جيىنعا قىرعىزستاننىڭ ءبىلىم جانە عىلىم ءمينيسترى گۇلميرا قۇدايبەرديەۆا, ازەربايجان ءبىلىم ءمينيسترىنىڭ ورىنباسارى ماxاببات ۆەليەۆا, تۇركيا ءبىلىم ءمينيسترىنىڭ ورىنباسارى مۇستافا سافران, قازاقستان ءبىلىم جانە عىلىم ۆيتسە-ءمينيسترى رۇستەم بيعاري جانە حالىقارالىق تۇركى اكادەمياسىنىڭ (TWESCO) باسشىسى دارحان قىدىرالى قاتىستى. كەڭەس بارىسىندا اكادەميا جەتەكشىسى 2018 جىلى اتقارىلعان جۇمىستاردىڭ ەسەبىن بەرىپ, 2019 جىلدىڭ جۇمىس جوسپارىمەن تانىستىردى.
سونداي-اق كەڭەس مۇشەلەرى تۇركى اكادەمياسىنىڭ 2019 جىلعى اتاۋلى داتالارىن ماقۇلداپ, ءبىلىم جانە عىلىم سالاسىنداعى ىنتىماقتاستىق ماسەلەلەرىن تالقىلادى. كەڭەس بارىسىندا حالىقارالىق تۇركى اكادەمياسى دايىنداعان «تۇركى الەمى گەوگرافياسى», «ورتاق تۇركى تاريحى» جانە «ورتاق تۇركى ادەبيەتى» وقۋلىقتارىن دا جان-جاقتى تالقىلاپ, قاراستىردى.
كەڭەس مۇشەلەرى اتالعان وقۋلىقتارعا وزدەرىنىڭ جوعارى باعاسىن بەردى جانە ولاردى تولىقتاي دايارلاۋ ءىسىن 2019 جىلدىڭ قىركۇيەك ايىنا دەيىن اياقتاۋدى تاپسىردى. ءوز كەزەگىندە تۇركيا ءبىلىم ءمينيسترىنىڭ ورىنباسارى مۇستافا سافران تۇركى اكادەمياسى ازىرلەگەن "ورتاق تۇركى تاريxى" وقۋلىعىن تۇركيادا 30 مىڭنان استام وقۋشىنىڭ تاڭداۋلى ءپان رەتىندە تاڭداعانىن جەتكىزدى. جيىن قورىتىندىسى بويىنشا قىرعىزستاننىڭ ءبىلىم جانە عىلىم ءمينيسترى گۇلميرا قۇدايبەرديەۆا تۇركى اكادەمياسى عىلىمي كەڭەسىنىڭ كەزەڭدىك ءتورايىمى بولىپ سايلاندى.
كەڭەس مۇشەلەرى عىلىمي كەڭەستىڭ كەلەسى وتىرىسىن ازەربايجاندا وتكىزۋ جونىندە ۋاعدالاستى جانە 2018 جىلى اتقارىلعان جۇمىستارعا جوعارى باعاسىن بەرە كەلە تۇركى اكادەمياسىنىڭ 2019 جىلعى جۇمىس جوسپارىن بەكىتتى.
2019 جىلعى تۇركى الەمىنىڭ ايتۋلى داتالارى:
1. ءجۇسىپ بالاساعۇننىڭ «قۇتتى بىلىك» شىعارماسىنىڭ جازىلعانىنا 950 جىل
2. التىن وردا مەن موعولستاننىڭ قۇرىلۋىنا ىقپال ەتكەن تالاس قۇرىلتايىنىڭ 750 جىلدىعى
3. اقىن يمامەددين ءناسيميدىڭ 650 جىلدىعى
4. تۇركولوگ, اتاقتى عالىم يشتۆان قوڭىر ماندوكيدىڭ 75 جىلدىعى
5. تۇركياداعى مۇستافا كەمال اتاتۇرىك باستاعان ۇلت-ازاتتىق قوزعالىستىڭ 100 جىلدىعى
6. تۇركى الەمىنىڭ ينتەگراتسياسى ءۇشىن ەرەكشە ماڭىزى بار ناحيچەۆان كەلىسىمىنىڭ 10 جىلدىعى
