ەندى زامان تالابىنا ساي ناۋرىزدىڭ فورماتىن تۇبەگەيلى وزگەرتۋ قاجەت. ناۋرىزدىڭ ايرىقشا ءتالىم-تاربيە, قادىر-قاسيەت بەرەتىن تۇرلەرى وتە ەرەكشە. سوندىقتان, ناۋرىز مەيرامىنا جاڭا رەڭك بەرۋ ءۇشىن, ادامنىڭ ۇلتىنا, ءدىني باعىنىستىلىعىنا قاراماستان, ادامگەرشىلىك قۇندىلىقتارعا ءمان بەرە وتىرىپ, قازاقستان حالقى تۇگەل قامتىلاتىنداي مازمۇنىن جاساۋ كەرەك.
ەل اراسىندا «ناۋرىز مەرەكەسى بۇقارالىق سيپاتتان اجىراپ, ساحنالىق كەيىپكە ەنىپ, ازداعان جۇرتشىلىقتىڭ قىزىقتاۋىنا عانا اينالعان فولكلورلىق قويىلىم كورىنىسىنەن اسپاۋدا» دەگەن پىكىر قالىپتاستى. وسى ورايدا مادەنيەت جانە سپورت ءمينيسترى ارىستانبەك مۇحامەدي ۇلى ناۋرىز مەرەكەسىن جاڭا فورماتتا وتكىزۋدى ۇسىنعان بولاتىن.
«مەرەكەنىڭ وزىنە سايكەس اتريبۋتتارىن قالپىنا كەلتىرىپ, فولكلورلىق-ەتنوگرافيالىق اۋقىمنان جالپى قازاقستاندىق مەرەكە دارەجەسىنە جەتكىزگەن ءجون. مەرەكەدە باقىلاۋشىلار بولمايدى, ءبارى دە قاتىسۋشى. ناۋرىز مەرەكەسىنىڭ نەگىزگى ماعىناسى: ۇلتتىق نامىس پەن رۋحاني بولمىسىمىزدى جاڭعىرتۋ. سوندىقتان دا ناۋرىزعا ىرگەلى ىزدەنىستەر مەن تاريحي ارى زاماناۋي شارالار كەرەك» دەپ اتاپ ءوتتى.
2019 جىلعى ناۋرىز مەيرامىن مەرەكەلەۋگە بايلانىستى قازاقستان رەسپۋبليكاسى مادەنيەت جانە سپورت مينيسترلىگى بىرنەشە ءىس-شارا وتكىزەدى.
مادەنيەت جانە سپورت مينيسترلىگىنىڭ ءىس-شارالار لەگى 13 ناۋرىز كۇنى «Qazaqconcert» مەملەكەتتىك كونتسەرتتىك ۇيىمىندا وتكەن « ۇلىستىڭ ۇلى كۇنى» اتتى مەرەكەلىك جوبامەن باستاۋ الدى.
« ۇلىستىڭ ۇلى كۇنى» جوباسىنىڭ شەڭبەرىندە كورەرمەندەر ۇلتتىق سالت-داستۇرلەر مەن ويىنداردىڭ, اقىندار ايتىسىن, حالىق اۋەندەرىنە قۇرىلعان ءان شاشۋ مەن كۇي تارتىس سىندى ۇلتتىق مادەنيەتىمىزدىڭ وزىق ۇلگىلەرى ۇسىنىلدى.
17 ناۋرىز كۇنى الماتى قالاسىندا مۇحتار اۋەزوۆ تەاترىنىڭ الدىندا « ۇلى دالانىڭ ۇلى كۇنى – ناۋرىز» اتتى مەرەكەلىك ءىس-شارامەن ءوز جالعاسىن تاپتى.
19 ناۋرىز كۇنى ۇلتتىق مۋزەيدە بالالار ۇيلەرىنىڭ تاربيەلەنۋشىلەرىنە ارنالعان «تۇساۋ كەسۋ» سالتاناتتى ءراسىمى, قولجازبالار جانە سيرەك كىتاپتار ۇلتتىق ورتالىعىندا وقۋشىلار اراسىندا «توعىزقۇمالاق» قازاقتىڭ ۇلتتىق ويىنى, پ.چايكوۆسكي اتىنداعى الماتى مۋزىكالىق كوللەدجىنىڭ قارتتار ۇيىندەگى «ارمىسىڭ, ءاز ناۋرىز» اتتى مەرەكەلىك كونتسەرتى, ك.بايسەيىتوۆا اتىنداعى رەسپۋبليكالىق ورتا ارناۋلى مامانداندىرىلعان دارىندى بالالارعا ارنالعان مەكتەپ-ينتەرناتىندا «ارمىسىڭ, ءاز ناۋرىز» حالىق اسپاپتارى وركەسترىنىڭ مەرەكەلىك كونتسەرتى, ۆەلوسيپەد سپورتىنان وليمپيادالىق دايارلاۋ ورتالىعىندا جاس سپورتشىلاردىڭ ۆەلوسيپەدپەن ءجۇرىپ ءوتۋى وتەدى.
20 ناۋرىز كۇنى ۇلتتىق كىتاپحانادا «قوش كەلدىڭ, ءاز ناۋرىز»: مەرەكەلىك اشىق ەسىك كۇنى, «استانا بالەت» تەاترىندا « ۇلى دالا مۇراسى» كونتسەرتتىك باعدارلاماسى, كۇلاش بايسەيىتوۆا اتىنداعى ورتا مەكتەپ-ينتەرناتىندا «ناۋرىزناما» قازاق ۇلتتىق ويىندارىنىڭ تۇرلەرىنەن جارىستار وتكىزىلەدى.
21 ناۋرىز كۇنى ۇلتتىق اكادەميالىق كىتاپحانادا تۇركى تىلدەس ەلدەر بالالارى كوستيۋمدەرىنىڭ فەستيۆالى, استانا وپەرا تەاترىندا «قوش كەلدىڭ, ناۋرىز!» مەرەكەلىك كونتسەرتى وتەدى.
22 ناۋرىز كۇنى ءا. قاستەەۆ اتىنداعى مەملەكەتتىك ونەر مۋزەيىندە ناۋرىز مەرەكەسىنە ارنالعان جاعدايى تومەن وتباسىلارعا ەكسكۋرسيا, كۇرەس تۇرلەرى بويىنشا وليمپيادالىق دايارلاۋ ورتالىعىندا ۇلتتىق سپورت تۇرلەرىنەن سپورتتىق ءىس-شارالار وتەتىن بولادى.
23 ناۋرىز كۇنى سپورت جانە دەنە شىنىقتىرۋ ىستەرى كوميتەتىنىڭ ۇيىمداستىرۋىمەن «ناۋرىز سەرگەكتىككە شاقىرادى!» كوكتەم مارافونى (ناۋرىز مەيرامىن مەرەكەلەۋگە بايلانىستى جاڭا ءداستۇر), ورتالىق مەملەكەتتىك عىلىمي-تەحنيكالىق قۇجاتتاما ارحيۆىندە ناۋرىز مەيرامىن مەرەكەلەۋ اياسىندا ارداگەرلەر كەزدەسۋ, ش.ايمانوۆ اتىنداعى «قازاقفيلم» اق ۇيىمداستىرۋىمەن قازاق مۋلتفيلمدەرىنىڭ ۇلكەن كينو كورسەتىلىمى, ءا.قاستەەۆ اتىنداعى مەملەكەتتىك ونەر مۋزەيىندە «مۋزەيدەگى ناۋرىز» شىعارماشىلىق فەستيۆالى, «ۇلتتىق اسپاپتار» مۇراجايىندا «ۇلتتىق اسپاپتار» مۇراجايىنا ساياحات ءىس-شاراسى جوسپارلانعان.
27 ناۋرىز كۇنى "استانا وپەرا" تەاترىندا جاس كورەرمەندەرگە ارنالعان ت.بەيسەمبەكوۆتىڭ «سامۇرىق كەلگەن تاڭ» اتتى جاڭا مۋزىكالىق سپەكتاكلى قويىلادى.
