شىمكەنتتەگى مەكتەپتە بولعان جاپپاي ۋلانۋدى قالا اكىمى تىكەلەي قاداعالاۋعا الدى

ايماقتار • 19 ناۋرىز، 2019

شىمكەنتتەگى مەكتەپتە بولعان جاپپاي ۋلانۋدى قالا اكىمى تىكەلەي قاداعالاۋعا الدى

كۇنى كەشە شىمكەنت قالاسىنداعى №54 ورتا مەكتەپتە بەلگىسىز ءيىستىڭ اسەرىنەن جاپپاي ۋلانۋ فاكتىسى بولىپ، 45 ادام دارىگەرلەردىڭ كومەگىنە جۇگىنگەن ەدى. وقيعا ورنىنا شۇعىل جەتكەن توتەنشە جاعدايلار دەپارتامەنتى وكىلدەرى، پوليتسەيلەر، دارىگەرلەر، گاز تاراتۋ مەكەمەلەرىنىڭ قىزمەتتەرى جاسوسپىرىمدەردىڭ جاپپاي ۋلانۋ سەبەپتەرىن انىقتاۋعا كىرىسكەن. ماماندار مەكتەپ ءىشى مەن اۋلاسىنداعى اۋانىڭ سىناماسىن الىپ، لابوراتوريالىق تەكسەرۋدەن وتكىزگەن. الايدا، تابيعي گازدىڭ تارالۋى جونىندەگى بولجام راستالعان جوق.

ت.ورىنباەۆ اتىنداعى وبلىستىق گيپەرباريكالىق وكسيگەناتسيا ورتالىعى وقۋشىلاردىڭ اۋرۋ بەلگىلەرىنە نەگىزدەلىپ، ۋلانۋ سەبەبىن گازدىڭ اۋاعا تارالۋىنان پايدا بولعان دەگەن بولجام ايتتى.

«بارلىعى توكسيكولوگيالىق اۋرۋحاناعا 45 ناۋقاس ءتۇستى. ونىڭ ىشىندە 4 ەرەسەك جانە 41 بالا. بارلىعىنا مەديتسينالىق جانە پسيحولوگيالىق كومەك كورسەتىلدى. دارىگەرلەر مەديتسينالىق كومەك كەزىندە باقىلاۋدى كۇشەيتىپ، كەزەكشى دارىگەرلەرمەن قاتار 2 توكسيكولوگ مامان قوسىمشا مەديتسينالىق قىزمەت كورسەتتى. بۇعان قوسا 3 پسيحولوگ دارىگەر وقۋشىلارمەن جەكە-جەكە جۇمىس ىستەپ شىقتى. اۋرۋحاناعا جەتكىزىلگەن 45 ناۋقاسقا قاجەتتى مەديتسينالىق كومەك كورسەتىلىپ، قاناعاتتانارلىق جاعدايدا ۇيلەرىنە شىعارىلدى. قوسىمشا تۇرعىلىقتى جەرى بويىنشا ناۋقاستار ەمحانا دارىگەرلەرىنىڭ باقىلاۋىندا بولادى. الدىن الا بولجام بويىنشا «تابيعي گازدىڭ كومپونەنتتەرىمەن ۋلانۋدىڭ جەڭىل دارەجەسى» دياگنوزى قويىلعان» دەيدى شىمكەنت قالالىق دەنساۋلىق ساقتاۋ باسقارماسى باستىعىنىڭ مىندەتىن اتقارۋشى عالىمجان ءابىشوۆ.

زارداپ شەككەن وقۋشىلار مەن مۇعالىمدەر «سىنىپ بولمەلەرىندە جانە مەكتەپ اۋلاسىندا جاعىمسىز ءيىس سەزىلدى» دەيدى. بارلىعىندا دەرلىك باس اينالۋ، كوزدىڭ جاساۋراپ قىزارۋى، باس اۋرۋى بايقالعان. وقيعا ورنىنا جەدەل جاردەم قىزمەتى كەلىپ، ۋلانعانداردىڭ بارلىعىنا مەديتسينالىق كومەك كورسەتكەن.

شىمكەنت قالالىق ءبىلىم باسقارماسىنىڭ باسشىسى اقەركە ابىلايحاننىڭ ايتۋىنشا، ۋلانۋ تەك ءبىر عانا سىنىپتا ەمەس، باسقا دا سىنىپ وقۋشىلارىندا بايقالعان. بولمەدە جانە مەكتەپ ايماعىندا جاعىمسىز ءيىس سەزىلگەن. ءاۋ باستا مەكتەپ ۇجىمى بەلگىسىز ءيىستى اۋاعا تارالعان گاز دەپ تۇسىنگەن. گاز كومپانياسىنىڭ قىزمەتكەرلەرى مەكتەپ پەن اۆتونومدى قازاندىقتى تەكسەرگەندىگىن، تابيعي گازدىڭ اۋاعا جايىلماعاندىعىن العا تارتتى.

سانيتارلىق-ەپيدەميولوگيالىق قىزمەتتىڭ ماماندارى «اۋا قۇرامىن، مەكتەپتىڭ سىنىپ بولمەلەرىن زەرتتەپ شىقتىق، ادام اعزاسىنا زياندى بوگدە زاتتاردىڭ بەلگىلەرى انىقتالمادى» دەيدى.

ەستەرىڭىزگە سالار بولساق، 18 ناۋرىز كۇنى ساعات 16:50 شاماسىندا شىمكەنت قالاسىنداعى №54 ورتا مەكتەپتە بەلگىسىز ءيىستىڭ اسەرىنەن جاپپاي ۋلانۋ فاكتىسى بولعان. توتەنشە جاعدايدىڭ سالدارىنان ۋلانۋ بەلگىلەرى بار 45 ادام قالالىق №6 ەمحانانىڭ توكسيكولوگيا بولىمىنە جەتكىزىلدى.

جەتكىزىلگەن ناۋقاستارعا مەديتسينالىق كومەك كورسەتىلىپ، جاعدايلارى جاقسارعاننان كەيىن ۇيلەرىنە جىبەرىلدى. زارداپ شەككەندەرگە تۇرعىلىقتى مەكەنجايى بويىنشا ۋچاسكەلىك دارىگەرلەر بەكىتىلدى.

بۇگىن وسى مەكتەپكە ءتيىستى سالا جەتەكشىلەرىمەن بىرگە شىمكەنت قالاسىنىڭ اكىمى عابيدوللا ءابدىراحىموۆ كەلىپ، توتەنشە جاعدايدىڭ شىعۋ سەبەپتەرىن انىقتاۋ جونىندەگى جۇمىستاردىڭ اتقارىلۋ بارىسىمەن تانىستى. ءارى توتەنشە جاعدايدى تۇراقتى باقىلاۋىنا الاتىندىعىن جەتكىزدى.

قازىرگى تاڭدا مەكتەپتىڭ سانيتارلىق احۋالى قالىپتى، ادام دەنساۋلىعىنا كەلەر قاۋىپ جوق. وقيعانىڭ ءمان-جايىن انىقتاۋ جونىندەگى جۇمىستار ودان ءارى جالعاسادى. ال مەكتەپ ءبىر كۇنگە وقۋىن توقتاتتى.

وقۋشىلار اتا-انالارىنىڭ جانىندا بولىپ، 20 ناۋرىزدان باستاپ وقۋدى قالىپتى جالعاستىراتىن بولادى. ءبىلىم وشاعىندا ءتيىستى سالا ماماندارىنان تۇراتىن كەزەكشىلىك بەكەتى قويىلعان.

قالا اكىمى مەكتەپتى تولىق ارالاپ شىققان سوڭ ىنتىماق شاعىن اۋدانىنداعى گاز تاراتۋ پۋنكتىندە بولىپ، كوگىلدىر وتىن تاراتاتىن ورىننىڭ قاۋىپسىزدىك جاعدايىن تەكسەردى.

ال، سوڭعى كەلىپ تۇسكەن اقپاراتتا دارىگەرلەر وقۋشىلاردىڭ مەكتەپكە 600 مەتر جەردە ورنالاسقان تابيعي گاز تاراتۋشى پۋنكتتەن شىققان اقاۋدىڭ سالدارىنان ۋلانعاندىعىن ايتۋدا. گاز تاسىمالداۋ قىزمەتىنىڭ ماماندارى دەر كەزىندە الدىن الۋ شارالارىن جۇرگىزگەن. اقاۋدىڭ نەدەن شىققاندىعى ءالى دە انىقتالۋ ۇستىندە.

نۇرشات توكەن،

«ەگەمەن قازاقستان»

شىمكەنت