«كەشە ناۋرىزدىڭ 19-ى كۇنى بارشا الەم جۇرتشىلىعى اسا ماڭىزدى تاريحي وقيعاعا كۋا بولدى. قازاق مەملەكەتتىلىگىنىڭ نەگىزىن قالاۋشى, ۇلى تۇلعا, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ ءوز ەركىمەن مەملەكەت باسشىسى وكىلەتتىگىن تاپسىردى. ەلباسىنىڭ بۇل جىگەرلى شەشىمى ونىڭ جاھاندىق دەڭگەيدەگى جانە تاريحي اعىمداعى ساياسي قايراتكەر رەتىندە ۇلىلىعىن كورسەتتى» دەدى قاسىم-جومارت توقاەۆ.
ول ءبىزدىڭ قول جەتكىزگەن جەتىستىكتەرىمىز, قازاقستان رەسپۋبليكاسىنىڭ كيەلى تاۋەلسىزدىگى ن.نازارباەۆتىڭ قاجىرلى ەڭبەگىنىڭ ارقاسىندا مۇمكىن بولعانىن ايتتى. ەلباسى كەڭەس وداعىنىڭ كۇيرەگەن قالدىقتارى عانا قالعان كۇردەلى گەوساياسي جاعدايدا جاڭا مەملەكەتتىڭ ىرگەسىن قالادى جانە ونىڭ كوشىن باستاعانىن باسا ايتتى.
«كوپتەگەن تەرىس بولجامعا قاراماستان مەملەكەتتى بارشا الەم مويىنداعان تابىستارعا جەتكىزدى. دۇنيەجۇزى كارتاسىندا قارقىندى دامۋ, دەموكراتيا, كەلىسىم مەن بەيبىت ءومىردىڭ شىنايى سيمۆولىنا اينالعان مەملەكەت پايدا بولدى» دەدى ول.
