جاڭا مەشىت ەكسپو قالاشىعىنىڭ اۋماعىندا تۇرعىزىلۋدا. وندا ءبىر مەزەتتە 30 مىڭ ادامنىڭ قۇلشىلىق ەتۋىنە مۇمكىندىك بولادى. ونىڭ ىشىندە ايەلدەرگە ارنالعان 3000 ورىن بار. عيماراتتىڭ جالپى كولەمى 57 مىڭ شارشى مەتردى قۇرايدى, ال مۇناراسىنىڭ بيىكتىگى 130 مەترگە جەتكىزىلمەك. سونداي-اق كۇمبەزىنىڭ ديامەترى – 63 مەتر.
ەلباسى وسىناۋ ۇلىق ءىستىڭ ناۋرىز ايىنىڭ قارساڭىندا باستالۋىن جاقسىلىققا جوريتىنىن ايتتى. مەملەكەتتىك بيۋدجەتتەن مەشىت قۇرىلىسىنا قارجى بولىنبەيدى.
– بۇل ەل تاۋەلسىزدىگىنىڭ قارساڭىندا وتكەن ۇلكەن ماجىلىستەردىڭ بىرىندە جوسپارلانعان جۇمىس ەدى. مەشىت سالۋ ءۇشىن ارنايى قور قۇرىلىپ, ەلىمىزدىڭ بەلگىلى كاسىپكەرلەرى مەن قاراپايىم ازاماتتارى قارجىلاي ۇلەس قوسۋدا. قازاقستاننىڭ تاۋەلسىزدىك جىلدارىندا ەلدىڭ ساياساتىنىڭ ارقاسىندا ءوسىپ-ءونىپ, بيزنەسىن وركەندەتكەن ازاماتتاردىڭ ءبىر توبى قۇرىلىستىڭ باستالۋ راسىمىنە دە قاتىسىپ وتىر, – دەدى ەلباسى.
مەملەكەت باسشىسى, سونىمەن قاتار جاڭا مەشىت ءدىني عيمارات بولىپ سانالعانىمەن, استانانىڭ ەڭ ءبىر كورىكتى ءارى تۋريستەردى باۋراپ تۇراتىن عيمارات تارىنىڭ ءبىرى بولاتىنىن جەتكىزدى.
– مەن تاياۋدا ءباا-دە بولىپ, التىننان تۇرعىزىلعان شەيح زايد مەشىتىن كوردىم. بۇل مەشىت 3-4 جىل بۇرىن عانا اشىلسا دا, وعان جىل سايىن 6 ميلليون تۋريست بارادى. اللا ىسىمىزگە بەرەكە بەرسىن. ۇرپاقتارىمىزدىڭ بولاشاعى جارقىن بولسىن, – دەدى مەملەكەت باسشىسى.
جوسپار بويىنشا مەشىت قۇرىلىسى ەكى جىل ىشىندە اياقتالۋى ءتيىس. ال قۇرىلىستىڭ ۋاقىتىلى جانە ساپالى جۇرگىزىلۋى مەملەكەت باسشىسىنىڭ تىكەلەي باقىلاۋىندا بولادى. پرەزيدەنتتىڭ ايتۋىنشا, مەشىت جوباسىن بەكىتەر كەزدە الەمدەگى ۇزدىك مەشىتتەردىڭ ارتىقشىلىقتارى ەلەپ-ەكشەلىپ, ەڭ ۇزدىگىنە تاڭداۋ جاسالعان.
قالا اكىمدىگىنىڭ جوسپارى بويىنشا ەلوردانىڭ باس مەشىتىنىڭ قاپتالىنان كولەمى بوتانيكالىق باقتان دا ۇلكەن ساياباق ورىن تەبەدى.
مەشىت قۇرىلىسىنا تاپسىرىس بەرۋشى «استانا-2020» قورىنىڭ اتقارۋشى ديرەكتورى نۇرجان مىڭجاساروۆتىڭ ايتۋىنا قاراعاندا, قۇلشىلىق ۇيىنە الەمدەگى ەڭ زاماناۋي ماتەريالدار پايدالانىلماق.
مەشىتتىڭ اۋماعىندا 3500 كولىككە ارنالعان جابىق جانە اشىق اۆتوتۇراقتار قاراستىرىلعان.
– بۇل مەشىت ورتالىق ازيا مەن تمد مەملەكەتتەرىنىڭ ىشىندەگى ەڭ الىپ جانە بىرەگەي مەشىت بولۋى ءتيىس, – دەدى جۋرناليستەرگە سۇحبات بەرگەن ن.مىڭجاساروۆ.
ەندى 24 ايدان سوڭ استاناعا اۋەجايدان كەلەر تۇستا ەڭ ءبىر ساۋلەتتى مەشىت جاماعاتقا ەسىگىن ايقارا اشادى.
قۇرىلىسقا جاۋاپتى كومپانيا وكىلدەرى جۇمىستىڭ ەڭ قىزعان تۇسىندا ءبىر مەزەتتە شامامەن 2,5 مىڭداي قۇرىلىسشى تارتىلاتىندىعىن ايتىپ وتىر.
جاۋاپتى جۇمىستىڭ ماڭىزدىلىعى مەن جاۋاپكەرشىلىگى قازىردىڭ وزىندە قاجەتتى قۇرىلىس كولىكتەرىنىڭ ءتىزىلىپ قويىلعانىنان دا اڭعارىلدى.
سونداي-اق, مەملەكەت باسشىسى قازاقستان مۇسىلماندارى ءدىني باسقارماسىنا باردى.
نۇرسۇلتان نازارباەۆ ەلوردانىڭ الماتى اۋدانىنداعى قازاقستان مۇسىلماندارى ءدىني باسقارماسىنىڭ جاڭا عيماراتىن ارالاپ كوردى.
مەملەكەت باسشىسى قازاقستان مۇسىلماندارى ءدىني باسقارماسىنىڭ قازىرگى جۇمىسىمەن جانە الداعى جوسپارىمەن تانىستى, سونداي-اق قىزمەتكەرلەرمەن اڭگىمەلەستى.
– سىزدەردىڭ جۇمىستارىڭىز ءۇشىن بارلىق جاعداي جاسالدى. ءبىز سىزدەرمەن بىرگە حالىقتىڭ يگىلىگى ءۇشىن ەڭبەك ەتەمىز. ەگەر مەملەكەتتە بىرلىك پەن كەلىسىم بولماسا, ونداي ەلدىڭ بولاشاعى جوق, – دەدى قازاقستان پرەزيدەنتى.
نۇرسۇلتان نازارباەۆ جيىنعا قاتىسۋشىلاردى كەلە جاتقان ناۋرىز مەيرامىمەن قۇتتىقتاپ, ءدىني باسقارمانىڭ جۇمىسىنا تابىس تىلەدى.
* * *
«نۇرلى استانا» كورپوراتيۆتىك قورى قازاقستان مۇسىلماندارى ءدىني باسقارماسى جاڭا عيماراتىنىڭ قۇرىلىسىن 2015 جىلدىڭ قازان ايىندا باستاپ, 2018 جىلعى جەلتوقساندا اياقتادى.
سەرىك ابدىبەك,
«Egemen Qazaqstan»
