قىسقا باعدارلامادا ءۇشىنشى ورىندى يەلەنگەن ەليزابەت تۇرسىنباەۆا جارىستىڭ شەشۋشى كۇنى دە تاماشا ونەر كورسەتىپ, 224.76 ۇپايعا يەلىك ەتتى. وسى كورسەتكىشىنىڭ ارقاسىندا قازاق قىزى كۇمىس مەدالدى يەلەندى. وسى سپورت ءتۇرىن سەرىك ەتكەن قازاقستاننىڭ بىردە-ءبىر ارۋى الەم چەمپيوناتىندا بۇرىن-سوڭدى جەڭىس تۇعىرىنا كوتەرىلمەگەن ەدى. مىنە, سول كوشتى 19 جاستاعى ەليزابەت باستادى.
كۇللى قازاقستان حالقىن, الاش جۇرتىن وسى تاريحي تابىسپەن قۇتتىقتايمىز! وسىنداي اسا دارىندى سۇلۋدى ومىرگە جانە سپورتتىڭ سيقىرلى الەمىنە اكەلىپ, وسى سوقپاقتا بارىنشا قولداۋ كورسەتكەن اكەسى بايتاق پەن اناسى پاديشاحانعا مىڭ دا ءبىر العىس! ەليزابەت تۇرسىنباەۆانى كەلەشەكتە بۇدان دا بيىك بەلەستەردەن كورەيىك!
ال الەم چەمپيونى اتاعى رەسەيدىڭ اتاقتى سپورتشىسى, وليمپيادا جانە ەۋروپا چەمپيونى, 16 جاستاعى الينا زاگيتوۆاعا بۇيىردى. ءۇشىنشى ورىندا – ەكى دۇركىن الەم جانە ەۋروپا چەمپيونى, وليمپيا ويىندارىنىڭ كۇمىس جۇلدەگەرى ەۆگەنيا مەدۆەدەۆا.
عالىم سۇلەيمەن,
«Egemen Qazaqstan»
