الايدا 22 جاستاعى اناستايا ترۋبنيكوۆا كاسىپكەر بولسا دا, پەداگوگيكانى تاستاعان جوق. ەندى ونىڭ الدىنداعى پارتادا وقۋشىلار ەمەس, 2 جاستان اسقان بۇلدىرشىندەر وتىرادى. وسىدان ەكى اي بۇرىن عانا قوستاناي اۋدانىنىڭ ورتالىعى زاتوبول كەنتىندە بالالار ورتالىعىن اشقان جاس قىز ءوزىنىڭ ءاۋ باستا ويلاپ جۇرگەن باستاماسىن جۇزەگە اسىرا ءبىلدى. ول بالالاردى شىعارماشىلىق كومەگىمەن وقىتۋدى باستادى.
اناستاسيا ءوزىنىڭ بيزنەسىنە تياناقتى دايىندىقپەن كەلدى. ول الدىمەن مۇعالىمدىكتەن وقۋشىعا اينالىپ, ياعني «باستاۋ» جوباسىنا قاتىسىپ, باسقالارمەن بىرگە پارتاعا وتىردى.
«مەن بالالاردى جاقسى كورەمىن, ءوز ماماندىعىم ۇنايدى. بىراق بالالارعا قاجەتتى ءبىلىم بەرۋدى بىلسەم دە, كاسىپكەرلىك تۋرالى حابارىم جوق ەدى. «باستاۋ» كۋرسى ماعان بۋحگالتەرلىكتى, ماركەتينگ مەن كاسىپكەرلىكتىڭ باسقا دا كىلتيپاندارىن ۇيرەتتى» دەيدى اناستاسيا. ول بالالار ورتالىعىن تاقىر جەردەن باستادى. ول ءۇشىن 4 ميلليون تەڭگە نەسيە الدى. بۇل قارجى ورتالىققا مەبەل, جابدىقتار الۋعا جانە تاعى ەكى پەداگوگكە جالاقى تولەۋگە جەتتى.
ء«بىز جارنامادان قارجىمىزدى ۇنەمدەدىك, كوشەگە شىعىپ, پاراقشالار تاراتتىق. بالالار تاقىرىبىنا كەشتەر وتكىزدىك. بۇگىندە ون بەس بالا جينالدى, ولارمەن جۇمىس ىستەپ, ناتيجەسىن كورەتىن بولامىز» دەيدى اناستاسيا.
بالالار ورتالىعىنىڭ ەرەكشەلىگى, ولارعا ارت-تەراپيا, پەسكوگرافيا, تەاتر ونەرى ساباقتارى ويىن تۇرىندە وتكىزىلەدى. بۇل كىشكەناتي بۇلدىرشىندەرگە وتە ۇنايدى, ساباقتان جالىقپايدى. اناستاسيا الداعى ۋاقىتتا بالالاردى ساۋىقتىرۋ ساباقتارىن قوساتىن بولادى. كاسىپكەر ورتالىقتىڭ جەكە عيماراتى, ساۋىقتىرۋ بولمەلەرىنىڭ بولۋىنا جۇمىس ىستەيتىن جوسپارلارىمەن دە ءبولىستى.
ءنازيرا جارىمبەت,
«ەگەمەن قازاقستان»
قوستاناي
