ەلباسى نۇرسۇلتان نازارباەۆتىڭ مەملەكەتىمىزدىڭ اسا ماڭىزدى تاريحي ساتىندە حالىققا قايرىلىپ, ۇندەۋ جاريالاۋى وتباسىمىز ءۇشىن كۇتپەگەن شەشىم بولعانىن جاسىرمايمىن. شىنى كەرەك, باستاپقىدا سەنەر-سەنبەسىمىزدى بىلمەي ءبىر-بىرىمىزگە قاراعان كۇيى داعدارىپ قالعانىمىز راس. كوڭىلىمىزدە قيماستىق سەزىم پايدا بولىپ, ءتىپتى كەلىنشەگىم كوزىنىڭ جاسىنا ەرىك بەردى. مەن بولسام نۇرسۇلتان ابىش ۇلىمەن تاناپ باسىندا العاش كەزدەسكەن كەزىمدى, ساياسي ەرىك-جىگەرگە تولى سۇڭعىلا ساياساتكەرلىگىمەن, ىسكە مىعىمدىلىعىمەن, ۋادەگە بەرىكتىگىمەن, قالىڭ بۇقارانى سوڭىنا ىلەستىرە بىلەتىن كوشباسشىلىق بولمىسىمەن ءتانتى ەتكەن قاسيەتتەرىن ەسكە الدىم. «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا مىنانداي جولدار بار: ء«بىز اۋىلدىق جەرلەردىڭ الەۋمەتتىك ورتاسىن جاڭعىرتۋعا كىرىسۋىمىز قاجەت. بۇعان ارنايى «اۋىل – ەل بەسىگى» جوباسىنىڭ ىسكە قوسىلۋى سەپتىگىن تيگىزەدى. بۇل جوبا ارقىلى وڭىرلەردەگى ەڭبەككە قاتىستى يدەولوگيانى ىلگەرىلەتۋدى قولعا الۋ كەرەك». كەز كەلگەن ءىستىڭ باعاسى سالىستىرۋ ارقىلى بىلىنەدى. ۇندەۋدە ايتىلعانداي كەڭەس وداعى قۇلاپ, ساياساتىمىز بەن ەكونوميكامىز شاتقاياقتاپ قالعاندا ەل تىزگىنىن نۇرسۇلتان ءابىش ۇلىنا سەنىپ تاپسىردىق. تاڭداۋدان قاتەلەسپەگەنىمىز قۇدىرەتتى ۋاقىتتىڭ ەنشىسىندە. مىسالدى الىستان ىزدەمەيىك, ءبىر كەزدەرى تاراۋدىڭ از-اق الدىندا تۇرعان بەكسەيىت, مىڭگەسەر اۋىلدارىنىڭ بەت-بەينەسى بۇگىندە ادام تانىماستاي وزگەرگەن. ىرىسىمىزدىڭ مولايىپ, تابىسىمىزدىڭ ەسەلەنە تۇسۋىنە ەلباسىمىزدىڭ كورەگەندى اۋىلشارۋاشىلىق ساياساتى ارقىلى جەتكەنىمىز ايداي شىندىق. ەگىنشىلىكپەن بىرگە مال شارۋاشىلىعىمەن دە اينالىسامىز. جۇمىسسىز جۇرگەن جاستار جوقتىڭ قاسى. جىل وتكەن سايىن ەلدى مەكەندەردىڭ ىرگەسى قالىڭداپ, تۇرمىسىنىڭ ساپاسى ارتىپ كەلەدى. بۇگىنگى تاڭدا سەرىكتەستىكتە 235 ادام جۇمىس ىستەيدى. بەكسەيىت اۋىلىنداعى ورتا مەكتەپكە سپورت زالى سالىنىپ, ءبىلىم بەرۋ مەكەمەسىنىڭ ەكىقاباتتى عيماراتىنا جاڭا پلاستيكالىق تەرەزەلەر ورناتىلدى. زاماناۋي شاعىن ورتالىق, بالالارعا ارنالعان جازعى ويىن-ساۋىق الاڭى, جاستار ءۇيى بوي كوتەردى. ەلدى مەكەننىڭ كوشەلەرى جارىقتاندىرىلعان. ەندى سۋ تاراتۋ جەلىلەرىن سالۋ جوسپارلانعان. قازاقىلىقتىڭ قاينار بۇلاعى – قاسيەتتى ورتانىڭ قايماعى بۇزىلماي ساقتالىپ قالۋىنا قول ۇشىن بەرىپ, اۋىلدىقتاردىڭ تۇرمىس-تىرشىلىگىن ۇنەمى نازاردا ۇستاعان پرەزيدەنتىمىزگە ءبىز شىنايى ريزامىز!
ەلىمىزدى وتىز جىل بويى ۇزدىكسىز باسقارىپ, قازاقستاندى بۇكىل الەمگە تانىتىپ, مويىنداتا ءبىلۋ كەز كەلگەن ليدەردىڭ قولىنان كەلمەسى انىق. پرەزيدەنت رەتىندەگى وكىلەتتىگىن توقتاتۋ تۋرالى شەشىمى توبەمىزدەن جاي تۇسكەندەي بولسا دا, ەرتەڭگە, حالىققا, جاستارعا دەگەن سەنىمى دۇرىس جولمەن كەلە جاتقانىمىزدى ايعاقتايدى. مىقتى ۇلتتىق مەملەكەت قۇرىپ, قازاقستاندىقتاردىڭ ءبىر-بىرىنە دەگەن قىلاۋسىز دوستىعىن سۇتتەي ۇيىتا بىلگەن ەلباسىمىز قاشاندا بىزبەن بىرگە!
