بۇل تۇڭعىش پرەزيدەنتتىڭ جاس كەزىنەن دانا قارتتارمەن كوپ اڭگىمەلەسكەنىنىڭ بەلگىسى بولسا كەرەك. ءارى قازىرگى زاماندا ءتىل بايلىعىن قالىپتاسىرىپ, ساقتاپ قالۋ ءۇشىن كوركەم كىتاپتى كوپ وقۋ كەرەك. دەمەك, ەلباسىنىڭ كىتاپتى كوپ وقيتىنى, ونىڭ ىشىندە قازاقتىڭ كونە ءتىلىنىڭ قايماعى ساقتالعان شىعارمالاردى ۇنەمى وقيتىنى اڭعارىلادى. بۇل جەردە ادامنىڭ قانى مەن تەگىنە قاتىستى دا دۇنيە بار. قانداعى قازاقىلىق, تەكتەگى ۇلتتىق كود, تىرشىلىكتەگى ۇلتجاندىلىق قانشا جەردەن جاھاندانۋ مەن وركەنيەتىنىڭ سوققىسىن دارىتقان ەمەس. ءتىپتى, جوعارى ەليتا اراسىندا اقسۇيەكتەر مادەنيەتىنىڭ ەكسپانتسياسىنا جۇتىلىپ, ءتىلىن جوعالتىپ العان تۇلعالاردىڭ بار ەكەنىن كورىپ جۇرگەنىمىز جاسىرىن ەمەس. ەلباسىنىڭ اراگىدىكتەگى سوزىنەن ەستە قالعان ءبىر-ەكى مىسالىن ايتايىن. ماسەلەن, نۇرەكەڭ ءبىر جىلى جۇرتپەن اڭىگمەلەسكەندە «كارتوپيا» دەگەن اتاۋ مەن «ەندىگى جىلى» دەگەن ءسوز تىركەسىن قولداندى. اۋەلگىسىن ءبىزدىڭ قازاق كونەدەن بەرى قولدانىپ كەلگەن «جۋا», ميا»... دەگەندەرگە ۇقساتىپ اتاعان-اۋ, شاماسى, ءبىزدىڭ اۋىل كارى, جاس دەمەي, وسىلاي «كارتوپيا» دەيتىن. ونى ءبىز قازاقشا اتاۋ دەپ ۇعاتىنبىز. سويتسەك, مۇنىڭ اتى – «كارتوپ» ەكەن. بىراق, «كارتوپيا» دەگەن اتاۋ ەتەنە جاقىن. ال, «ەندىگى جىلى» دەگەن ءسوز تىركەسىن ەلباسىنان وزگە باسشىنىڭ اۋىزىنان ەستىمەپپىن. ونىڭ ەسەسىنە «كەلەر جىلى» دەگەن ءسوز تىركەسىن ءجيى ەستيمىز. ءبىر ءسوزدىڭ ءوزى ءبىر ادامدى تۇسىنۋگە ءبىرشاما ىقپال ەتەدى.
ەلباسىنىڭ وسى قازاقىلىعى, قازاقجاندىلىعى بولۋى كەرەك, پرەزيدەنت بولىسىمەن الەمگە تارىداي تاراعان قازاقتاردىڭ باسىن قوسىپ, الماتىدا دۇنيەجۇزى قازاقتارىنىڭ العاشقى قۇرىلتايىن وتكىزدى. بۇل – سوناۋ الاشوردا تۇسىندا وتكەن مۇسىلماندار قۇرىلتايىنان كەيىن نە ءبىر زوبالاڭدى باستان كەشىرىپ, ەرىكسىز ەلىنەن قاشۋعا ءماجبۇر بولعان قازاقتاردىڭ قايتا ءبىر تۇگەندەلۋى ەدى. مۇنىڭ ساياسي ۇلكەن قىرلارىن ايتپاساق تا, بۇل قۇرىلتايدىڭ ءوتۋى – الاشوردالىقتاردىڭ ارمانداعان ارمانىنىڭ ورىندالۋى ەكەندىگىن جانە دە قازاقتى توزدىرۋعا سەبەپشى بولعان قارسى كۇشتەرگە بەرگەن اۋىر سوققى, زور جەڭىس ەكەنىن ايتۋعا ءتيىستىمىز.
1998 جىلى موڭعوليانىڭ ەكىنشى پرەزيدەنتى باگاباندي ءبىزدىڭ ەلگە رەسمي ساپارمەن كەلدى. قابىلداۋدا ءبىز دە بولعانبىز. كوزبەن كورىپ, قۇلاقپەن ەستىدىك. سوندا دەلەگاتسيا قۇرامىندا موڭعوليادا تۇراتىن, مينيستر دارەجەسىنە كوتەرىلگەن قانداستارىمىز دا ءجۇردى. نۇرەكەڭ ءسوز اراسىندا الگى قازاق باۋىرلارىنا قاراتا «كانە, باۋىرلارىم, جاعدايلارىڭ قالاي؟ ەلگە قاشان ورالاسىڭدار؟ سەندەردى تەزىرەك كەلسىن دەپ, استانانى دا سەندەرگە جاقىنداتىپ قويدىم» دەدى. ەلباسىنىڭ رەسمي قابىلداۋدا وسىلايشا, قازاقتاردى ەرەكشە باۋىر تارتىپ, قازاقشا سويلەگەنىنە موڭعول جۋرناليستەر تاڭ-تاماشا بولدى. «نازارباەۆ يۋ حەلەۆ؟» («نازارباەۆ نەنى ايتتى؟») دەپ بىزدەن سۇرادى. ءبىز ءبىر ءسوزىن بۇكپەستەن تۇگەل اۋدارىپ بەردىك. ولار «نازارباەۆ ەرىكسىز الەمدى مويىنداتار كورەگەن باسشى ەكەن!..» دەسىپ, تاڭدانىستى. مىنە, ءبىز بىلەتىن ەلباسى وسىنداي وسىنداي ادام.
ەندى استانا قالاسىنىڭ اتىن نۇر – سۇلتان اتاۋىنا اۋىستىرۋعا قاتىستى ءبىر ءسوز: ءبىز ءوزى قىزىق ويلايتىن حالىقپىز عوي, قانشا جىل ەجەلگى ەلدى مەكەندەرىمىزدىڭ, ۇلكەن قالالارىمىزدىڭ لەنين, كرۋپسكايا, كالينين... سياقتى ادامداردىڭ اتىندا بولعانىن تەز ۇمىتامىز. ال ۇلت ارمانىن ۇلدىڭ ۇلدىڭ قۇرمەتىنە باس قالانى اتاۋدان نەگە ۇركەمىز؟!
جۇكەل حاماي ۇلى,
اقىن, تۇرىك تىلدەس حالىقتار پوەزيا فەستيۆالىنىڭ لاۋرەاتى,
تالدىقورعان قالاسى
