ماڭعىستاۋ اۋدانى اۋماعىندا ورنالاسقان «قازمۇنايگاز» ۇك» اق-قا قاراستى اتالمىش كەن ورنىنىڭ كۇردەلى ۋچاسكەسىندە ۇڭعىمانىڭ قۇرىلىسى بارىسىندا كەن ورنىنىڭ ورتالىق بولىگىنە ءتان تەحنوگەندىك سيپاتتاعى گاز-سۋ ارالاس تابيعي بۇرقاق اتقىلاي جانىپ, 10 مەتر بيىكتىككە دەيىن جالىن اتا الاۋلاعانى, ءورت اۋماعىنىڭ 900 شارشى مەتر جەردى قامتىعانى ايتىلۋدا. اپات تۋرالى الدىمەن توتەنشە جاعدايلار دەپارتامەنتىنىڭ كەزەكشى-ديسپەتچەرلىك قىزمەتىنە حابارلانعان.
قازىرگى تاڭدا وقيعا ورنىندا ماڭعىستاۋ وبلىسىنىڭ تجد, «سەمسەر-ءورت ءسوندىرۋشى» جشس جانە «فاير پروتەكشن لتد» جشس جەكە قۇرامىنىڭ 53 ادامى جانە ءورت ءسوندىرۋ تەحنيكاسىنىڭ 12 بىرلىگى جۇمىلدىرىلعان. ءورتتى ءسوندىرۋ بارىسىندا جانعان جەردى تاسىمالداناتىن لافەتتىك وقپاندارمەن ءسوندىرۋ ءۇشىن بىرنەشە رەت تالپىنىستار جاسالدى, الايدا ءورت وشاعىنا كىرمە جولداردىڭ جوقتىعىنا بايلانىستى ءورتتى اۋىزدىقتاۋ مۇمكىن بولمادى.
وپەراتيۆتى ءورت ءسوندىرۋ شتابىن ماڭعىستاۋ وبلىسى تجد باستىعى ق.بازارباەۆ باسقارۋدا. شتاب قۇرامىنا «ماڭعىستاۋمۇنايگاز» اق باس ديرەكتورىنىڭ ءبىرىنشى ورىنباسارى ب.يمانباەۆ, قم يندۋستريالىق دامۋ جانە ونەركاسىپتىك قاۋىپسىزدىك كوميتەتى دەپارتامەنتىنىڭ باسشىسى س.قازاقباەۆ, كااقق روش ماڭعىستاۋ فيليالىنىڭ (بۇرقاققا قارسى قىزمەت), «سيبۋ» جشس وكىلدەرى جانە باسقالار بار.
«قازمۇنايگاز» ۇك» اق وقيعاعا بايلانىستى اقپارات تاراتتى. اقپاراتتا سۋ-گاز ارالاس بۇرقاقتىڭ شىعۋى جايلى ايتىلىپ, 13-24 كۇندەرى ماماندار كۇردەلەندىرىلگەن بۇرعىلاۋ ەرىتىندىسىمەن ۇڭعىمانى جۋ جونىندەگى جۇمىستاردى, سونداي-اق گريفونداردى جويۋ ءۇشىن جوندەۋ-وقشاۋلاۋ جۇمىستارىن جۇرگىزگەندىگى ايتىلعان.
«2019 جىلعى 25 ناۋرىزدا ساعات 05:46-دا (نۇر-سۇلتان قالاسىنىڭ ۋاقىتى بويىنشا) 8232 ۇڭعىمانىڭ اۋماعىندا 16 ناۋرىزدا جەر بەتىنە شىققان گاز-سۋ قوسپاسىنىڭ وشاعى جانا باستادى. «سەمسەر-ءورت ءسوندىرۋشى» جشس جاۋىنگەرلىك توبىنىڭ شاقىرىلعان ورىنعا كەلۋ ۋاقىتى 05 ساعات 58 مينۋت. قۇربان بولعان جانە زارداپ شەككەندەر جوق. 2019 جىلعى 25 ناۋرىزدا ساعات 14:30-عا قاراي ءورتتى اۋىزدىقتاۋ ءۇشىن قوسىمشا اقتاۋ قالاسىنىڭ موقق 6 ءورت ءسوندىرۋ توبى كەلىپ جەتتى: 4 اۆتوتسيستەرنا, 1 جىلجىمالى سورعى ستانساسى, 1 گاز-سۋ ءسوندىرۋشى اۆتوموبيل» دەلىنگەن اقپاراتتا.
ەلىمىزدىڭ يندۋستريا جانە ينفراقۇرىلىمدىق دامۋ مينيسترلىگىنىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتى ماڭعىستاۋ وبلىسىنىڭ اۋماقتىق بولىمىمەن بىرلەسىپ, كەن ورنىنداعى اپاتتى وقيعانىڭ ءمان-جايىن انىقتاۋدا.
وقيعا ورنىنا قازاقستان رەسپۋبليكاسى ەنەرگەتيكا ۆيتسە-ءمينيسترى م.دوسمۇحامبەتوۆ كەلدى. ءبىرىنشى ۆيتسە-مينيستر ءورتتى تۇمشالاۋعا جۇمىلعانداردىڭ جۇمىسىن قاداعالۋدا. 26 ناۋرىزدا قانداي دا ناقتى شەشىم قابىلدانۋى ءتيىس بولاتىن.
– اپات ورىن العان جەردەن كۇندەلىكتى اۋانىڭ, توپىراقتىڭ, سۋدىڭ سىنامالارى الىنىپ, ساراپتاما جاسالىندى. اپات تولىق اۋىزدىقتالعان سوڭ عانا قورشاعان ورتاعا قانداي زيان كەلتىرىلگەنى, ونىڭ كولەمى تۋرالى ايتۋعا بولادى. بارلىق جۇمىستار ەل زاڭنامالارىنا سايكەس جۇرگىزىلەتىن بولادى, – دەدى ماڭعىستاۋ وبلىسى وڭىرلىك كوممۋنيكاتسيالار قىزمەتىنىڭ ورتالىق كوممۋنيكاتسيالار قىزمەتىمەن بىرلەسە وتكىزگەن بريفينگىندە ماڭعىستاۋ وبلىسىنىڭ ەكولوگيا دەپارتامەنتى باسشىسىنىڭ مىندەتىن اتقارۋشى ر.تۋكەنوۆ.
وقيعانىڭ سەبەپ-سالدارى تولىق انىقتالادى دەپ ويلايمىز. زارداپ شەككەندەردىڭ بولماۋى كوڭىل قۋانتادى. الايدا, توتەنشە جاعدايدى, ورىن العان وقىس وقيعانى اۋىزدىقتاۋداعى كاسىبيلىكتىڭ, شەبەرلىكتىڭ شىنايىلىعىنا كۇمان پايدا بولدى. سانداعان تەحنيكا مەن ماماندار كۇشىن جۇمىلدىرا جۇگىرگەنمەن, ايدىڭ-كۇننىڭ امانىندا ۇڭعىمادان شىققان سۋ ارالاس گازدى تۇمشالاي الماي ابىگەرگە تۇسكەندەردىڭ ارەكەتىنە قاراپ سوناۋ 1961 جىلدارى مۇناي بۇرقاعى اتقىلاعاندا قارا كۇش پەن قۇرىش بىلەگىنە سۇيەنە جانسەبىلدىك تانىتقانداردىڭ ەرلىگىن ەسكە الا كۇرسىنەسىز...
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
