تەلەديداردان پرەزيدەنت وكىلەتتىلىگىن توقتاتاتىنى تۋرالى شەشىم قابىلداعانىن ايتقاندا, كۇتپەگەن جاعداي بولعاندىقتان, توسىرقاپ قالدىم. مىڭجىلدىقتاردان قۇرالعان تاريحى بار جاس مەملەكەتىمىزدىڭ ىرگەسىن قالاپ, تاۋەلسىزدىگىن تۇعىرىنا قوندىرىپ, وركەندەپ دامۋى ءۇشىن ايانباي تەر توككەن ءار كۇنى كوز الدىمدا وتكەندىكتەن قيماستىق سەزىمىم الدىمەن وياندى. نۇرەكەڭدى ۇلكەن ساياساتقا ەندى عانا ارالاسا باستاعان جاس كۇنىنەن جەتە تانىعانىمدى, ءازىلىمىز جاراسىپ, بىرگە جۇرگەنىمدى, سىيلاسىپ دوسىم بولعانىن ماقتانىش ەتەمىن. پرەزيدەنتتىڭ زيالى قاۋىمنان قاشىق بولعان كەزى جوق, قاشاندا ەل قادىرلەگەن ازاماتتارمەن اقىلداسىپ, كەڭەسىپ-كەلىسىپ وتىردى. قازاقستان حالقىنىڭ قولداۋىن سەزىنە وتىرىپ, ەلدى سەنىمدى تۇردە العا جەتەلەدى. ونىڭ تاۋەلسىزدىككە دەيىن دە جانە ودان كەيىن دە كوشباسشى رەتىندەگى قاسيەتى, دانالىعى, جەتى رەت ويلاپ, ءبىر رەت كەسەتىن سارابدال ساياساتى ەلىمىزدى كوپ قيىندىقتاردان الىپ شىقتى. ۇلكەن باتىلدىقتى قاجەت ەتەتىن جەرلەردە ىركىلمەي, ىرىلىك تانىتتى. ەلىمىز ءۇشىن وتە ماڭىزدى شەشىمدەر قابىلداندى. ەلىن سۇيگەن ەلباسىنى ەلى دە قۇرمەت تۇتتى, سەنىم ارتتى, سۇيەنىشى بولۋعا جارادى. سونىڭ ارقاسىندا پوستكەڭەستىك ەلدەردىڭ اراسىندا قازاقستاننىڭ ابىرويى مەن بەدەلى جوعارى بولماسا, شۇكىر, ەشبىر ەلدەن كەم قالعان جەرى جوق.
باسقا سالالاردى ايتپاعاندا, ونەردى جانىمەن سۇيەتىن ن.نازارباەۆ رۋحانياتقا كەلگەندە تارتىنىپ, قارجى ۇنەمدەپ قالدى دەپ ەشكىم دە اۋزى بارىپ ايتا الماس ەدى. ەلىمىزدە قانشاما حالىقارالىق دەڭگەيدەگى شوقتىعى بيىك ونەر بايگەلەرى, تەاتر فەستيۆالدەرى, كلاسسيكالىق ونەر دودالارى الما-كەزەك وتكىزىلىپ, حالقىمىزدىڭ مادەنيەتىنىڭ ءوسىپ-وركەندەۋى, الەمدىك دامۋدان كەنجە قالماي, تەرەزەسى تەڭ بولىپ, كوشكە ىلەسۋى ءۇشىن قولىنان كەلگەن بار جاعدايدى جاسادى. وسىنىڭ ارقاسىندا ونەر مەن مادەنيەتتەگى تالانتتارىمىز تانىلىپ, ولار دۇنيە ءجۇزىنىڭ ەڭ اتاقتى ساحنالارىن بىرىنەن سوڭ ءبىرىن باعىندىرىپ جاتىر. مۇنى تەك سوقىر ادام نەمەسە نيەتى بۇزىق ادام عانا كورمەيدى.
كوپ ەتنوستى قازاقستاننىڭ ەرەكشەلىگىن ەسكەرە وتىرىپ, دۇرىس جۇرگىزگەن ساياساتىنىڭ نەگىزىندە ەلىمىزدە تۇراقتىلىق پەن ۇلتارالىق, دىنارالىق تاتۋلىق سالتانات قۇردى. ەندىگى تىلەك تالاي تار جول, تايعاق كەشۋلەردەن, وت پەن سۋدان حالقىمىزدى امان-ەسەن الىپ كەلە جاتقان اللا تاعالام نۇرەكەڭ مەملەكەتتىڭ نەگىزگى ساياساتىنا اينالدىرعان وسى بىرلىك پەن بەرەكەدەن اجىراتپاسا ەكەن دەپ تىلەيمىن. تىنىشتىق پەن تاتۋلىق – ءبىزدىڭ زور بايلىعىمىز. الەمنىڭ ءار بۇرىشىندا جاڭا جانجال وتى تۇتانىپ, ب ۇلىككە باتىپ, مازاسىز كۇي كەشىپ جاتقاندا, مەملەكەت ءۇشىن تىنىشتىقتىڭ باستى قۇندىلىق ەكەنىنە ءبىزدىڭ كوزىمىز بۇگىن انىق جەتىپ وتىر. تەرەڭنەن ويلايتىن پرەزيدەنت ۇزاق تولعانىسىنان سوڭ وسىنداي شەشىم قابىلداعان بولار دەپ ويلايمىن. نۇرەكەڭنىڭ ەڭبەگىنە العىس قانا ايتامىز. ەل ورنىندا, حالىق ءوز ءومىرىن ءسۇرىپ جاتىر, ەندەشە الاڭدايتىن ەشنارسە جوق. تەك العا باسىپ, قالىپتاسقان ءوز جولىمىزبەن جۇرە بەرگەنىمىز ابزال بولار.
ءسابيت ورازباەۆ,
قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى
