«ەندەۆاسكۋليارلىق ادىسپەن مي تامىرلارى انەۆريزمى مەن مويىن تامىرلارىنىڭ تارىلۋىن ەمدەۋ» شەبەرلىك ساعاتى كەزىندە «قازاقستاننىڭ 100 جاڭا ەسىمى» جوباسىنىڭ جەڭىمپازى, جوعارى ساناتتاعى دارىگەر-نەيروحيرۋرگ, «وكا» اق نەيروحيرۋرگيالىق ورتالىعىنىڭ جەتەكشىسى مىڭجىلقى بەردىقوجاەۆتىڭ قاتىسۋىمەن بىرنەشە وتانىڭ جاڭا ءتۇرى جاسالدى.
– ەندەۆاسكۋليارلىق وتا, ياعني تامىرىشىلىك ادىسپەن مي تامىرلارىن, تىندەرىن تەسپەي, كەسپەي-اق وتا جاساۋعا مۇمكىندىك بەرەدى. جانە وسى ارقىلى دەنساۋلىققا تونەتىن قاۋىپ بارىنشا ازايادى, – دەيدى مىڭجىلقى سايلاۋ ۇلى. – ەندەۆاسكۋليارلىق حيرۋرگيانىڭ مانىسىنە كەلسەك, دارىگەرلەر مۇنداي كۇردەلى وتانى جاساعان كەزدە, ناۋقاستىڭ اعزاسىنا پىشاق تيگىزبەي-اق, قان تامىرلارى ارقىلى ءجۇرىپ وتىرادى. ادام اعزاسىنداعى سان ارتەرياسى, سيرەك جاعدايدا ۇيقى ارتەريالارى ارقىلى كۇرە تامىرلارعا ەكى ميلليمەترلىك كاتەتەر سالىنادى. جىڭىشكە كاتەتەر قولقا تامىرمەن مي تامىرلارىنا دەيىن اپارىلادى دا, دارىگەر كوزگە كورىنبەس كاتەتەر ۇشىنداعى ميكروقۇرالمەن قاجەتتى ارەكەتتەرىن جۇزەگە اسىرادى. سونداي-اق قانعا جىبەرىلگەن كونتراستىق سۇيىقتىق ارقىلى حيرۋرگتار كاتەتەردىڭ قيمىلىن رەنتگەن اپپاراتىمەن باقىلاپ وتىرادى.
قازىرگى تاڭدا ەندەۆاسكۋليارلىق ەمدەۋ ءادىسى نەيروحيرۋرگيادا مي تامىرلارى انەۆريزمىن ەمدەۋ بارىسىندا ۇلكەن سۇرانىسقا يە. انەۆريزم – بۇل مي قان تامىرلارىنىڭ توزىپ, سوزىلۋىنىڭ ناتيجەسىندە تومپايىپ پايدا بولاتىن كەسەل. بۇل قالتاشىق جارىلىپ كەتكەن جاعدايدا ميعا قان قۇيىلادى.
ءدال قازىرگى تاڭدا «سوۆمينكا» نەيروحيرۋرگيا ورتالىعىنىڭ جوعارى ساناتتاعى دارىگەرلەرى مۇنداي زاماناۋي مەديتسينالىق پروتسەستەردى جاقسى مەڭگەرىپ, ەندەۆاسكۋليارلىق وتالاردىڭ بارلىق ادىستەرىن ءساتتى جۇزەگە اسىرىپ وتىر.
ال جوعارىداعى شەبەرلىك ءدارىسى كەزىندە قازاقستان, يتاليا, ۋكراينا مەن لاتۆيانىڭ نەيروحيرۋرگتارى ءوزارا تاماشا تاجىريبە الماستى.
ايناش ەسالي,
«Egemen Qazaqstan»
الماتى
