بيىلعى ناۋرىز مەرەكەسىنىڭ ەرەكشەلىگى سول, قالانىڭ قاق ورتاسىنداعى الاڭعا ەلباسىنىڭ « ۇلى دالانىڭ جەتى قىرى» ماقالاسى اياسىندا الاڭعا 7 كيىز ءۇي تىگىلدى. ء«بىزدىڭ ۋنيۆەرسيتەتتىڭ كيىز ءۇيى ۇلى اباي ەسىمىن ۇلىقتاۋعا ارنالدى. وسى جەرگە اقىننىڭ سەمەيدەگى مۋزەيىندە تۇرعان ورىندىعى ماكەت تۇرىندە كەلۋشىلەر نازارىنا ۇسىنىلدى. دانىشپاننىڭ جازعان كىتاپتارى دا سورەگە قويىلدى. ءارتۇرلى ۇلتتىق جادىگەرلەرىمىز دە كيىز ءۇي تورىنەن ورىن الدى. بيىل اقپان ايىندا پولشانىڭ سۆەچە قالاسىنداعى لينگۆيستيكالىق-تەحنيكالىق ۋنيۆەرسيتەتى بازاسىندا اباي اتىنداعى جاستاردىڭ عىلىمي-ءبىلىم بەرۋ ورتالىعىن اشقان بولاتىنبىز. مۇنداعى ماقساتىمىز – قازاقستاندىق جانە پولياك جاستارىن اباي شىعارمالارىمەن, اقىن تۋعان توپىراقپەن, شىعىس قازاقستاننىڭ وزگە دە داڭقتى تۇلعالارىمەن تانىستىرۋ ەدى. ەرەكشە ايتقىمىز كەلەتىنى, ەراسىل مۇحامبەتقاليەۆ دەگەن ستۋدەنتىمىز پولشادا اشىلعان وسى ورتالىقتا «50+50» دەگەن كىتابىن شىعاردى. ونداعى اقپاراتتىڭ 50-ءى قازاقستانعا, قالعانى پولشاعا ارنالعان», - دەيدى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى مۇحتار ادىلبەك ۇلى.
ازامات قاسىم,
«Egemen Qazaqstan»
وسكەمەن
