بىراق بۇل قويىلىم كورەرمەندەرگە ماعىناسىز, جىرتاڭ كۇلكى بولعان جوق, ء«ازىلدىڭ ءتۇبى – ءزىل» دەگەندەي, ساحنادا ايتىلعان ءازىل-قالجىڭنىڭ, سيۋجەتتىڭ استارىندا بۇگىنگى كۇننىڭ الەۋمەتتىك ماسەلەسى دە جاتىر ەدى. ستسەناري اۆتورى ابىلاي ماۋدان مەن رەجيسسەرلەر ءاليا بايماحان, دوس قۇداش جەڭىل قالجىڭداي وتىرىپ, باس كەيىپكەر ناۋرىزباي سەكىلدى قىرىققا دەيىن ۇيلەنبەي ءجۇرىپ الاتىن بوزبالالاردىڭ, ۇيىندە وتىرىپ قارتاياتىن كارى قىزداردىڭ ماسەلەسىن كوتەرەدى. ساحنالىق قويىلىم وتباسىلىق قۇندىلىقتاردىڭ قۇلدىراپ بارا جاتقاندىعىن, سونىمەن قاتار حالقىمىزبەن تۋا ءبىتتى جاساسىپ كەلە جاتقان كەيبىر داستۇرلەرىمىزدىڭ دە بوياۋى كومەسكىلەنگەنىن كوتەرەدى. وتباسى ينستيتۋتىندا جەڭگەلەر ءرولىنىڭ ماڭىزى باسەڭدەگەنىنە دە قازاقتىڭ بويى ۇيرەنگەلى قاشان؟
«باستاڭعىدا» وتىرىپ قانشا كۇلسەم, سونشا ويعا قالدىم. راسىندا, قازىر ۇيلەنبەيتىن, سول ءجۇرىسىن ۇيات سانامايتىن, ۋايىم ەتپەيتىن ازاماتتار جەتەرلىك. نەكەگە تۇرماي, نەكەسىن قيدىرماي ازاماتتىق نەكەمەن تۇرا بەرەتىندەر قانشاما؟ قىزدارىمىزدىڭ قالىپ قوياتىنى دا ازاماتتاردىڭ وسىلاي ارزانداۋىنان عوي, وعان قالاي قارسى تۇرۋعا بولادى؟ – دەيدى كورەرمەن گۇلسىم ساداقباەۆا.
قوستاناي تەاترىندا «باستاڭعى» وسىمەن ءۇشىنشى جىل قويىلىپ كەلەدى. العاشقى جىلدارى مۇنى تەك جاستار عانا ۇيىمداستىرىپ ەدى. بيىل تەاتردىڭ شاحاربانۋ ەسەنعۇلوۆا, قونىسبەك بەگايداروۆ سەكىلدى اعا بۋىن اكتەرلەرى دە قاتىسىپتى. سۇربويداق ناۋرىزبايدىڭ ءرولىن جۇماتاي احمەتحان, جەڭگەسىنىڭ ءرولىن زامزاگۇل بەگايداروۆا الىپ شىقتى.
ءنازيرا جارىمبەت,
«ەگەمەن قازاقستان»
قوستاناي
