەۋمەتتىك ماسەلەلەردى عانا شەشىپ قويماي, سونداي-اق وڭىرلەر ەكونوميكاسىن ىنتالاندىرۋعا مۇمكىندىك بەرەدى. بۇدان بولەك, وڭىرلەرگە مەملەكەتتىڭ الەۋمەتتىك ساياساتىن جۇزەگە اسىرۋعا بەلسەندىرەك قاتىسۋ قاجەت.
بۇگىندە اكىمدىكتەر الەۋمەتتىك كومەكتىڭ 10-نان استام ءتۇرىن كورسەتەدى. ولاردىڭ ىشىندە جاردەماقى تولەۋ, باسپانامەن كومەكتەسۋ, جول ءجۇرۋ جەڭىلدىكتەرى, تەگىن تاماق بەرۋ جانە باسقالارى بار. الايدا, تۇتاستاي العاندا, وڭىرلەردە الەۋمەتتىك قولداۋ شارالارىنا 5,3%-دان از قارجى بولىنەدى. الەۋمەتتىك تولەمدەردىڭ ايتارلىقتاي بولىگى رەسپۋبليكالىق دەڭگەيدە جۇزەگە اسىرىلادى. قولدانىستاعى بيۋدجەت تەڭدەستىرىلمەگەن جانە قايتا فورماتتاۋدى تالاپ ەتەدى.
ءبىرىنشى كەزەكتە, الەۋمەتتىك قۇرامداس وسەدى. ونىڭ تولىعۋ كوزدەرىنە ساراپتاما جۇرگىزىلمەيدى. ەكىنشىدەن, بيۋدجەتتىڭ ء«وندىرىسسىز شىعىندارى» بار. كوپتەگەن قاجەت ەمەس شىعىنعا جول بەرىلەدى. ءبىز بيۋدجەتكە كوزقاراسىمىزدى تۇبەگەيلى وزگەرتۋگە ءتيىسپىز. وسى جىلى بولماعانمەن, كەلەسى جىلى مىندەتتى تۇردە.
اكىمدەرگە قاجەتسىز اسا قىمبات ساتىپ الۋلاردى, يميدجدىك ءىس-شارالار مەن سول سياقتىلاردى قارجىلاندىرۋدى توقتاتىپ, جەرگىلىكتى بيۋدجەت قارجىسى ەسەبىنەن الەۋمەتتىك ساياساتتى اناعۇرلىم بەلسەندىرەك جۇرگىزۋ قاجەت. سونىمەن قاتار حالىقتىڭ ناقتى تابىس پروبلەمالارىن تەك بيۋدجەتتىك شىعىندار ەسەبىنەن شەشۋ مۇمكىن ەمەس ەكەنىن دە تۇپكىلىكتى تۇسىنگەن ءجون.
ازاماتتارىمىز ءۇشىن ەڭ ۇتىمدى الەۋمەتتىك قورعاۋ – بۇل ءوزىنىڭ بيزنەسىن جۇرگىزۋ مۇمكىندىگى نەمەسە بىلىكتى ەڭبەگى ءۇشىن لايىقتى ەڭبەكاقى الۋ.
ءۇشىنشى. حالىقپەن ءوزارا ىقپالداستىقتىڭ جاڭا فورماتى
تاقىرىپقا وراي سوزىندە مەملەكەت باسشىسى بيلىك باسىنداعىلار ءۇشىن قاراپايىم ادامداردىڭ الەۋمەتتىك احۋالىن ءبىلۋ جانە دەر كەزىندە ارەكەت ەتۋ وتە ماڭىزدى ەكەنىنە نازار اۋداردى. ياعني, ۋاقىت تىنىسىن سەزىنىپ وتىرۋ كەرەك. بۇل اركەز اسىرەسە, ەلەكتوراتتى كەزەڭ الدىندا ءبىزدىڭ باسىمدىقتارىمىز بولىپ تابىلادى.
اكىمدەرگە حالىقتىڭ سۇرانىسىنا جەدەل قايىرىلۋ جانە ءتۇسىندىرۋ جۇمىستارىن جۇرگىزۋ قاجەت. الەۋمەتتىك جەلىلەردە بەلسەندى جۇمىس ىستەۋ: مەسسەندجەرلەردە توپتار قۇرۋ, جۇرگىزىلىپ وتىرعان ساياساتتى جەرىنە جەتكىزە ءتۇسىندىرۋ, جاعدايدى باسقارا ءبىلۋ ماڭىزدى.
حالىقپەن كەرى بايلانىس بارلىق جەردە بىردەي جولعا قويىلماعان, كونتاكتىلى كولل-ورتالىقتار 17 اكىمدىكتىڭ تەك 4-ەۋىندە عانا, ال ءموبيلدى حالىقتىق باقىلاۋ 7 وڭىردە عانا بار.
حالىقپەن كەزدەسۋلەردە كونسترۋكتيۆتى سۇحبات ورناتۋ كورسەتكەنىندەي, كوپتەگەن پروبلەمالى ماسەلەنى اكىمدىكتەر ءتيىستى دەڭگەيدە شەشە الادى ەكەن.
بۇل ازاماتتاردىڭ بيلىك ينستيتۋتىنا دەگەن سەنىمدەرىن ارتتىرادى. ءوڭىر اكىمدەرى حالىقپەن ەسەپتىك كەزدەسۋلەردە عانا ەمەس, تۇراقتى نەگىزدە كەزدەسۋلەرى جانە بارلىق ەلدى مەكەندەردى ارالاۋى ءتيىس.
قوعامنىڭ قازىرگى دامۋ ساتىسىندا جۇرگىزىلىپ جاتقان رەفورمالار مەن جۇزەگە اسىرىلىپ جاتقان مەملەكەتتىك ساياساتتىڭ ءمانىن ناقتى ءارى ۇعىنىقتى جەتكىزە ءبىلۋ ءاربىر باسشىعا قويىلاتىن نەگىزگى تالاپقا اينالىپ وتىر. كەيدە ەڭ ساۋاتتى ماماننىڭ ءوزى قاراپايىم ۇعىنىقتى تىلدە سويلەي المايتىنىن وزدەرىڭىز دە كورىپ جۇرسىزدەر. سوندىقتان مەملەكەتتىك باسقارۋ اكادەمياسىنىڭ بازاسىندا ءتيىستى كۋرستار ەنگىزىپ, ولارعا حالىقپەن بەلسەندى ارەكەتتەستىكتە بولاتىن بارلىق شەنەۋنىكتەردى جىبەرۋ كەرەك.
اكىمدەرگە حالىقپەن قارىم-قاتىناستىڭ جاڭا فورماتىنا كەڭىنەن قامتۋ, اشىقتىق جانە ارەكەت ەتۋ جەدەلدىگىن قامتاماسىز ەتە وتىرىپ كوشۋدى تاپسىرامىن. ءوڭىر باسشىلىعىنىڭ ازاماتتارمەن جەكە قارىم-قاتىناستا بولۋى وتە ماڭىزدى. بۇل اۋىلدان باستاپ, وبلىسقا دەيىنگى بارلىق دەڭگەيدەگى اكىمدەرگە قاتىستى, دەدى قازاقستان پرەزيدەنتى.
ءتورتىنشى. جاستاردىڭ ەلدەگى وزگەرىستەر پروتسەسىنە قاتىستىلىعى
قاسىم-جومارت توقاەۆ تۇڭعىش پرەزيدەنت – ەلباسى 2019 جىلدى جاستار جىلى دەپ جاريالاعانىن قاپەرگە سالدى. جاستاردى قولداۋ مەملەكەتتىك ساياساتتىڭ باسىمدىعى بولىپ سانالادى. بيىل «جاستار – ەل تىرەگى» ارناۋلى الەۋمەتتىك جوباسى ىسكە قوسىلدى. ول جاستاردىڭ كاسىپكەرلىگىن دامىتۋعا, سۇرانىسقا يە ماماندىقتارعا وقىتۋعا جانە جاستاردىڭ جۇمىسپەن قامتىلۋىن قامتاماسىز ەتۋگە باعىتتالعان.
تۇتاستاي العاندا, جاستاردى جۇمىسقا ورنالاستىرۋعا بايلانىستى تاجىريبەنىڭ جوقتىعى, ءىس جۇزىندەگى داعدىلارىنىڭ جەتىسپەۋشىلىگى, ەڭبەككە بەيىمدەۋ قاجەتتىلىگى سياقتى ماسەلەلەر اكىمدەر مەن ۇكىمەت تاراپىنان ءجىتى نازار اۋدارۋدى قاجەت ەتەدى. بۇل ماسەلەلەر ۇدايى باقىلاۋدا بولۋى ءتيىس. بارلىق جۇيەلى ماسەلەلەر, سونىڭ ىشىندە زاڭناماعا وزگەرىستەر, بيۋدجەتتىك قاراجات ءبولۋ, ينفراقۇرىلىم سالۋ وسى جىلدىڭ ىشىندە – جاستار جىلىندا شەشىلۋى كەرەك.
سونداي-اق ورتا ءبىلىم سالاسىندا ۇشتىلدىلىك باعدارلاماسىن جۇزەگە اسىرۋ دا وتە كۇردەلى جانە ماڭىزدى ماسەلە. ەڭ الدىمەن, قازاق جانە ورىس تىلدەرىنە وقىتۋ جۇزەگە اسىرىلۋى ءتيىس. بۇل ءبىزدىڭ بالالارىمىز ءۇشىن وتە ماڭىزدى. سودان كەيىن عانا اعىلشىن ءتىلىن ۇيرەتۋ كەرەك, دەدى مەملەكەت باسشىسى.
بەسىنشى. قوعامدىق قاۋىپسىزدىكتى قامتاماسىز ەتۋ
قازاقستان باسشىسىنىڭ سوزىنشە, نەگىزگى مىندەتى ازاماتتاردىڭ قۇقىقتارىن قورعاۋدى مۇلتىكسىز قامتاماسىز ەتۋ بولاتىن قۇقىق قورعاۋ جۇيەسىن رەفورمالاۋ ءىسى بەلسەندى ساتىعا كوشتى. قازىرگى احۋال اكىمدىكتەر مەن قۇقىق قورعاۋ ورگانداردىڭ ءوزارا ءىس-قيمىلى مەن جۇمىستارىن ۇيلەستىرۋدى كۇشەيتۋ قاجەتتىگىن كورسەتىپ وتىر. بۇل اسىرەسە اكىمدەردىڭ پوليتسيا دەپارتامەنتتەرىنىڭ باستىقتارىن تاعايىنداۋ بويىنشا جاڭا وكىلەتتىلىكتەرى اياسىندا ماڭىزدى.
سوڭعى كەزدەرى قوعامدىق رەزونانس تۋدىرعان قۇقىقبۇزۋشىلىقتاردا جەرگىلىكتى اكىمدىكتەر مەن قۇقىق قورعاۋ ورگاندارىنىڭ ۇيلەسىمدى جۇمىسى بايقالمادى. وسىعان بايلانىستى وقيعالارعا ۇلتارالىق سيپات بەرۋگە تىرىسقان جەكەلەگەن تالپىنىستار ايرىقشا الاڭداتادى. مۇنداي ارانداتۋلاردىڭ جولى قۇقىق قورعاۋ ورگاندارى تاراپىنان دا, يدەولوگيالىق شارالار ارقىلى دا دەرەۋ كەسىلۋى ءتيىس. تۇركىستانعا ساپارىم بارىسىندا ايتىپ وتكەنىمدەي, سىبايلاس جەمقورلىقپەن جۇيەلى كۇرەسۋ قاجەت.
التىنشى. اعىمداعى جەدەل ماسەلەلەر
ءسوزىنىڭ سوڭىندا قاسىم-جومارت توقاەۆ جىلىتۋ ماۋسىمىن تىڭعىلىقتى اياقتاپ, تۇرعىن ءۇي-كوممۋنالدىق شارۋاشىلىق پەن الەۋمەتتىك سالا نىساندارىنىڭ تۇراقتى قىزمەتىن قامتاماسىز ەتۋ قاجەتتىگىن اتاپ كورسەتتى. ۇكىمەتكە قورىتىندىلاردى شىعارۋدى جانە كەلەسى كەزەڭگە دايىندىق شارالارىن قابىلداۋدى تاپسىرامىن, دەدى ول.
تاسقىن سۋعا قارسى شارالار جونىندە.
بىلتىر 5 وڭىردە شامامەن 1,5 مىڭ تۇرعىن ءۇيدى سۋ الدى. زارداپ شەككەندەرگە كۇش-جىگەر بىرىكتىرىپ, كومەك كورسەتىلدى. ۇكىمەت پەن اكىمدەر وڭىرلەردەگى سۋ تاسقىنىنىڭ الدىن الۋ شارالارىن قابىلداۋى قاجەت. سۋ قويمالارى مەن وزەندەر مونيتورينگىن ۇيىمداستىرىپ, گيدروتەحنيكالىق نىساندارعا رەۆيزيا جۇرگىزۋ جانە كەز كەلگەن جاعدايعا دايىن بولۋ كەرەك.
وڭتۇستىك وبلىستاردا كوكتەمگى ەگىس جۇمىستارى باستالىپ كەتتى. تۋىنداعان بارلىق ماسەلەنى ۋاقتىلى شەشۋ قاجەت. جوعارى ساپالى تۇقىممەن, تىڭايتقىشتارمەن جانە جانار-جاعارماي ماتەريالدارىمەن قامتاماسىز ەتۋ بارىسىن باقىلاۋدا ۇستاۋ كەرەك. قارجىلىق قيىندىقتارعا دۋشار بولعان, پروبلەمالى ءىرى اگروحولدينگىلەر مەن شارۋاشىلىقتارعا ايرىقشا نازار اۋدارعان ءجون. ونداعى كوكتەمگى ەگىس جۇمىستارى تولىق كولەمىندە جانە مەرزىمىندە اتقارىلۋى ءتيىس. ۇكىمەت پەن اكىمدەرگە تىڭعىلىقتى دايارلانۋدى جانە كوكتەمگى ەگىس جۇمىستارىن اينالىمعا بارلىق ەگىستىك القاپتارىن مەيلىنشە قامتي وتىرىپ, ساپالى جۇرگىزۋدى تاپسىرامىن.
* * *
تۇڭعىش پرەزيدەنت – ەلباسىنىڭ دانا ساياساتىنىڭ ارقاسىندا ءبىز ەڭ قيىن ۋاقىتتاردان جەڭىمپاز بولىپ شىقتىق, ءوسىمنىڭ وڭ قارقىنى مەن حالىقتىڭ ءال-اۋقاتىنىڭ ءوسۋىن قامتاماسىز ەتتىك. قازىر وسى قارقىندى بارلىق باعىتتا ساقتاپ, جۇمىس تاسىلدەرىن جەتىلدىرۋ جانە مەجەلەنگەن جوسپارلار مەن مىندەتتەردىڭ ساپالى ورىندالۋىن قامتاماسىز ەتۋ قاجەت. باستى ماقسات – ازاماتتارىمىزدىڭ ءال-اۋقاتىن جانە بولاشاققا دەگەن سەنىمىن ارتتىرۋ.
پرەزيدەنت اكىمشىلىگىنە بۇگىنگى بارلىق تاپسىرمانى باقىلاۋعا الۋدى تاپسىرامىن. ناقتى ناتيجەلەر كۇتەمىن جانە ساتتىلىك تىلەيمىن, – دەپ قورىتتى ءسوزىن مەملەكەت باسشىسى قاسىم-جومارت توقاەۆ.
