قىمباتتى وتانداستار!
قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ 2019 جىلعى 20 ناۋرىزدان باستاپ ءوزىنىڭ كونستيتۋتسيالىق قۇزىرەتىن الدىن الا توقتاتاتىنى تۋرالى مالىمدەدى.
بۇل – تاۋەلسىز قازاقستاندى قۇرۋ سياقتى تاريحي ميسسيانى ادال جانە تابىستى ورىنداپ شىققان دانا مەملەكەت قايراتكەرىنىڭ, باتىل ازامات جانە پاتريوتتىڭ كورەگەن ءھام دۇرىس قابىلداعان قادامى.
كسرو ىدىراعان ساتتە ونىڭ باسقارۋىمەن ەلىمىز بەيبىت جولمەن تاۋەلسىزدىككە قول جەتكىزىپ, ءوز مەملەكەتتىلىگىن نىعايتتى.
ەلباسىنىڭ ۇستامدى ساياساتىنىڭ ارقاسىندا ەلىمىز الاساپىران كەزەڭنىڭ قيىن-قىستاۋ ساتتەرىن ۇرىس-كەرىسسىز, ازاماتتىق, ەتنوسارالىق جانە كونفەسسياارالىق كيكىلجىڭسىز, الەۋمەتتىك كۇيزەلىسسىز ءوتتى.
«الدىمەن – ەكونوميكا, سودان كەيىن – ساياسات», سونىمەن قاتار ەل بىرلىگى پرينتسيپتەرىن نەگىزگى باعىت رەتىندە ۇستانىپ, نۇرسۇلتان نازارباەۆ نارىقتىق ەكونوميكانى قالىپتاستىرۋ, تۇراقتى الەۋمەتتىك ءوسۋ ماسەلەلەرىن شەشىپ, قازاقستاندى دامۋدىڭ جاڭا ساپالى تراەكتورياسىنا شىعاردى.
بۇگىندە ەلىمىز الەمدەگى باسەكەگە بارىنشا قابىلەتتى 50 ەلدىڭ قاتارىنا ەندى. «قازاقستان-2030» ستراتەگياسىن مەرزىمىنەن بۇرىن ورىنداپ, قازاقستان ەلباسىنىڭ باسقارۋىمەن ەلىمىزدىڭ XXI عاسىردا دامۋىنىڭ ىرگەلى نەگىزىن جاسادى.
تۇڭعىش پرەزيدەنتتىڭ ەڭ ماڭىزدى جانە تابىستى جوباسى رەتىندە ەلوردانى استانا قالاسىنا اۋىستىرۋى ەكەنىن بارشامىز بىلەمىز. جاڭا ەلوردا, تۋ, ءانۇران, ەلتاڭبا جانە حالىقارالىق دەڭگەيدە قابىلدانعان شەكارا تاۋەلسىز قازاقستاننىڭ جەتىستىكتەرى مەن جەڭىستەرىنىڭ ۇتىمدى بەت-بەينەسىنە اينالدى.
ءبىزدىڭ ەلدەگى الەۋمەتتىك-ەكونوميكالىق جانە ساياسي رەفورمالاردىڭ تابىسى نۇرسۇلتان نازارباەۆتىڭ اتىمەن اتالعان قوعامدىق كەلىسىم مەن جالپىحالىقتىق بىرلىكتىڭ قازاقستاندىق ۇلگىسىنە نەگىزدەلگەن.
قازاقستان حالقى اسسامبلەياسى ارقىلى ىسكە اسقان بۇل مودەل ازاماتتاردىڭ ەتنوستىق, ءدىني ەرەكشەلىكتەرىنە قاراماستان تەڭ قۇقىلى بولۋىنىڭ ءتيىمدى مەحانيزمىنە اينالدى.
ەلباسىنىڭ ساياسي كەمەڭگەرلىگى, الەمنىڭ باسقا مەملەكەتتەرىنىڭ ەشقايسىسىندا جوق بەيبىتشىلىك پەن كەلىسىمنىڭ ەرەكشە ينستيتۋتىن قۇردى.
بىرىككەن ۇلتتار ۇيىمىنىڭ باس حاتشىلارى كوفي اننان مەن پان گي مۋن ءبىزدىڭ اسسامبلەيا تۋرالى «بۇۇ-نىڭ كىشى ۇلگىسى» دەپ باعا بەردى.
قازىر اسسامبلەيا قازاقستاننىڭ 18 ميلليون حالقىن بىرىكتىرىپ وتىر.
تۇڭعىش پرەزيدەنت جەتىستىكتەرىنىڭ ءمانى مەن ماعىنالىلىعى, ونىڭ بەتتەگەن ەكونوميكالىق جانە ساياسي باعىتىنىڭ مىندەتتى تۇردە جالعاسىن تاباتىنىن دالەلدەيدى.
ەلباسى قازاقستاننىڭ تابىستى دامۋى مەن الەمنىڭ كوشباسشى وتىز ەلىنىڭ قاتارىنا ەنۋىنىڭ نەگىزىن قالاپ بەردى: قازاقستاننىڭ ەكونوميكاسى مەن الەۋمەتتىك باعىتىنىڭ تولىعىمەن جاڭارۋى ءتيىمدى ىسكە اسىرىلۋدا, «رۋحاني جاڭعىرۋ» باعدارلاماسى جۇرگىزىلۋدە, ەلىمىزدىڭ الەۋمەتتىك باقۋاتتىلىعى مودەلىنىڭ ناقتى كورىنىسى بەلگىلەندى.
ەلباسىنىڭ بۇل شەشىمى ەل ازاماتتارىنىڭ كوپشىلىگى تاراپىنان وكىنىش تۋدىرىپ وتىر. ونىڭ نىق ساياسي جىگەرى ادامداردىڭ بولاشاققا, ەرتەڭگى كۇنگە دەگەن سەنىمىن ارتتىرىپ تۇراتىن.
ەڭ قيىن ساتتەردە حالىق داعدارىستان دا دامۋ مۇمكىندىگىن ىزدەۋدى پرينتسيپكە اينالدىرعان, ەڭ دۇرىس جانە ءتيىمدى شەشىم تاباتىن تۇڭعىش پرەزيدەنتتىڭ دانالىعى مەن تاجىريبەسىنە سەنەتىن.
بىراق ەلباسى ءوز قادامىنىڭ قاجەتتىلىگىن جاڭا تاريحي كەزەڭدە قازاقستاننىڭ ەكونوميكاسى مەن الەۋمەتتىك سالاسىن دامۋدىڭ جاڭا دەڭگەيىنە شىعارۋ ماقساتىمەن نەگىزدەدى.
دەگەنمەن, نۇرسۇلتان نازارباەۆ ساياسي جانە الەۋمەتتىك-ەكونوميكالىق باعىتتاعى رەفورمالاردىڭ بىرىزدىلىگى مەن ساباقتاستىعىنىڭ كەپىلى بولىپ قالا بەرەدى.
بۇگىنگى تاڭدا مەملەكەتتىك ورگانداردىڭ, ازاماتتىق قوعامنىڭ, بارلىق ەل ازاماتتارىنىڭ نەگىزگى مىندەتى – ەلباسىنىڭ مۇراسى مەن جەتىستىكتەرىن ساقتاپ قالۋ جانە ارتتىرۋ.
ءبىز, قازاقستان حالقى اسسامبلەياسىنىڭ مۇشەلەرى, قازاقتار مەن ورىستار, وزبەكتەر مەن پولياكتار, تاتارلار مەن نەمىستەر, ۇيعىرلار مەن ۆايناحتار, كۇردتەر مەن ۋكرايندىقتار, كورەيلەر مەن تاجىكتەر, ارمياندار مەن ازەربايجاندار, تۇرىكتەر, دۇنگەندەر جانە باسقا ەتنوستار, قوعامدىق كەلىسىم كەڭەستەرىنىڭ, انالار كەڭەستەرىنىڭ, عىلىمي-ساراپشىلىق كەڭەستەرىنىڭ, «جاڭعىرۋ جولى» جاستار قوزعالىسىنىڭ مۇشەلەرى, ەل ازاماتتارىنا ءتۇزۋ باعىتتى ۇستانۋدى – ۋاقىتتىڭ تەكسەرۋىنەن وتكەن بىرلىگىمىز بەن كەلىسىمىمىزدى ساقتاۋ جانە نىعايتۋ سياقتى باعىتتان تايماۋعا شاقىرامىز.
ءبىز شىن جۇرەكتەن «بەيبىت ءومىر ءۇشىن, وتان ءۇشىن, ەرلىك پەن ىرىلىك ساباقتارى ءۇشىن, ۇيىمىزدەگى ءان مەن نان ءۇشىن راحمەت سىزگە, ءبىزدىڭ قىمباتتى ەلباسى!» دەيمىز.
ەلباسىنىڭ «حالقىمىزدىڭ دوستىعى مەن بىرلىگىن, ەلىمىزدىڭ ءار ازاماتىنىڭ مادەنيەتى مەن سالتىنا دەگەن سىيلاستىق پەن ءبىر-بىرىمىزگە دەگەن سەنىمىمىزدى ساقتاڭدار. وسىلاي بولعاندا عانا ءبىز مىقتىمىز, سوندا عانا بارلىق قيىنشىلىقتى جەڭە الامىز. سوندا عانا داميمىز, گۇلدەنەمىز!» – دەگەن سوزدەرىن العىشارت رەتىندە قابىلداۋعا ۇندەيمىز.
نۇرسۇلتان ءابىش ۇلى ءوز تۋىندىسى – ەلىمىزدەگى كەلىسىم مەن تىنىشتىقتىڭ نەگىزى, قازاقستان حالقى اسسامبلەياسىن بۇدان ءارى دە باسقارا بەرەدى دەگەن سەنىمدەمىز.
ەلباسىنىڭ باعىتىنا ادالدىعىمىز تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆتىڭ قىزمەتىنە دەگەن ەڭ ۇلكەن العىسىمىز ەكەنىنە ءبىز سەنىمدىمىز.
قازاقستان حالقى اسسامبلەياسى
استانا
