اتالعان فيتو-باردا الداعى ۋاقىتتا كەلۋشىلەرگە ارنالىپ ەمدىك وسىمدىكتەردەن دايىندالعان ءتۇرلى تاعامدار مەن سۋسىندار, دەنساۋلىقتى جاقسارتاتىن ديەتالىق ونىمدەر ۇسىنىلادى. سونىمەن قاتار, ورتالىقتىڭ نەگىزگى ماقساتى سالاۋاتتى ءومىر سالتىن ۇستانۋدى ناسيحاتتاۋ بولىپ تابىلادى. بۇل ورايدا جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ فيتو-بار ەمدەۋ-ساۋىقتىرۋ ورتالىعىنىڭ ەرەكشەلىگى مەن پايداسىنا توقتالىپ, حالىق دەنساۋلىعىن ارتتىرۋعا زور ۇلەس قوساتىنىن ايتتى.
اتالعان جوبانى وبلىس اكىمىنىڭ يدەياسىمەن جەكە كاسىپكەر قادىرحان ابدۋللاەۆ قولعا الىپ, جۇرگىزىپ كەلەدى. بۇل جەردە ەلىمىزدىڭ ءار تۇكپىرىندەگى تاۋلى ايماقتاردان تەرىلگەن 100-دەن استام ءشوپ تۇرلەرىنىڭ ەمدىك قاسيەتتەرى پايدالانىلادى. ورتالىق عيماراتىنىڭ اۋماعى 700 شارشى مەتردى قۇراسا, ماڭىندا جالپى اۋماعى 1,8 گەكتاردى قۇرايتىن ساياباق ورنالاسقان. مۇندا بارلىعى 30-35 ادام جۇمىس اتقارادى. ولاردىڭ قاتارىندا شوپپەن ەمدەيتىن, پەدياتر, تەراپەۆت دارىگەرلەرى بار. ورتالىقتا تاۋلىگىنە 150-200 ادامدى قابىلداۋعا مۇمكىندىك جاسالعان. سونىمەن قاتار, مۇندا نەگىزىنەن ەمدىك شوپتەردەن دايىندالعان شايلارمەن ەمدەۋ شارالارى جۇرگىزىلمەك. ال تاعامدار مازىرىندە ديەتالىق ونىمدەرگە باسىمدىق بەرىلەدى. ەمدىك شوپتەردى پايدالانۋدا «زەردە-فيتو» جشس-مەن بىرلەسىپ ەڭبەك ەتەتىن بولادى.
حاميت ەسامان,
ەگەمەن قازاقستان
جامبىل وبلىسى
