«كونستيتۋتسيانىڭ 42-بابىنىڭ 3-تارماعىنا سايكەس رەسپۋبليكا پرەزيدەنتىنىڭ وكىلەتتىگى جاڭادان سايلانعان رەسپۋبليكا پرەزيدەنتى قىزمەتىنە كىرىسكەن كەزدەن باستاپ, سونداي-اق پرەزيدەنت قىزمەتىنەن مەرزىمىنەن بۇرىن بوساتىلعان جاعدايدا توقتاتىلادى» دەلىنگەن حابارلامادا.
ورتالىق سايلاۋ كوميسسياسى اتاپ وتكەندەي, كونستيتۋتسيالىق كەڭەس 2019 جىلعى 15 اقپانداعى قاۋلىسىمەن قازاقستان پرەزيدەنتىنىڭ كونستيتۋتسيالىق مارتەبەسىنەن ونىڭ ءوز ەركى بويىنشا وكىلەتتىگىن توقتاتۋ قۇقىعى تۋىندايدى, ول مەملەكەت باسشىسىنىڭ وكىلەتتىگىن مەرزىمىنەن بۇرىن توقتاتۋعا دەربەس نەگىز بولىپ تابىلادى. ءتيىستى قاۋلى قابىلداندى.
«كونستيتۋتسيانىڭ 48-بابىنا سايكەس قازاقستان رەسپۋبليكاسىنىڭ پرەزيدەنتى قىزمەتىنەن مەرزىمىنەن بۇرىن بوساعان جاعدايدا قازاقستان رەسپۋبليكاسى پرەزيدەنتىنىڭ وكىلەتتىگى قالعان مەرزىمگە پارلامەنت سەناتىنىڭ توراعاسىنا كوشەدى. وزىنە رەسپۋبليكا پرەزيدەنتىنىڭ وكىلەتتىگىن قابىلداعان تۇلعا تيىسىنشە سەنات توراعاسىنىڭ وكىلەتتىگىن دوعارادى» دەلىنگەن ورتالىق سايلاۋ كوميسسياسىنىڭ حابارىندا.
تيىسىنشە, № 885 جارلىقتىڭ 2-تارماعىمەن پرەزيدەنتتىڭ وكىلەتتىگى قالعان مەرزىمگە سەنات توراعاسى قاسىم-جومارت كەمەل ۇلى توقاەۆقا كوشتى.
وسىعان بايلانىستى كونستيتۋتسيانىڭ 48-بابىنىڭ 1-تارماعىن جانە «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» نورمالاردى باسشىلىققا الا وتىرىپ, وسك سەنات توراعاسىنىڭ وكىلەتتىگىن توقتاتۋعا اكەلەتىن نەگىزدىڭ تۋىنداعانى تۋرالى قاۋلى قابىلداپ, پارلامەنت سەناتىنا ءتيىستى ۇسىنىم ەنگىزدى.
ورتالىق سايلاۋ كوميسسياسى قابىلدانعان قاۋلىلاردىڭ قازاقستان رەسپۋبليكاسىنىڭ كونستيتۋتسياسىنا, «قازاقستان رەسپۋبليكاسىنىڭ پرەزيدەنتى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا سايكەس, «قازاقستان رەسپۋبليكاسى پرەزيدەنتىنىڭ وكىلەتتىگىن اتقارۋ تۋرالى» قازاقستان رەسپۋبليكاسى پرەزيدەنتىنىڭ 2019 جىلعى 19 ناۋرىزداعى № 887 جارلىعى نەگىزىندە قابىلدانعانىن ايتتى.
