جيىندى اشقان گۇلجانار شوكەەۆا جاستار اراسىنداعى ءتىل ساياساتىن جۇرگىزۋدىڭ ماڭىزدىلىعىن اتاپ ءوتتى.
قازاق ءتىلى ءالىپبيىن كيريلليتسادان لاتىن گرافيكاسىنا اۋىستىرۋ «رۋحاني جاڭعىرۋدىڭ» ەڭ نەگىزىگى باعىتى دەپ ايتۋعا بولادى. سەبەبى, لاتىن ءالىپبيى – ۇلى دالا ەلىن الەمدىك وركەنيەتپەن قابىستىراتىن التىن كوپىر, – دەدى باسقارما باسشىسى.
جيىندا جاستار جىلى اقمولا وبلىسىندا بىرقاتار جوبالار جۇزەگە اسىرىلاتىنى ايتىلدى. وسى ورايدا, مەملەكەتتىك ساياساتتى حالىقارالىق, رەسپۋبليكالىق جəنە جەرگىلىكتى دەڭگەيدە جۇزەگە اسىرۋدىڭ باستى باعىتى مەن جاستاردىڭ جان-جاقتى دامۋى تۋرالى اقمولا وبلىسىنىڭ ىشكى ساياسات باسقارماسى جاستار ساياساتى ماسەلەلەرى بويىنشا ءبولىم باسشىسى دامير ىرگەباەۆ ايتىپ بەردى.
ول جاستاردىڭ əلەۋمەتتىك ماسەلەلەرىنىڭ شەشىلۋى جايىنا توقتالدى.
2018 جىلى ءتيىمدى جۇمىسپەن قامتۋدى جانە جاپپاي كəسىپكەرلىكتى دامىتۋ بويىنشا 2017-2021 جىلدارعا ارنالعان باعدارلاماعا 5615 ادام قاتىستى. جىل ىشىندە ەڭبەكپەن قامتۋ ورگاندارى ارقىلى 4830 جاس جۇمىسقا ورنالاستى. كوكشەتاۋ قالاسىندا «اقمولا جاستارى» باعدارلاماسى بويىنشا 424 جاس وتباسىنا ارنالعان 6 تۇرعىن ءۇي سالىناتىن بولادى. كەزدەسۋدە جاستار بەلسەندىلەرى ءسوز الىپ, ءوڭىر جاستارى اراسىندا مەملەكەتتىك ءتىلدى كەڭىنەن قولدانۋ تۋرالى ءوز ويلارىن ورتاعا سالدى.
– قازاق ءتىلى – وتە باي ءتىل. ءتىلىمىزدىڭ مارتەبەسىن كوتەرۋ ءۇشىن, ەڭ الدىمەن ءوزىمىز ءبىر-بىرىمىزبەن قازاقشا سويلەسۋىمىز كەرەك,-دەيدى ادىلەت سەرىك.
جيىندى قورىتىندىلاعان وبلىستىق ىشكى ساياسات باسقارماسىنىڭ باسشىسى گۇلجانار شوكەەۆا ەلىمىزدىڭ كەلەشەگى ءبىلىمدى جاستاردىڭ قولىندا ەكەنىن ايتا كەلە, وسى كۇنى ءسوز بولعان جاستاردىڭ ءاربىر ۇسىنىس-تىلەكتەرى ەسكەرىلىپ, الداعى ۋاقىتتا سول بويىنشا جۇمىس جۇرگىزىلەتىندىگىن اتاپ ءوتتى.
بايقال ءبايادىل,
«Egemen Qazaqstan»
اقمولا وبلىسى
