دۋماندى مەيرامعا مادەنيەت جانە سپورت ءمينيسترى ارىستانبەك مۇحامەدي ۇلى قاتىستى.
ە.برۋسيلوۆسكيدىڭ «قىز جىبەك» ۇلتتىق وپەرا جاۋھارىنان شەگەنىڭ شۋماقتارى تەاتر الاڭىنا ايرىقشا كوڭىل-كۇي سىيلادى. كۇيمەگە جەگىلگەن اتتارمەن مەرەكەلىك دۋمانعا قىدىر اتا كەلىپ, بالالارعا سىيلىق تاراتتى.
وسىلايشا, بايىپپەن, مەرەكە تەاتر عيماراتىنا اۋىستى: ۇلتتىق ستيلدە بەزەندىرىلگەن ءمارمار زالى ءسان-سالتاناتى كەلىسكەن كيىز ۇيگە اينالعان, ىشىندە مەرەكەلىك داستارحان جايىلعان. مەيرام قاتىسۋشىلارىنا تەرمە, سالت-داستۇرلەر, حالىق اندەرى, دومبىراشىلاردىڭ ونەرىنەن تۇرعان مازمۇندى باعدارلاما ۇسىنىلدى جانە تۇساۋ كەسۋ سالت-ءداستۇرى كورسەتىلدى. وعان «وسكار» سىيلىعىنىڭ يەگەرى فرانكا سكۋارچاپينو (يتاليا) جانە قر مادەنيەت جانە سپورت ءمينيسترى ارىستانبەك مۇحامەدي ۇلى قاتىستى. سونىمەن بىرگە, مينيسترلىك باسشىسى سۇلۋ ارۋلارعا كوكتەمنىڭ سيمۆولى – بايشەشەكتەردى سىيعا تارتتى.
- بارلىق قازاقستاندىقتاردى كوكتەمنىڭ جاڭعىرۋ بەلگىسى – ناۋرىز مەيرامىمەن قۇتتىقتايمىن. ءبىز, ونىڭ نەگىزىنەن بالالارعا ارنالعانىن قالايمىز. ەلىمىزدىڭ تەاترلارى مەن بۇكىل مادەني مەكەمەلەرى وسى كۇنى قايىرىمدىلىق كونتسەرتتەر وتكىزۋدە. وعان بالالار ءۇيىنىڭ تاربيەلەنۋشىلەرىن, جاعدايى تومەن جانە كوپبالالى وتباسىلاردان بالالار شاقىرىپ, شىعارماشىلىق تارتۋلارىمەن قوسا ۇلتتىق تاعامداردان تۇراتىن ءتاتتى سىيلىقتار سىيلاۋدا. ءبىز بارلىعىن بۇلدىرشىندەرىمىزگە ارنايمىز, سەبەبى – ءومىرىمىزدىڭ باستى ءمانى سولاردا, - دەدى ارىستانبەك مۇحامەدي ۇلى.
مەرەكەلىك دۋمان سوڭىندا بارلىعى ۇلكەن زالعا شاقىرىلدى, بۇل جەردە ۇجىم «قىز جىبەك» ۇلتتىق سپەكتاكلىنەن كورىنىستى ساحنالادى.
ناۋرىزدى جاڭا فورماتتا مەرەكەلەۋ ەستافەتاسىن «استانا وپەرا» تەاترىنان قازاقستاننىڭ وزگە دە شىعارماشىلىق ۇجىمدارى قابىل الدى.
ەسكە سالار بولساق, قازاقستاندا ناۋرىز مەيرامىن جاڭا فورماتتا تويلاۋدى قر مادەنيەت جانە سپورت ءمينيسترى ارىستانبەك مۇحامەدي ۇلى ۇسىنعان ەدى. ۆەدومستۆو باسشىسى ناۋرىز فورماتىنىڭ ەرەكشە ماڭىزدىلىعىن اتاپ ءوتتى, ياعني ونىڭ نەگىزگى يدەياسى – قازاقستان حالقىنىڭ ۇلتتىق سانا-سەزىمىن اسقاقتاتاتىن جاستاردى تاربيەلەۋ. مينيستر وتانداستارىمىزدى ەجەلدەن مەرەكەگە ءتان جالپى ادامزاتتىق قۇندىلىقتاردى قايتا جاڭعىرتىپ, اياسى تار فولكلورلىق-ەتنوگرافيالىق شەگىنەن شىعۋعا جانە جالپى ۇلتتىق مەرەكە دەڭگەيىنە دەيىن كوتەرۋگە شاقىردى.
