الماتى قالالىق ءماسليحاتىنىڭ كەزەكتى سەسسياسىندا كوپبالالى انالاردى الەۋمەتتىك قولداۋ ماسەلەسى كەڭىنەن تالقىلاندى. بۇل رەتتە تۇرعىن ءۇي كومەگى جانە مۇگەدەك بالالاردى ۇيدە وقىتۋعا ارنالعان جاردەماقىلاردى بىرنەشە ەسەگە دەيىن ۇلعايتۋ تۋرالى ۇسىنىستار ايتىلدى. تابىسى جان باسىنا شاققاندا كۇنكورىس دەڭگەيىنىڭ ەكى ەسە مولشەرىنەن اسپايتىن ازقامتىلعان ازاماتتارعا كورسەتىلەتىن كومەك سوماسىن 50 مىڭ بەس ءجۇز تەڭگەگە دەيىن ءوسىرۋ كوزدەلسە, «باقىتتى وتباسى» باعدارلاماسى اياسىندا وتباسى شىعىنىنىڭ شەكتى دەڭگەيىن 10 پايىزدان 5 پايىزعا دەيىن تومەندەتۋ قاراستىرىلعان.
«بىلتىر جاردەماقى 800 بالاعا تولەندى. بيىل دا وسىنشاما بالانى قامتۋدى جوسپارلاپ وتىرمىز. بۇل جاردەماقىنى الۋ ءۇشىن قوسىمشا 11,4 ملن تەڭگە ءبولىنىپ وتىر. ايتىلعان الەۋمەتتىك كومەك تۇرلەرىنىڭ ۇشەۋى دە بۇرىننان بار. تەك ولاردى الاتىن ازاماتتاردىڭ سانى مەن كومەكتىڭ كولەمى عانا ارتىپ وتىر», – دەيدى الماتى قالاسى الەۋمەتتىك ءال-اۋقات باسقارماسىنىڭ باسشىسى راحات شيماشەۆا.
مامانداردىڭ ايتۋىنشا, بۇدان بىلاي مۇگەدەك بالالاردى ۇيدە وقىتاتىن وتباسىلارعا توقسان سايىن بەرىلەتىن جاردەماقىنى 30 مىڭ تەڭگەگە دەيىن ارتتىرۋ جوسپارى بار.
ارمان وكتيابر,
«ەگەمەن قازاقستان»
الماتى
