– باعدارلامانىڭ بارلىق سالالارى بويىنشا اقمولالىق كاسىپكەرلەرگە 7 ميلليارد تەڭگە قارجىلاي كومەك كورسەتىلدى. سونىڭ ىشىندە, تەك وتكەن جىلدا كاسىپكەرلىك سۋبەكتىلەرىن قولداۋعا 2 ميلليارد تەڭگە قارجى جۇمىلدىرىلدى. ەلباسى جولداۋىندا باعدارلامانىڭ ۇزارتىلاتىنى ايتىلعان بولاتىن. تيىسىنشە, كاسىپكەرلەرگە قارجىلىق قولداۋ كولەمى دە ارتادى,-دەيدى وبلىستىق «دامۋ» كاسىپكەرلىكتى قولداۋ قورىنىڭ ديرەكتورى رۋسلان احمەتوۆ.
26 جىل ۇستازدىق قىزمەت اتقارعان ەلەنا بۋگاەنكو بۇگىندە تابىستى جەكە كاسىپكەر. ول ءوز ءىسىن باستاۋعا بەل بۋىپ, «دامۋ» قورىنا جۇگىنەدى. وسى قوردىڭ ناقتى كومەگىنىڭ ارقاسىندا ويعا العان ءىسى وڭىنان ورالىپتى. دەمەك, قولداۋدى ايقىن سەزىنىپ وتىر.
– العاش كاسىپ باستاعانىمدا عيمارات, قارجى تاپشىلىعىن سەزىندىم. بۇعان دەيىن نازارباەۆ زياتكەرلىك مەكتەبىندە قىزمەت ىستەپ ەدىم. «دامۋ» قورىنىڭ ماماندارىمەن بىرلەسىپ, جوبامدى جۇزەگە اسىردىم,-دەيدى «بۋراتينو» مەكتەپكە دەيىنگى ءبىلىم بەرۋ ورتالىعىنىڭ جەتەكشىسى ەلەنا بۋگاەنكو.
بۇگىندە ورتالىقتىڭ جاڭا عيماراتقا كوشۋ قاجەتتىلىگى تۋىنداپ وتىر. كاسىپكەر بۇل جولى دا «دامۋ» قورىمەن بىرلەسىپ قىزمەت اتقارۋعا نيەتتى. ءوز ءىسىن كەڭەيتۋدى ويعا العان كاسىپكەرلەردىڭ ءبىرى – كونستانتين لۋگوۆيتسكي. ءتىس دارىگەرى بيزنەستەگى العاشقى قادامدارىن تولعانىسپەن ەسكە الادى. ول وتپەلى كەزەڭدە «بيزنەستىڭ جول كارتاسى» باعدارلاماسى ارقىلى كوسەگەسىن كوگەرتكەن.
–بيزنەسىمدى العاشقىدا كىشكەنتاي كابينەتتەن باستادىم. كەيىن كاسىبىمدى كەڭەيتۋ كەرەك بولدى. الايدا, قاجەتتى قارجىم جوق ەدى. «دامۋ» قورى بانككە كەپىل ۇسىنىپ, «بيزنەستىڭ جول كارتاسى 2020» باعدارلاماسى ارقىلى نەسيە الدىم,–دەيدى ءتىس دارىگەرى كونستانتين لۋگوۆيتسكي.
«بيزنەستىڭ جول كارتاسى» باعدارلاماسى ەلەنا بۋگاەنكو مەن كونستانتين لۋگوۆيتسكي ءتارىزدى مىڭداعان ازاماتتارعا جول كورسەتتى. دەمەك, باعدارلاما ءوزىنىڭ تيىمدىلىگىن دالەلدەپ وتىر.
بايقال ءبايادىل,
«Egemen Qazaqstan»
اقمولا وبلىسى
