ەلباسىنىڭ مالىمدەمەسى مەن ءۇشىن دە, قازاقستان حالقى ءۇشىن كۇتپەگەن وقيعا بولدى. ارينە, بارىمىزدە قيماستىق سەزىمى بار. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ەلىمىز ءۇشىن جاساعان ەڭبەگى وراسان زور. كەڭەس وكىمەتى قۇلاعان قيىن-قىستاۋ زاماندا ەل تىزگىنىن ءوز قولىنا الىپ, 30 جىلدىڭ ىشىندە قازاقستاندى كوركەيتىپ, جان-جاقتى دامىتىپ, مەملەكەتىمىزدى الەمگە تانىتىپ, حالىقارالىق قوعامداستىق تاراپىنان جوعارى باعاعا يە بولدى.
وزدەرىڭىز بىلەتىندەي, ەلباسى سپورتقا ارقاشان كوڭىل ءبولىپ, بۇل سالانى ءاردايىم مەملەكەتتىك ماڭىزى باسىم باعىتتار ساناتىنا قوسىپ كەلەدى. قازىرگى تاڭدا ەلىمىزدە سپورتشىلار ءۇشىن بارلىق جاعداي جاسالعان. سونىڭ ناتيجەسىندە سپورتشىلارىمىز حالىقارالىق ارەنالاردا قازاقستاننىڭ كوك تۋىن ابىرويمەن كوتەرىپ, ءانۇرانىمىزدى شىرقاتىپ ءجۇر.
مەنىڭ وليمپيادا چەمپيونى اتانۋىما ەلباسى مەن ەلىمنىڭ ارتقان سەنىمى اسەر ەتتى. 2000 جىلى سيدنەي وليمپياداسىنا قاتىسۋعا جولداما الىپ قانا قويماي, قازاقستاننىڭ بايراعىن سيدنەي تورىندە الىپ شىعۋ مəرتەبەسى ماعان بۇيىردى. ءوز موينىما ۇلكەن جاۋاپكەرشىلىكتى العانىمدى سەزىندىم.
ەلباسى نۇرسۇلتان نازارباەۆ ماعان تۋدى تاپسىرعان كەزدە: «نۇرسۇلتان ءƏبىش ۇلى, ءسىز بەرگەن كوك بايراقتى سيدنەي ارەناسىندا ابىرويمەن الىپ ءوتىپ, وزىڭىزگە ابىرويمەن əكەلىپ تاپسىرامىن» دەپ ۋادە بەرگەن بولاتىنمىن.
وسىنداي ۋəدەمەن وليمپياداعا اتتانىپ, كوك تۋىمىزدى ابىرويمەن ەلباسىنا تابىستاعانىم ءəلى كۇنگە دەيىن كوز الدىمنان كەتپەيدى. تۋدى پرەزيدەنتىمىزگە تابىستاپ تۇرعانىمدا ول كىسى ماعان: «اينالايىن ەرماحان, ەر ەكەنسىڭ! كوك تۋىمىزدى كوككە كوتەرىپ, سونى التىن جۇلدەمەن ماعان تاپسىرعانىڭ ءۇشىن راحمەتىمدى ايتامىن», دەدى.
ءوز باسىم ەلباسىنىڭ باستاعان ءىسىن كەيىنگى پرەزيدەنتتەر جالعاستىرۋ كەرەك دەپ ەسەپتەيمىن. نۇرسۇلتان نازارباەۆتىڭ تاپسىرماسىمەن جاسالعان باعدارلامالاردى جۇزەگە اسىرساق, ەلباسى قالىپتاستىرىپ بەرگەن جولمەن جۇرسەك, حالقىمىزدىڭ تۇرمىسى جاقسارىپ, ەلىمىز كوركەيە تۇسەتىنى انىق.
ەرماحان ىبىرايىموۆ,
سيدنەي وليمپياداسىنىڭ چەمپيونى
