– وتكەن جىلعى ەسەپ بويىنشا اقمولا وبلىسىندا 15 مىڭ جۇمىسشى 25 ايلىق ەسەپتىك كورسەتكىشتەن تومەن, ياعني 63125 تەڭگەدەن از ەڭبەكاقى الاتىنى انىقتالعان. جالاقىسى تومەن جۇمىسشىلاردىڭ سالىق جۇكتەمەسىن ازايتۋدىڭ ناتيجەسىندە ۇنەمدەلگەن 230,9 ميلليون تەڭگە ەڭبەكاقىنى ارتتىرۋعا باعىتتالاتىن بولادى,-دەيدى وبلىستىق مەملەكەتتىك كىرىستەر دەپارتامەنتىنىڭ جەتەكشىسى تاۋكەن وشاقباەۆ.
جيىن بارىسىندا ءوڭىردى گازداندىرۋعا قاتىستى بىرقاتار ماسەلەلەر تالقىلاندى. قازىرگى تاڭدا «سارىارقا» ماگيسترالدى گاز قۇبىرىنىڭ قۇرىلىسىنىڭ جوباسى جۇزەگە اسۋدا. گاز قۇبىرى قاراعاندى, سولتۇستىك قازاقستان, اقمولا وبلىستارىنا تارتىلماق. وبلىستا 120 شاقىرىم گاز قۇبىرى سالىنباق.
– ءوڭىردى گازداندىرۋ ماسەلەسىنە كەلەر بولساق, ارشالى جانە تسەلينوگراد اۋداندارىنداعى بارلىعى 92 مىڭ تۇرعىنى بار 20 ەلدىمەكەندى گازداندىرۋ جوسپارلانىپ وتىر. بولاشاقتا بارلىعى 160 مىڭ تۇرعىندى قامتيتىن تاعى 24 ەلدىمەكەندى گازداندىرۋ قولعا الىنباق,-دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ جەتەكشىسى يۆان يۋرچەنكو.
ماگيسترالدى گاز قۇبىرىنىڭ قۇرىلىسىن اياقتاۋ اعىمداعى جىلدىڭ سوڭىنا دەيىن جوسپارلانىپ وتىر. تراسسانى دايىنداۋ جۇمىستارى 27 اقپاننان باستالىپ كەتتى. دانەكەرلەۋ جۇمىستارىن جۇرگىزۋ ناۋرىزدىڭ سوڭىنا جوسپارلانىپ وتىر. بۇگىنگى تاڭدا وبلىس اكىمدىگى تاراپىنان ماگيسترالدى گاز قۇبىرلارىنا گاز تاراتقىش جەلىلەرىن ورناتۋ بويىنشا جول كارتاسى ازىرلەنگەن.
بايقال ءبايادىل,
«Egemen Qazaqstan»
