قازاقستان • 15 ناۋرىز، 2019

قازاقستان-اۋعانستان اراسىنداعى ىنتىماقتاستىق ماسەلەسى تالقىلاندى

873 رەتكورسەتىلدى

سىرتقى ىستەر ءمينيسترى بەيبىت اتامقۇلوۆ اۋعانستان يسلام رەسپۋبليكاسىنىڭ قازاقستان رەسپۋبليكاسىنداعى ەلشىسى موحامماد فارحاد ازيميمەن كەزدەستى. تاراپتار ساياسي، ساۋدا-ەكونوميكالىق جانە گۋمانيتارلىق سالالارداعى قازاقستان-اۋعانستان ىنتىماقتاستىعىنىڭ قازىرگى جاعدايى مەن كەلەشەگىن تالقىلادى.

«ورتالىق ازيا ايماعىنداعى ينتەگراتسيالىق پروتسەستەر شەڭبەرىندە اۋعانستانمەن ىنتىماقتاستىق، ەكىجاقتى جانە كوپجاقتى فورماتتاعى قاتىناستاردىڭ بارلىق سپەكترى بويىنشا ىنتىماقتاستىقتى دامىتۋ ءبىزدىڭ قارىم-قاتىناستارىمىزعا وڭ اسەرىن تيگىزەدى. قازاقستان كوپتەگەن جىل بويى اۋعانستانداعى بەيبىتشىلىك پروتسەسىنە جانە قايتا قالپىنا كەلۋىنە ۇلەس قوسىپ كەلەدى»، - دەدى مينيستر.

قازاقستان مەن اۋعانستان اراسىنداعى ءوزارا ءتيىمدى قارىم-قاتىناستىڭ پروگرەسسيۆتى ديناميكاسى، سونداي-اق ءوزارا ساۋداداعى كورسەتكىشتەردىڭ ءوسۋى بايقالادى. سونىمەن بىرگە ساۋدا-ەكونوميكالىق ىنتىماقتاستىقتىڭ الەۋەتى زور ەكەندىگى اتاپ ءوتىلدى.

قازاقستان استىقتى جانە ونىڭ ونىمدەرىن اۋعانستانعا ەكسپورتتاۋعا، ترانزيتتىك-كولىك جانە گۋمانيتارلىق سالالارداعى ءوزارا ءىس-قيمىلدى نىعايتۋعا، اۋعانستانداعى تەمىرجول جانە ينفراقۇرىلىمدىق جوبالاردى ىسكە اسىرۋعا، سونداي-اق، اۋعانستان ازاماتتارىنا ارنالعان قازاقستاننىڭ ءبىلىم بەرۋ باعدارلاماسىن جالعاستىرۋعا مۇددەلى. اسكەري-تەحنيكالىق ىنتىماقتاستىق - ەكىجاقتى ىقپالداستىق اسپەكتىلەرىنىڭ ءبىرى بولۋى مۇمكىن.

ءوز كەزەگىندە اۋعانستان ەلشىسى قازاقستان پرەزيدەنتى نۇرسۇلتان نازارباەۆقا ءوز ەلىنە نازارى ءۇشىن العىسىن ءبىلدىردى. ء«بىز اۋعانستاندى دامىتۋداعى قازاقستاننىڭ ءرولىن جوعارى باعالايمىز. بۇۇ قاۋىپسىزدىك كەڭەسىنىڭ تۇراقتى ەمەس مۇشەسى كەزىندە ءسىزدىڭ مەملەكەت كەڭەس دەلەگاتسياسىنىڭ قابىلعا العاشقى ساپارىن ۇيىمداستىردى. ءبىز ورتاق شەكارالاردىڭ جوقتىعىنا قاراماستان، قازاقستاندى ەلىمىزدىڭ جاقىن دوسى رەتىندە سانايمىز»، - دەدى م.ازيمي.

اۋعان ديپلوماتى ءوز ەلىنىڭ باسشىلىعى اتىنان قازاقستان مەن اۋعانستان اراسىنداعى قارىم-قاتىناستاردى ستراتەگيالىق دەڭگەيگە كوتەرۋگە جانە بۇل ماقساتتا ءتيىستى كەلىسىمگە قول قويۋعا مۇددەلىلىك تانىتتى. ەلشىنىڭ ايتۋىنشا، اۋعانستان وزبەكستانمەن جانە تۇركىمەنستانمەن ۇقساس كەلىسىمدەرگە قول قويعان.

اۋعانستاننىڭ بەيبىت قۇرىلىسىنا ۇلەس قوسىپ جاتقان قازاقستاندىق ۋنيۆەرسيتەتتەردە ازاماتتىق ماماندىقتار بويىنشا ءبىلىم العان اۋعان ستۋدەنتتەرىنىڭ ماڭىزدى ءرولى اتاپ ءوتىلدى. وسىعان بايلانىستى اۋعان تاراپى ءبىلىم بەرۋ گرانتتارىنىڭ سانىن كوبەيتۋ تۋرالى ءوتىنىش ءبىلدىردى. 2010 جىلدان باستاپ 2021 جىلعا دەيىنگى كەزەڭدە قازاقستاندىق جوعارى وقۋ ورىندارىندا اۋعانستاننىڭ 1 مىڭنان استام ازاماتى ءبىلىم الادى.

اۋعانستان ەلشىسى اۋعانستان اۋماعىندا ەكىجاقتى ىسكەرلىك بايلانىستاردى دامىتۋعا، سونداي-اق، قازاقستاندىق بيزنەستىڭ اۋعانستانداعى جوبالارعا بەلسەندى قاتىسۋىنا ىقپال ەتە الاتىن، الماتى مەن قابىل اراسىندا تىكەلەي اۋە رەيستەرىن قايتا جاڭعىرتۋعا مۇددەلى ەكەندىگىن ايتتى.

م.ازيمي ەكىجاقتى ساۋدانى تىلگە تيەك ەتە وتىرىپ، قازاقستاننىڭ وڭىردەگى اۋعانستان ءۇشىن ەڭ ءىرى ساۋدا ارىپتەسى ەكەندىگىن اتاپ ءوتتى. اۋعان بيلىكتەرى قازاقستاندىق كومپانيالاردىڭ اۋعانستانداعى كەن ورىندارىن يگەرۋگە قاتىسۋىن قوسا العاندا، بىرلەسكەن جوبالارعا بارىنشا قولداۋ كورسەتۋگە دايىن ەكەندىگىن مالىمدەدى.

2018 جىلى قازاقستان مەن اۋعانستان اراسىنداعى تاۋار اينالىمى 520،6 ملن دوللاردى قۇرادى، ونىڭ ىشىندە ەكسپورت - 516،4 ملن دوللار، يمپورت - 4،2 ملن دوللار.

ايتا كەتەرلىك جايت، قازاقستاننىڭ «ينتەگرا» كومپانياسى 43 كم «گەرات – حاف» تەمىر جولىن سالۋ جونىندەگى تەندەردى جەڭىپ العان بولاتىن.

سوڭعى جاڭالىقتار

التىن قورىمىز كوبەيىپ كەلە جاتىر

قازاقستان • بۇگىن، 17:30

اقمولادا تاعى ءبىر ناۋقاس انىقتالدى

كوروناۆيرۋس • بۇگىن، 16:07

قارعىن سۋ بالكاشيندى باسىپ قالدى

ايماقتار • بۇگىن، 16:05

تاسقىننىڭ بۇگىنگى احۋالى

ايماقتار • بۇگىن، 15:42

سالەحاردتان كەلگەن تسيكلون

ايماقتار • بۇگىن، 15:30

ەلوردادا جالپى جاعداي تۇراقتى

كوروناۆيرۋس • بۇگىن، 14:50

فۋتبول ماۋسىمى جالعاسا ما؟

سپورت • بۇگىن، 14:48

ۇقساس جاڭالىقتار