يران بۇۇ-دان كۇماندانادى
سەنبى, 21 قاڭتار 2012 7:42
يراننىڭ يادروشى-عالىمى موستافا احمادي روشاندى ولتىرۋشىلەرگە بۇۇ-دان الىنعان اقپاراتتىڭ كومەگى تيگەن بولۋى مۇمكىن.
بۇل تۋرالى يراننىڭ بۇۇ-داعى تۇراقتى وكىلىنىڭ ورىنباسارى ەشاگا ءال-ءحابيبتىڭ مالىمدەمەسىنە سىلتەمە جاساي وتىرىپ, رەيتەر اگەنتتىگى حابارلاعان. ءال-ءحابيبتىڭ ايتۋىنشا, قانىشەر بۇۇ قاۋىپسىزدىك كەڭەسى مەن حالىقارالىق اتوم ەنەرگەتيكاسى جونىندەگى اگەنتتىكتىڭ مالىمەتتەر بازاسىنداعى اقپاراتتارعا قول جەتكىزگەن. ونىڭ ايتۋىنشا, حالىقارالىق ۇيىمدار يراندا جۇرگىزىلگەن ينسپەكتسيانىڭ مالىمەتتەرىن قۇپيا تۇردە ساقتاي الماي وتىر.
سەنبى, 21 قاڭتار 2012 7:42
يراننىڭ يادروشى-عالىمى موستافا احمادي روشاندى ولتىرۋشىلەرگە بۇۇ-دان الىنعان اقپاراتتىڭ كومەگى تيگەن بولۋى مۇمكىن.
بۇل تۋرالى يراننىڭ بۇۇ-داعى تۇراقتى وكىلىنىڭ ورىنباسارى ەشاگا ءال-ءحابيبتىڭ مالىمدەمەسىنە سىلتەمە جاساي وتىرىپ, رەيتەر اگەنتتىگى حابارلاعان. ءال-ءحابيبتىڭ ايتۋىنشا, قانىشەر بۇۇ قاۋىپسىزدىك كەڭەسى مەن حالىقارالىق اتوم ەنەرگەتيكاسى جونىندەگى اگەنتتىكتىڭ مالىمەتتەر بازاسىنداعى اقپاراتتارعا قول جەتكىزگەن. ونىڭ ايتۋىنشا, حالىقارالىق ۇيىمدار يراندا جۇرگىزىلگەن ينسپەكتسيانىڭ مالىمەتتەرىن قۇپيا تۇردە ساقتاي الماي وتىر.
اۋعانستانداعى تىكۇشاق اپاتى
اۋعانستاندا ناتو كونتينگەنتىنە قاراستى تىكۇشاق اپاتقا ۇشىراپ, سونىڭ سالدارىنان التى اسكەري قىزمەتشى قازا تاپقان.
وقيعا ەلدىڭ وڭتۇستىگىندەگى گيلمەند پروۆينتسياسىندا ورىن العان. قارۋلى كۇشتەر قولباسشىلىعى ازىرگە تىكۇشاقتىڭ اپاتقا ۇشىراۋ سەبەپتەرىن, سول سياقتى قازا تاپقان سولداتتاردىڭ قاي ۇلتتان ەكەنىن ايتۋدان باس تارتقان كورىنەدى. سونىمەن بىرگە 20 قاڭتار كۇنى تىكۇشاق قۇلاعان اۋداندا زاڭسىز قارۋلى قۇرىلىمدار مۇشەلەرىنىڭ بەلسەندىلىگىنىڭ بايقالماعانى دا بەلگىلى بولىپ وتىر.
پەرري باسەكەدەن باس تارتتى
تەحاس شتاتىنىڭ گۋبەرناتورى ريك پەرري رەسپۋبليكالىق پارتيا اتىنان اقش پرەزيدەنتتىگىنە كانديداتتىققا ۇسىنىلۋ قۇقى جولىنداعى كۇرەستەن باس تارتتى.
وڭتۇستىك كورولينادا وتكەن ءباسپاسوز ءماسليحاتىندا وسى جونىندە رەسمي مالىمدەمە جاساي وتىرىپ, پەرري ءوزىنىڭ رەسپۋبليكالىق پارتيادان تۇسەتىن كەلەسى كانديدات نيۋت گينگريچكە قولداۋ كورسەتەتىنىن حابارلاعان. وتكەن جىلدىڭ تامىزىندا ءوز كانديداتۋراسىن ۇسىنعىسى كەلەتىن نيەتىن بىلدىرگەن كەزدە پەرري وزگە ۇمىتكەر-رەسپۋبليكالىقتار اراسىنان از ۋاقىتقا بولسا دا قارا ءۇزىپ شىققان بولاتىن. بىراق حالىق الدىندا سويلەگەن سوزدەرىنىڭ السىزدىگى ونىڭ تانىمالدىعىنىڭ قۇلدىراپ كەتۋىنە اكەلىپ سوقتىردى.
پالەستينا تاۋەلسىزدىگىن مويىندادى
تايلاندتىڭ بۇۇ-داعى ميسسياسى پالەستينانىڭ تاۋەلسىزدىگىن مويىندايتىنىن مالىمدەگەن.
پالەستينا مەملەكەتى 1967 جىلعى شەكارالارى بويىنشا مويىندالىپ وتىر, ولاي بولسا ونىڭ قۇرامىنا يەرۋساليم عانا ەمەس, سونىمەن بىرگە يزرايلدىك ەلدى مەكەندەر بار اۋماقتار دا كىرۋگە ءتيىس. پالەستينا سىرتقى ىستەر ءمينيسترى رياد ءال-ماليكي بانگكوك ەل تاۋەلسىزدىگىن 131-ءشى بولىپ مويىندادى دەپ مالىمدەگەن. وسىعان دەيىن پالەستينانى ەڭ سوڭعى مويىنداعان ەل يسلانديا بولاتىن.
زاڭ جوباسىنان كىنارات تابىلدى
فرانتسيا سەناتىنىڭ كوميسسياسى باسىم داۋىسپەن ارميان گەنوتسيدىن جوققا شىعارعانى ءۇشىن جاۋاپكەرشىلىك ەنگىزۋدى قاراستىراتىن زاڭ جوباسى كونستيتۋتسياعا قايشى كەلەدى دەپ ەسەپتەيدى.
زاڭناما جونىندەگى كوميسسيا جەتەكشىسى جان-پەر سيۋەردىڭ ايتۋىنشا, ەگەر زاڭدى سەنات قابىلدانعان جاعدايدا ونىڭ ازاماتتاردىڭ, ءسوز ەركىندىگىن قوسا العانداعى, كونستيتۋتسيالىق قۇقىلارىن بۇرمالاۋ قاۋپى مول. تۇركيادا سەنات كوميسسياسىنىڭ ۇستانىمى جوعارى باعالانىپ وتىر. ايتا كەتۋ كەرەك, اتالعان زاڭ جوباسى بويىنشا داۋىس بەرۋ 23 قاڭتار كۇنى وتەتىن بولادى. بۇعان دەيىن, ياعني 2011 جىلدىڭ 22 جەلتوقسانىندا زاڭ جوباسىن ەل پارلامەنتىنىڭ تومەنگى پالاتاسى قۋاتتاعان بولاتىن.
تىڭشىلىعى ءۇشىن ەلدەن قۋىلدى
رەسەي مەن كانادا اراسىندا تۇتانعان تىڭشىلارعا قاتىستى جانجالدىڭ سوڭى ەكى رەسەيلىك ديپلوماتتىڭ وتتاۆادان شىعارىلۋىنا اپارىپ سوقتىردى.
كانادا ارنايى قىزمەتىنىڭ پايىمداۋىنا قاراعاندا, رەسەي ەلشىلىگىنىڭ قىزمەتكەرلەرى تاياۋدا عانا ورىس اگەنتتەرىنە قۇپيا مالىمەتتەر بەرۋ كەزىندە ۇستالعان اسكەري-تەڭىز بارلاۋ قىزمەتىنىڭ لەيتەنانتىمەن بايلانىستا بولعان. رەسەي ەلشىلىگىنىڭ ءتورت قىزمەتكەرى وتانىنا قايتارىلىپ وتىر. ولاردىڭ اراسىندا اتتاشە كونستانتين كولپاكوۆ پەن اسكەري اتتاشە, پودپولكوۆنيك دميتري فەدورچاتەنكو بار. ال قالعان ەكەۋى تەحنيكالىق قىزمەتكەرلەر.
سولتۇستىك يرلاندياداعى جارىلىس
سولتۇستىك يرلانديانىڭ لوندوندەرري قالاسىنىڭ ورتالىعىندا ەكى بىردەي جارىلىس بولدى.
بي-بي-سي تاراتقان مالىمەتتەرگە قاراعاندا, ءبىر بومبا ءىرى ساۋدا ورتالىعىنىڭ جانىندا, ەكىنشىسى مەملەكەتتىك عيماراتتار كەشەنى ماڭايىندا جارىلعان. توتەنشە وقيعا سالدارىنان زارداپ شەككەندەر جوق. ەكى ساعات بۇرىن تەررورلىق اكت بولاتىنى تۋرالى حابار العان پوليتسيا حالىقتى قاۋىپتى جەردەن كوشىرىپ ۇلگەرگەن. قازىرگى ۋاقىتتا بىردە-ءبىر ۇيىم تەراكت ءۇشىن جاۋاپكەرشىلىكتى ءوز مويىندارىنا الماي وتىر.
لوببيشىلەر دە تىركەلۋدەن وتەدى
«دەيلي تەلەگراف» باسىلىمىنىڭ حابارلاۋىنشا, ۇلىبريتانيا وكىمەتى لوببيشىلەر ءۇشىن ارنايى تىركەلۋ ەنگىزۋدى جوسپارلاپ وتىر.
باسىلىم قولىنا تۇسكەن قۇجاتتا كەلتىرىلگەندەي, «لوببيشى» ءسوزى كەڭ ماعىناعا يە بولعان كورىنەدى. كاسىپوداقتار, قايىرىمدىلىق ۇيىمدارى, ءتۇرلى قىسىم جاساۋ توپتارى مەن ساراپتاما ورتالىقتارى وسى ۇعىمعا ەنگىزىلگەن. ءتىركەلۋدەن وتكەننەن كەيىن ولارعا وزدەرىنىڭ قارجىلاندىرىلۋ كوزدەرىن اشۋلارىنا تۋرا كەلەدى. ءداستۇرلى ماعىناداعى لوببيشىگە كەلسەك, ولار ءوز كليەنتتەرىنىڭ اتى-جوندەرىن جاريالاۋعا ءماجبۇر بولماقشى. ال تىركەلۋدەن باس تارتۋ ەلەۋلى ايىپپۇلمەن نەمەسە ءتىپتى تۇرمەدە قاماۋ جولىمەن جازالاناتىن بولادى.
ينتەرنەت ماتەريالدارى نەگىزىندە ازىرلەندى.
