«ەڭ الدىمەن, بارشاڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن! ءاز-ناۋرىز رۋحاني باي مۇرامىزدىڭ جارقىن سيمۆولىنا اينالدى. ۇرپاقتان-ۇرپاققا جالعاسىپ كەلە جاتقان بۇل مەرەكە – حالىق بىرلىگىنىڭ نەگىزى», دەدى مەملەكەت باسشىسى كاسىم-جومارت توقاەۆ.
ول ءوزىنىڭ تۇركى دۇنيەسىنىڭ رۋحاني استاناسى – تۇركىستانعا تاعزىم ەتۋ ءۇشىن ارنايى كەلگەنىن ايتتى. سونداي-اق وڭىردەگىلەرمەن جۇزدەسكەنىنە قۋانىشتى ەكەنىن جەتكىزدى.
«تۇركىستان – ەلىمىزدىڭ التىن بەسىگى, مادەنيەتىمىز بەن رۋحانياتىمىزدىڭ سيمۆولى جانە بۇكىل حالقىمىزدىڭ بويتۇمارى. ەلباسىنىڭ بۇل قالاعا ەرەكشە مارتەبە بەرۋ تۋرالى شەشىمى كەزدەيسوق ەمەس. ەجەلگى تۇركىستاننىڭ جاڭعىرۋى جانە جاڭارۋى دامۋ جولىمىزدىڭ دۇرىستىعىن كورسەتەدى. پرەزيدەنت رەتىندەگى العاشقى ساپارىمنىڭ تۇركىستاننان باستالعانى مەن ءۇشىن اسا ماڭىزدى», دەدى ول.
مەملەكەت باسشىسى قوعامداعى ادىلەتتىلىك اتقارۋشى بيلىككە بايلانىستى ەكەنىن اتاپ ءوتتى.
«ۇكىمەتتىڭ, مينيسترلەردىڭ, بارلىق دەڭگەيدەگى اكىمدەردىڭ, پوليتسيانىڭ, پروكۋراتۋرانىڭ, سوتتاردىڭ باستى ماقساتى – ازاماتتاردىڭ قۇقىعىن قورعاۋ. مۇنداعى مەنىڭ باستى ۇستانىمىم انىق, ايقىن. بۇل – زاڭنىڭ ۇستەمدىگى. زاڭنان جوعارى ەشنارسە بولماۋى كەرەك. ورتالىق جانە جەرگىلىكتى ورگانداردىڭ باسشىلارىنا قاتىستى ورىندى شاعىم تۇسكەن جاعدايدا ولاردىڭ ءبارى جازالاناتىن بولادى», دەدى قاسىم-جومارت توقاەۆ.
ول ءوزىنىڭ پرەزيدەنت رەتىندەگى نەگىزگى ۇستانىمى ساباقتاستىق ەكەنىن, ەلباسىنىڭ ساياساتىن جالعاستىراتىنىن ايتتى.
مەملەكەت باسشىسى ساباقتاستىق جوق جەردە تەك داعدارىس, ءتىپتى جانجال, قاقتىعىس قانا بولاتىنىن جەتكىزدى.
«ەكىنشى ۇستانىمىم, بۇل – ادىلەتتىلىك. ادىلەتتىلىك جوق قوعام ەشقاشان دامىمايدى. تەك قانا قيىنشىلىق, تاۋقىمەت, قۇلدىراۋ بولادى.
ءۇشىنشى ۇستانىمىم – ىلگەرىلەۋ. قازاقستان باسەكەلەستىككە تولى الەمدە تەك قانا العا جىلجۋدى كوزدەيدى», دەدى ول.
