– 2003 جىلى اۋىل جىلىندا جاساعان دۇنيەم. تۋرا 16 جىل بولىپتى. اسىرەسە, سىرتتان كەلگەن قوناقتار قىزىعا قاراپ ءوتىپ جاتادى, – دەيدى ەرجان «ايۋىن» ايالاي سيپاپ قويىپ. تۋرا رەسەيدىڭ «ماشا مەن ايۋ» اتتى بالالارعا ارنالعان مۋلتفيلمىندەگى دەنەلى قوڭىر ايۋدىڭ ءوزى. ەكى قولىن الدىنا قۋسىرا ۇستاپ, تاۋ جاققا قوز سالىپ تۇر.
راس, اعاشتان ءتۇرلى اڭداردىڭ ءمۇسىنىن جاساۋعا ەكىنىڭ ءبىرى بارا بەرمەيدى. قيىننىڭ قيىنى. ەرجاننىڭ كەيبىر اسىرەسە, قارا اعاشتان جاسايتىن مۇسىندەرىنە ايلاپ ۋاقىت كەتىپ قالادى ەكەن. كوبىنە جۇمىسىنا ءدىڭى جۋان كوك تەرەكتى تاڭدايدى. ەرجانداي شەبەر قولدى ءمۇسىنشى جىگىت ءدال وسىناۋ ىسكە جاراتىلعانداي جان سەكىلدى. الماتى قالاسىنداعى رەسپۋبليكالىق كوركەمسۋرەت كوللەدجىن ءمۇسىن ونەرى بويىنشا, ودان سوڭ اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كوركەمسۋرەت, گرافيكا فاكۋلتەتىن ءبىتىرىپ شىققان.
– كىشكەنتاي كەزىمنەن-اق بەينەلەۋ ونەرىنە ىنتىق بولىپ ءوستىم. ءالى ەسىمدە, 5 سىنىپتا وقىپ جۇرگەن كەزىمدە «كىم بولام؟» دەگەن تاقىرىپتا شىعارما جازدىق. سوندا بولاشاقتا ءمۇسىنشى بولام دەپ جازعان ەدىم. جۇرەگىم قالاعان ءتۇرلى جان-جانۋارلاردىڭ ءمۇسىنىن جاساي بەرەمىن, – دەيدى ەرجان ك ۇلىمدەي ءتىل قاتىپ.
اعاشتان جاساپ شىعاتىن اڭدارى تۋرا وزىنەن اينىماي كوز تارتىپ تۇراتىنى قۋانارلىق. ونى قالاعان تۇسپەن سىرلاپ قويسا, ۇزاق جىلدارعا شىداس بەرەدى ەكەن. ەرجانعا ارنايى تاپسىرىس بەرىپ جاتاتىن جاندار دا كوپ. اسىرەسە, ەكى قاباتتى ۇيلەرى بار, ەسىكتەرىنىڭ الدى الۋان گۇلمەن, تال-تەرەك, جەمىس اعاشتارىمەن كومكەرىلگەن ءساندى اۋلالاردا ءتۇرلى اڭداردىڭ اسىرەسە, ەلىكتىڭ مۇسىندەرى تۇرعانى عاجاپ-اق. ەرجاننان ەستىگەنىمىزدەي ءبىرسىپىرا مۇسىندەرى قوعام قايراتكەرلەرىنىڭ ەسىكتەرىنىڭ الدىندا تۇرعان كورىنەدى. راس, اعاشتان ايلاپ, اپتالاپ ماڭداي تەرلەتە جاساپ شىعاتىن مۇسىندەردىڭ باعاسى دا ءوزىن-ءوزى اقتايتىن دارەجەدە بولادى ەكەن. ويتكەنى بۇل ەرىنبەي ەتكەن ەڭبەكتىڭ جەمىسىنەن قۇرالادى.
– مەنىڭ جاساعان اتتارىم استانا قالاسىندا وتكەن ەكسپو – 2017 حالىقارالىق كورمەسىنەن ورىن الدى. اعاشتان جولبارىس, ايۋ, ۇكى, مىسىق, بۇركىت پەن تاسباقانى دا جاسادىم. ءبىر جىلقىنىڭ باسىن قارا اعاشتان جاساعان ەدىم. ءبىر اي ەڭبەكتەنۋگە تۋرا كەلدى. جالپى, قازاقشا 12 ايداعى جان-جانۋارلاردى تۇگەلدەي سومداپ شىقتىم, – دەيدى ەرجان ءوزىنىڭ جۇمىستارىنان حاباردار ەتىپ.
ءبىز ءسوز ەتىپ وتىرعان ەرىنبەيتىن ەڭبەككەر, مايتالمان ءمۇسىنشى, سىرلى سۋرەتكەر ەرجان قوجاحمەت ۇلى قازىر قامال الار قىرىقتىڭ مول ىشىندە. اۋىلدا دا, قالادا دا جۇرەك قالاعان ءىسىن ىستەي بەرەدى. الماتى قالاسىنداعى, رەسپۋبليكا كولەمىندەگى ءبىرسىپىرا عيماراتتاردىڭ, بالالار باقشالارىنىڭ الدىندا قولىنان شىققان مۇسىندەرى تۇر. ءوزى سەكىلدى شەبەر قولدى ازاماتتارمەن الماتى قالاسىنداعى ءال-فارابي اتىنداعى ايگىلى داڭعىلدى بەزەندىرۋگە قاتىسىپتى. وتكەن جىلى قارابۇلاق اۋىلىندا سالىنعان اللانىڭ ۇيىنە دە اتسالىسقان. مەشىت عيماراتىندا كوزدىڭ جاۋىن الار قولتاڭبالارى تۇر.
جەكە شەبەرحانامدى اشسام دەگەن ۇلكەن ماقساتىم بار. ىنتا-ىقىلاسى بار جاستار بولسا, شاكىرتتەر تاربيەلەۋ جاعى دا ويىمدا. قاجەتتى قۇرال-سايماندارىمدى دا تولىقتاپ العىم كەلەدى, – دەيدى ەرجان الداعى جوسپارى تۋرالى اڭگىمەلەپ.
قانات ءبىرجانسال,
جۋرناليست
الماتى وبلىسى
