ءوڭىر اكتيۆىمەن كەزدەسۋدە پرەمەر-مينيستر م.مىرزالينگە وبلىس اكىمى قىزمەتىندەگى جۇمىسى جانە ءوڭىردىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن العىس ءبىلدىردى. م.ءمىرزاليننىڭ باسشىلىعىمەن وبلىستا جاڭا الەۋمەتتىك نىساندار سالىنىپ, ونىڭ ىشىندە تۋريزم سالاسىندا ءىرى ينفراقۇرىلىمدىق جوبالار ىسكە اسىرىلدى.
«مەملەكەت باسشىسى تاعايىنداعان بارلىق قىزمەتتەردە مالىك كەڭەسباي ۇلى جوعارى سەنىمدى اقتاي ءبىلدى», دەدى ا.مامين جانە وعان جاڭا قىزمەتىندە تابىس تىلەدى.
ءوڭىردىڭ جاڭا باسشىسىن تانىستىرعان ا.مامين وسى كۇنگە دەيىن ە.مارجىقپاەۆ كوكشەتاۋ قالاسىنىڭ اكىمى بولىپ جۇمىس ىستەپ كەلگەنىن ايتتى. ارشالى, زەرەندى اۋداندارىنىڭ اكىمى, اقمولا وبلىسى اكىمىنىڭ ورىنباسارى رەتىندە قىزمەت ەتىپ, ءوڭىردىڭ دامۋىنا زور ۇلەسىن قوسقانىن جەتكىزدى.
«قازىر وبلىستىڭ الدىندا ەلباسىنىڭ «الەۋمەتتىك قامقورلىق» جاڭا الەۋمەتتىك شارالارى اياسىندا اۋقىمدى مىندەتتەر تۇر. ازاماتتاردىڭ ءال-اۋقاتىن ارتتىرۋعا, حالىقتىڭ الەۋمەتتىك-ەكونوميكالىق جاعدايى مەن تۇرمىس ساپاسىن جاقسارتۋعا باعىتتالعان ناقتى شارالاردى جۇزەگە اسىرۋ قاجەت», دەدى ا.مامين.
سونىمەن قاتار اگروونەركاسىپتىك كەشەننىڭ ودان ءارى قارقىندى دامۋىن جەدەلدەتىپ, تۋريستىك الەۋەتىن دامىتۋ بويىنشا ناقتى جۇمىستى ۇيىمداستىرۋ قاجەت.
«2020 جىلى كوكشەتاۋ قالاسىندا قازاقستان مەن رەسەي وڭىرارالىق ىنتىماقتاستىعى فورۋمى وتەدى. وبلىس وسى ماڭىزدى ءىس-شارانىڭ جوعارى دەڭگەيدە ءوتۋىن قامتاماسىز ەتۋى كەرەك», دەپ تاپسىردى پرەمەر-مينيستر.
سوڭىندا ا.مامين وبلىس اكتيۆىمەن بىرلەسىپ اكىم رەتىندە ە.مارجىقپاەۆتىڭ ءوڭىر الدىنا قويىلىپ وتىرعان بارلىق تاپسىرمالاردىڭ ساپالى ورىندالۋىن قامتاماسىز ەتەتىنىنە سەنىم ءبىلدىردى.
