كەشەگى كۇن ماڭگىلىك ەل تاريحىنداعى ايرىقشا ءمانى بار كۇن بولادى. تاريحي وقيعانىڭ تاڭداندىرعانى دا, تاڭىرقاتقانى دا راس. ەستىگەن ساتتە ەسىمىزدى جيناي الماي قالدىق. سول ءبىر ساتتە تاۋەلسىز ەلدىڭ العاشقى كەزەڭىنەن باستاپ كۇنى بۇگىنگى كەمەلىنە كەلىپ, شارشىسىنا تولىپ, الەمنىڭ دامىعان ەلدەرىمەن يىق تىرەستىرگەن تۇسىنا دەيىنگى تاريحي جولعا وي جۇگىرتىپ, سانامەن سالماقتاعانىمىزدى نەسىنە جاسىرايىق.
توقسانىنشى جىلداردىڭ باسىندا كەڭەس وكىمەتى كەلمەسكە كەتكەننەن كەيىن بۇرىننان ءبىر-بىرىمەن تىعىز بايلانىستاعى ەكونوميكالىق جۇيە ىدىراپ, قيىن كۇندەردى باسىمىزدان كەشتىك. اسىرەسە اۋىل شارۋاشىلىعى مۇلدە تۇرالاپ قالدى. قورا تولعان ءتورت ت ۇلىك مالدى بارتەر دەگەن پالە جۇتتى. جانار-جاعارمايدىڭ ءبىر تونناسىن 4-5 توننا التىن استىققا ايىرباستاپ جۇردىك. جالعىز ءبىز عانا ەمەس, ۇزاق جىل كەڭشارلاردى باسقارعان اۋىل شارۋاشىلىعىنىڭ ءمۇيىزى قاراعايداي ماماندارى تىعىرىقتان شىعار جول تاپپاي, تەڭسەلىپ كەتتى. مىنە, وسى ساتتە ەل ەكونوميكاسىنىڭ كۇرە تامىرى – اۋىل شارۋاشىلىعىنا ەلباسى نۇرسۇلتان نازارباەۆ ءجىتى نازار اۋدارىپ, ۇكىمەت تاراپىنان قىرۋار كومەك كورسەتىلدى. سول كومەكتىڭ ارقاسىندا تۇرالاپ قالعان اۋىل شارۋاشىلىعى قايتادان ۇجىمداسا ۇيىسىپ, جوقتان بار قۇراپ, ەڭسەسىن كوتەرە باستادى. ەندى قاراڭىز, سوڭعى جىلدارى اقمولا وبلىسى رەسپۋبليكا استىعىنىڭ ۇشتەن ءبىرىن بەرەتىن جاعدايعا جەتتى. وبلىستىڭ قارا مالىنىڭ قاق جارتىسى ونىمدىلىگى جوعارى اسىل تۇقىمدى مالعا اينالدى. قۇس فابريكاسى دەيسىز بە, تاۋارلى ءسۇت فەرمالارى دەيسىز بە, بىرىنەن سوڭ ءبىرى بوي كوتەرىپ, ەلوردانى ازىق-ت ۇلىكپەن قاپىسىز قامتاماسىز ەتىپ قانا قويماي, استىعىمىزدى, ەتىمىزدى شەتەلگە شىعاراتىن مۇمكىندىككە قول جەتكىزدىك. وسىنىڭ بارلىعى جاسىراتىنى جوق, حالقىن جۇمىلعان جۇدىرىقتاي سوڭىنان ەرتىپ, ارمانداي الىس بولاشاقتىڭ بەرەكەلى بيىكتەرىنە باستاي بىلگەن ەلباسى نۇرسۇلتان نازارباەۆتىڭ ارقاسى! مۇنى ىرىسى مول بولعانىمەن, اۋرەسى بەلدەن كەلەتىن اۋىل شارۋاشىلىعى سالاسىنىڭ قاجۋدى, ارىپ-اشۋدى بىلمەيتىن ەڭبەككەرلەرى جاقسى بىلەدى. اقتىلى مال ءوسىرىپ, اقىق ءدان ايالاعان جۇرت داستارقاندارىن توقشىلىققا اينالدىرا بىلگەن ەلباسىنا ايتار العىستارى شەكسىز. وسى جىلدار ىشىندە كەلەشەگىن بولجاي بىلگەن كەنەن اقىلدى, كەمەل پاراساتتى ەلباسىمىز اۋىل شارۋاشىلىعىن الەمنىڭ ەڭ وزىق مەملەكەتتەرىنىڭ تابىسىمەن تايتالاسا الاتىن تاماشا بيىككە كوتەردى.
مولشىلىقتىڭ باستاۋى ەلباسىنىڭ كورەگەن ساياساتىنىڭ ناتيجەسى. تۇڭعىش پرەزيدەنتىمىز ءبىزدىڭ سالانىڭ بۇگە-شىگەسىن وتە جاقسى ءبىلدى. سول بىلگەنىنىڭ ارقاسىندا بۇگىنگى كۇننىڭ تالاپتارىن ءتۇيسىنىپ, الدىمىزدان سارا جول اشتى. قازىرگى كۇنى ءبىزدىڭ شارۋا قوجالىعىمىز ءبىر مىڭ گەكتار جەرگە ەگىن ەگەدى. ءوزىڭىز ويلاپ قاراڭىز, ءبىر عانا وتباسىنىڭ يەلىگىندەگى قوجالىقتا ءبىر مىڭ گەكتار جەرگە ەگىن ەگۋگە قول جەتكىزۋ ءۇشىن قانشاما مۇمكىندىك تۋدىرىلۋى كەرەك. سول مۇمكىندىكتى ءبىزدىڭ مەملەكەتىمىز تۋدىردى, ەلباسىمىز تۋدىردى. مۇنى ەكپىن ءتۇسىرىپ, استىن سىزىپ ايتپاي كەتۋگە بولمايدى. اۋىل شارۋاشىلىعىنىڭ الاپات قۋاتقا يە بولۋى ەلباسىمىزدىڭ ارقاسى! ماڭگىلىك ەلدىڭ مۇراتىن ءزاۋلىم كوككە كوتەرگەن, كوزدەگەنىنە جەتكىزگەن نۇرسۇلتان ءابىش ۇلى نازارباەۆقا مىڭ العىس. ول العىستى جالعىز مەن عانا ەمەس, ءوزى سۇيەتىن ەلى, ءوزى سۇيەتىن جەرى جان تەبىرەنتىپ ايتىپ جاتىر.
قۇلان بولاتوۆ,
«قۇلان» شارۋا قوجالىعىنىڭ جەتەكشىسى
زەرەندى اۋدانى, اقمولا وبلىسى
