سۇلۋلىعى مەن اقىلى, ونەرى مەن ورىلگەن ءورىمى كەلىسكەن ارۋلار 3 كەزەڭدە سىنعا ءتۇستى: شىعارماشىلىق, زياتكەرلىك جانە وتاندىق ديزاينەرلەردىڭ كيىمىمەن ءسان قويىلىمىن كورسەتۋ.
بيىل بايقاۋعا ءار وبلىستان 18 قىز قاتىستى. سول ارۋلاردىڭ قاتارىنان «قازاق ارۋى-2019» اتاعىنا ونەرىمەن دە, ولەڭىمەن ەرەكشەلەنگەن پاۆلودارلىق ءسانيا تەمىرحانوۆا يە بولدى. ءبىرىنشى ورىندى قاراعاندىلىق ايحانىم ورىنبەكوۆا ەنشىلەسە, ال ەكىنشى ورىندى استانانىڭ نامىسىن قورعاعان اننا ۆايدۋروۆا الدى. ال ءۇشىنشى ورىن پاۆلودار وبلىسىنىڭ تاعى ءبىر قاتىسۋشىسى سايا تۇرسىنبەكوۆاعا بۇيىردى.
بايقاۋ كەزىندە قاتىسۋشىلار وزدەرىنىڭ شىعارماشىلىق قابىلەتتەرىن كورسەتتى. جەڭىمپاز اتانعان ءسانيا تەمىرحانوۆا اقيىق اقىن مۇقاعالي ماقاتاەۆ پەن اباي قۇنانباەۆتىڭ ولەڭدەرىن مانەرلەپ وقۋ بويىنشا جارىستى. جۇرگىزۋشىلەر وعان كىتاپتىڭ كەز كەلگەن جەرىنەن ولەڭنىڭ باسىن وقىپ, جالعاستىرۋىن تالاپ ەتتى. ءسانيا ءتىپتى كورەرمەندەر اراسىنان وقىلعان ولەڭدەردى دە مۇدىرمەي جالعاستىرىپ اكەتتى. سونىمەن قاتار كەش بارىسىندا اۋەلەتىپ ءان سالىپ, مىڭ بۇرالىپ بيلەگەن ارۋلار دا بولدى.
قىزدارعا ءوزىنىڭ ءادىل باعاسىن قازاقستاندىق شوۋ-بيزنەس وكىلدەرى ەرىك جولجاقسىنوۆ, بايان الاگوزوۆا, قاراقات ءابىلدينا, دينارا ءساتجان, ايگۇل مۇكەي, بىرعانىم ءايتىموۆا بەردى.
كەش سوڭىندا «قازاق ارۋى-2018» اتانعان ءنابيرا راقىمجانقىزى ءوزىنىڭ ءتاجىن «قازاق ارۋى-2019» تيتۋلىن يەلەنگەن ءسانيا تەمىرحانوۆاعا تابىستادى.
