ەلباسىنىڭ شەشىمى ەشكىم كۇتپەگەن, تاڭعالارلىق وقيعا بولدى. پوستكەڭەستىك كەڭىستىكتە رەسەيدەن باسقا بىردە-ءبىر ەلدە مۇنداي وقيعا بولعان جوق. ءتىپتى, الەمدىك تاريحتا سيرەك كەزدەسەتىن وقيعالاردىڭ ءبىرى دەپ ايتۋعا بولادى. نۇرسۇلتان نازارباەۆ كۇش-قۋاتى بويىندا, ەلدى ءالى دە كونستيتۋتسيالىق مەرزىمى اياقتالعانشا باسقاراتىن سياقتى كورىنگەن. كەلەسى سايلاۋعا تۇسۋگە دە مۇمكىنشىلىگى بار سياقتى ەدى. بىراق ول بارلىق احۋالدى سارالاپ, ءوز ەركىمەن وسىنداي شەشىمگە كەلىپ وتىر. كونستيتۋتسيانىڭ تالابىن بۇزباي, بيلىكتى سەنات توراعاسىنا بەرگەنى دە وتە دۇرىس شەشىم بولدى دەپ سانايمىز. بۇل شەشىمدى ەشكىم دە تەرىس دەپ ايتا المايدى.
نۇرسۇلتان نازارباەۆتىڭ تاۋەلسىز قازاقستاننىڭ قالىپتاسۋىنا سىڭىرگەن ەڭبەگىن ەشتەڭەمەن سالىستىرۋعا بولمايدى. ول ەلدى نەشە ءتۇرلى تۇڭعيىقتار مەن تىعىرىقتاردان امان الىپ شىقتى. ولاردى اتاپ شىعۋدىڭ ءوزى بىرنەشە ماقالاعا جۇك بولار ەدى. سوندىقتان مەن تەك قازاقستاننىڭ اۋماقتىق تۇتاستىعىن ساقتاپ قالعان ايرىقشا ەڭبەگىن عانا اتاپ وتكىم كەلىپ وتىر. پوستكەڭەستىك ەلدەردە بالتىق بويى مەن ورتالىق ازيا رەسپۋبليكالارىنان باسقالارىنىڭ ءبارى تەرريتوريالىق تۇتاستىعىن جوعالتىپ الدى. قازاقستانعا دا ونداي قاۋىپتەر تونگەن ەدى. تەك نۇرسۇلتان نازارباەۆتىڭ بىردەن-ءبىر دۇرىس قادامدارى عانا رەسپۋبليكانىڭ تۇتاستىعىن ساقتاپ قالدى. وسى جولدا ول ءوزىنىڭ ناعىز ساياساتكەرگە ءتان قىرلارىن, تۇلعالىق شەبەرلىكتەرىن, ادامي قاسيەتتەرىنىڭ ءبارىن كورسەتتى. ەندى سولاردىڭ ءبارى تاريحتىڭ ەنشىسىنە اينالىپ, ۇزاق جىلدار بويى زەرتتەۋشىلەردىڭ نىسانىنا اينالاتىن بولادى.
پرەزيدەنتتىڭ سوزىنەن كەيىن مەن كوپتەگەن اداممەن كەزدەسىپ, وي ءبولىستىم. سوندا جۇرتتىڭ ءبارى دە تولقىپ, ونى قيماستىقپەن اۋىزعا العانىنىڭ كۋاسى بولدىم. وسىنىڭ ءوزى ونىڭ حالىق جۇرەگىنە جول تاپقاندىعىنىڭ بەلگىسى شىعار. ونىڭ ءالى دە ساياسي ساحنادان مۇلدە كەتپەگەندىگى دە ءبىزدىڭ ەلىمىزگە قاجەت. قاۋىپسىزدىك كەڭەسىنىڭ توراعاسى بولۋى جاڭا پرەزيدەنتكە اقىل-كەڭەسىن ايتىپ وتىرۋىنا جاقسى جاعداي تۋعىزادى. ال قاسىم-جومارت كەمەل ۇلىن جاقسى بىلەمىز, ەلدى باسقارۋعا ونىڭ ساياساتكەرلىك دەڭگەيى, اقىل-ويى, ءبىلىمى مەن بىلىگى تولىق جەتەدى دەپ سانايمىن.
