مەرەكەلى كۇننىڭ قارساڭىندا جىل سايىن ۇيىمداستىرىلاتىن ءداستۇرلى ديپلوماتيالىق قابىلداۋعا يۋنەسكو باسشىلىعى مەن مۇشە مەملەكەتتەردىڭ ۇيىم جانىنداعى تۇراقتى وكىلدىكتەرى, عىلىمي جانە شىعارماشىلىق ورتالاردىڭ, ناۋرىزدى اتاپ وتەتىن حالىقتاردىڭ فرانتسياداعى دياسپورالارىنىڭ وكىلدەرى قاتىستى.
ءىس-شاراعا يۋنەسكو-نىڭ باس ديرەكتورى ودرە ازۋلە قاتىسىپ, بارشانى ناۋرىز مەرەكەسىمەن جىلى قۇتتىقتادى جانە بۇل تاماشا مەيرام كۇللى ادامزاتتىڭ ورتاق مادەني قۇندىلىعى ەكەندىگىن اتاپ ءوتتى.
ءىس-شاراعا جينالعانداردىڭ نازارىنا ناۋرىزدى مەرەكەلەيتىن ەلدەردىڭ ءداستۇرلى ونەرلەرى مەن ۇلتتىق تاعامدارى ۇسىنىلدى.
«فرانتسياداعى قازاقستان دوستارىنىڭ جاستار قاۋىمداستىعىنا» (Jeune Alliance des Amis du Kazakhstan en France) مۇشە وتانداستارىمىز قازاقتىڭ ءداستۇرلى بي ونەرىمەن تامساندىردى. ال قازاق داستارحانىنان قوناقتار باۋىرساق, قازى, مانتى, قۇرت, جەنت جانە, البەتتە, ناۋرىز كوجەدەن ءدام تاتتى.
ەستەرىڭىزگە سالساق, بىرىككەن ۇلتتار ۇيىمىنىڭ باس اسسامبلەياسى 2010 جىلى قابىلداعان 64/253 قارارىنا سايكەس جىل سايىن 21 ناۋرىزدا بۇكىل الەم حالىقارالىق ناۋرىز كۇنىن اتاپ وتەدى. ال يۋنەسكو-دا ناۋرىزدى مەرەكەلەۋ ءداستۇرى اۋعانستان, ازەربايجان, يراك, يران, قازاقستان, قىرعىزستان, وزبەكستان, پاكىستان, تاجىكستان, تۇركيا, تۇرىكمەنستان جانە ءۇندىستاننىڭ ورتاق ۇسىنىسىمەن ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزىلدى.
