الدىمەن عالىم اسقار جۇمادىلداەۆ ەسەپ شىعارۋ بايقاۋىن وتاندىق ستۋدەنت جاستارعا ارنايى ءداستۇرلى تۇردە ون ءۇش جىل قاتارىنان وتكىزىپ كەلە جاتقانىن ايتا كەتكەن ءجون.
– مەن جاستارعا تاپسىرعان ەسەپتىڭ بىردە بىرەۋىنىڭ شەشىمىن بىلمەيمىن. سوندىقتان ونى جاستارعا جاسىرامىن. جالپى, ەسەپتىڭ شەشىمىن تابۋعا ارقالاي ۋاقىت وتەدى. ءجانيا كەڭەسوۆا بۇل ەسەپتىڭ شەشىمىن ءبىر اپتانىڭ ىشىندە تاپتى. بىراق مەن جەڭىلدەۋ بولسىن دەپ تاپسىرمانى اسا قاتتى قيىنداتپادىم. مەنىڭ ماقساتىم – بالالاردىڭ ىزدەنىسكە دەگەن قۇشتارلىعىن ارتتىرۋ, بۇل ازايتۋ امالىنىڭ زاڭدارى عوي, بارلىعى قوسۋ امالدارىن كوبىرەك بىلەدى, ازايتۋ امالىن ەشكىم زەرتتەمەگەن. سونى بالالارعا ادەيى بەردىم, كورسىن دەپ, ۇيرەنسىن دەگەن نيەتپەن. بارلىعى ەسەپتى شەشۋگە ون شاقتى بالا باق سىناپ كوردى, ال وسى قىزىمىزدىڭ ۇسىنعان شەشىمى جاڭا زاڭدىلىق بولدى, بەسىنشى دارەجەلى تەپە تەڭدىكتىڭ شەشىمىن تاپتى, – دەيدى اكادەميك.
اكادەميك سوڭعى جىلدارى جاستاردىڭ ماتەماتيكا عىلىمىنا دەگەن ىنتا-ىقىلاسى ازايىپ, قىزىعۋشىلىعى تومەندەگەنىنە عىلىم جاناشىرى رەتىندە وتە قىنجىلعانىن ايتادى. سوندىقتان جاستاردى قۇلشىندىرۋ ءۇشىن وسىنداي بايقاۋ ۇيىمداستىرىپ, ءوز ەسەبىنەن ىنتالى, تالانتتى ستۋدەنتتەرگە ارنايى سىيلىق تاعايىنداۋدى ءجون كورگەن.
– بۇل باستاما مەنىڭ 50-جىلدىق مەرەيتويىمنان باستالىپ كەتتى, سول كەزدەن بەرى ەلىمىزدىڭ تۇكپىر-تۇكپىرىندەگى كاسىپكەرلەر باستامانى قولداپ, دەمەۋشىلىك بىلدىرۋگە نيەت تانىتتى. كىم جاسىرعان ەسەبىمدى شىعارسا 100 دوللار الادى, ءبىر جىلدا شىقپاسا, كەلەسى جىلى سىياقى قۇنى 200 دوللارعا وسەدى. جىلدان جىلعا سىياقى ارتا بەرەدى. ازىرشە, مەنىڭ جاسىرعان ءۇش جىلدىق ەسەبىمدى شىعارعان ءبىر شاكىرتىم بار, ول 300 دوللارعا يە بولدى. ال, 100 دوللار ۇتقان بالالار سوڭعى ون ءۇش جىلدىڭ ىشىندە وتە كوپ. 50 جىلدىق مەرەيتويىمنان بەرى, ون ءۇش جىل قاتارىنان جاسىرىپ كەلە جاتقان ەسەبىمدە بار, ونىڭ بيىل سىياقى قۇنى 1300 دوللار بولدى. ازىرشە ەشكىم شىعارعان جوق. ءار جىل سايىن ەسەپكە 100 دوللاردان قوسىلىپ وتىرادى. بۇل مەن ۇسىنعان ەرەكشە نوۋ-حاۋ, – دەيدى اسقار جۇمادىلداەۆ.
ايناش ەسالي,
«Egemen Qazaqstan»
الماتى
