قازاقستان پرەزيدەنتى نۇرسۇلتان نازارباەۆتىڭ ءوز وكىلەتتىلىگىن توقتاتۋ تۋرالى شەشىمى مەن ءۇشىن كۇتپەگەن جاعداي بولدى. بۇل جاڭالىقتى ەكىۇداي سەزىمدە قابىلدادىم. ءبىر جاعىنان ەل باسقارۋ ىسىنە جاستاردى تارتۋ تۋراسىنداعى ۇستانىمىن قولداسام دا, ەكىنشىدەن جان-دۇنيەمىزدە قيماستىق قالىپ وتىر. بارشامىزدىڭ كوڭىلىمىزدىڭ تورىنەن ورىن العان قايراتكەردىڭ بۇل شەشىمى كوڭىلدى تولقىتىپ جىبەردى.
نۇرسۇلتان ءابىش ۇلىن ءوز باسىم 1991 جىلدان بەرى تانيمىن. ول باۋىرلاس ازەربايجان حالقى ءۇشىن دە تالاي ەڭبەك سىڭىرگەن, ءبىزدىڭ ەلدىڭ دە بەيبىت كۇنگە قول جەتكىزۋى جولىندا تەر توككەن تۇلعا. ۇنەمى تاۋلى قاراباق ماسەلەسىندە ازەربايجان ەلىن قولداپ كەلدى.
سونىمەن قاتار ءوڭىردىڭ قاۋىپسىزدىگى ماسەلەسىنە, جاھانداعى بەيبىتشىلىكتى ساقتاۋ ىسىنە ۇلەس قوسقان قايراتكەر. ن.نازارباەۆتىڭ الەم ەلدەرىن يادرولىق قارۋدان باس تارتۋعا ۇدايى شاقىرىپ كەلە جاتقانى, بەيبىتشىلىك ساقتاۋ جولىندا بىرقاتار ەلدەردىڭ اراسىندا اراعايىندىق جاساۋى, سيرياداعى, اۋعانستانداعى سوعىستى توقتاتۋعا باعىتتالعان باستامالارى, ينتەگراتسيالىق پروتسەستەرگە ەرەكشە كوڭىل ءبولۋى ءبارىمىزدىڭ كوڭىلىمىزدەن شىققان بولاتىن.
سونداي-اق قازاقستاننىڭ تۇڭعىش پرەزيدەنتىنىڭ باستاماسىمەن باۋىرلاس ەلدەردىڭ اراسىنداعى ساياسي, ەكونوميكالىق, مادەني-گۋمانيتارلىق بايلانىستار نىعايىپ, تۋىس حالىقتار ءبىر-بىرىنە جاقىنداسا ءتۇستى. نۇرسۇلتان نازارباەۆ كۇللى تۇركى الەمىنىڭ اقساقالىنا اينالدى. بۇگىندە ول جاسى جونىنەن دە, ساياسي تاجىريبەسى مەن دانالىعى تۇرعىسىنان دا بارشامىزدىڭ اقساقالىمىز.
ءوز باسىم بۇل مارتەبەنى ەڭ ۇلكەن قۇرمەت دەپ بىلەمىن. تۇگەل تۇركىنىڭ جۇرەگىنىڭ تورىنەن العان اقساقالىمىز رەسمي لاۋازىمىنان باس تارتقانىمەن, ءالى دە ءوزىنىڭ اقىل-كەڭەسى, تاجىريبەسى ارقىلى ءبىزدىڭ ەلدەردىڭ اراسىنداعى ىنتىماقتاستىقتى تەرەڭدەتۋگە اتسالىسادى دەگەن ويدامىن.
راسيم مۋسابەيوۆ,
ازەربايجان رەسپۋبليكاسى ميللي مەدجليسىنىڭ دەپۋتاتى
