راسىندا, بۇل جۇرت كۇتپەگەن توسىن شەشىم بولدى. «بۇل قالاي بولدى؟ جۇرەگىمىز اۋىرىپ كەتتى. شىنىمەن ەندى پرەزيدەنت بولماي ما؟» دەپ ماعان اقساقالدار الاڭداۋشىلىعىن ءبىلدىرىپ, حابارلاسىپ جاتىر. شىنىمەن دە, ءبارىمىزدىڭ بويىمىزدا قيماستىق سەزىم بار. ول كىسىنىڭ ەلىمىزگە سىڭىرگەن ەڭبەگىن سوزبەن جەتكىزۋ مۇمكىن ەمەس شىعار. نەبارى 30 جىلدىڭ ار جاق, بەر جاعىندا قازاقستاندى تورتكۇل دۇنيەگە تانىتتى. ەلباسىنىڭ ەلىمىزگە, جەرىمىزگە سىڭىرگەن ەڭبەگىن, مەملەكەتتى اياعىنان قاز تۇرعىزۋعا قوسقان ۇلەسىن ەشبىر تۇلعامەن سالىستىرۋعا كەلمەيدى.
بۇگىندە نازارباەۆ پەن قازاقستان ەگىز ۇعىمعا اينالعانىن ەشكىم جوققا شىعارا قويماس. ءوزىم 80 جىلدىق سانالى عۇمىرىمنىڭ كوپشىلىگىن ەل ىشىندە, وبلىستىڭ زايسان, تارباعاتاي, كۇرشىم سەكىلدى اۋداندارىندا وتكىزدىم. اۋىل شارۋاشىلىعى سالاسىندا ەڭبەك ەتتىم. بۇل سالانىڭ جاي-كۇيىن جاقسى بىلەمىن. نۇرسۇلتان ءابىش ۇلىنىڭ اۋىل شارۋاشىلىعى سالاسىنا جاساعان قامقورلىعىن تاڭدى تاڭعا ۇرىپ ايتۋعا بولادى. تاۋەلسىزدىك جىلدارىندا مەملەكەت ەڭبەك ەتەمىن, كاسىپ اشامىن دەگەن ازاماتتاردىڭ ەشقايسىسىنىڭ قولىن قاققان جوق. قاراپايىم شارۋالارعا مەملەكەت تاراپىنان بارلىق جاعداي جاسالىپ وتىر. سۋبسيديا دەسەڭىز سۋبسيديا, جەڭىلدەتىلگەن نەسيە دەسەڭىز نەسيە بەرىلىپ جاتىر. بۇدان ارتىق قانداي قامقورلىق قاجەت؟! سوندىقتان تاۋەلسىز قازاقستاننىڭ نەگىزىن سالۋشى تۇڭعىش پرەزيدەنتىمىزدىڭ بۇل شەشىمى ءبىزدى تولقىتقانى, تەبىرەنتكەنى راس.
