تاڭەرتەمەن قالا اكىمى جاقسىلىق ومار باستاعان, وقالى شاپان كيگەن اقساقالدار قوستاعان شاعىن توپ شاھار ىرگەسىندەگى شەشەك اسۋى ماڭىنداعى بۇلاق باسىنا جينالدى. قۇر جينالعان جوق, بابالاردان قالعان باعلان ءداستۇرىمىز «بۇلاق كوزىن اشۋ» ءراسىمىن قايتا جانداندىرىپ, قولدارىنا كۇرەك الىپ, تۇمانىڭ كوزىن اشتى. بۇلاق باسىنا جيىلعان جۇرت اقساقالدىڭ بەرگەن باتاسىنان كەيىن تۇما سۋىنان ءدام تاتتى. «بابالارىمىز ءار كوكتەم سايىن ناۋرىز مەرەكەسىندە جابىلىپ قالعان بۇلاق كوزدەرىن اشىپ, سۋىنان ءدام تاتقان. حالقىمىزدا «بۇلاق كورسەڭ, كوزىن اش» دەگەن تاماشا ءسوز بار. وسى ءداستۇردى جىل سايىن جالعاستىرىپ, جابىلىپ قالعان بۇلاق كوزدەرىن اشىپ وتىرۋ ويىمىزدا بار. بۇلاقتىڭ ماڭىن اباتتاندىرىپ, ورىندىقتار ورناتامىز», - دەيدى بۇلاق باسىنا ۇلتتىق كيىممەن كەلگەن قالا اكىمى ج.ومار.
وبلىس ورتالىعىندا ناۋرىز مەرەكەسى جىل سايىن تويلانعانىمەن «بۇلاق كوزىن اشۋ» ءراسىمى كوپتەن بەرى وتكىزىلمەگەنىن ايتادى اقساقالدار. «وسكەمەندە عانا ەمەس, وبلىستا وسىنداي ءراسىم جاسالدى دەگەندى ەستىمەپپىن. بۇل – جاقسى ءۇردىس. يگى باستاما. ءوڭىرىمىزدىڭ ءار ايماعىندا قولداۋ تابادى دەپ ويلايمىن», - دەيدى وسكەمەن قالالىق اقساقالدار كەڭەسىنىڭ توراعاسى, كۇرشىم, تارباعاتاي, كاتونقاراعاي اۋداندارىنىڭ قۇرمەتتى ازاماتى سايلاۋحان اۋحاديەۆ.
ازامات قاسىم,
Egemen Qazaqstan»
وسكەمەن
