اكىم جاڭا باعدارلامانىڭ ماڭىزدىلىعىن اتاپ ءوتىپ, باستى ماقسات – حالىقتىڭ تۇرمىس دەڭگەيىن ارتتىرۋ ەكەندىگىن باسا ايتتى. ءوڭىر باسشىسى الدىمەن مونوقالالاردى دامىتۋ, تۇرعىن ءۇي قۇرىلىسى بويىنشا وڭىردە اتقارىلىپ جاتقان جۇمىستاردى جانداندىرۋ كەرەكتىگىنە توقتالدى. سونداي-اق, وبلىستاعى كوپبالالى وتباسىلاردىڭ دەرەكقورىن قايتا تۇگەندەۋ كەرەكتىگى ايتىلدى. بۇگىنگى تاڭدا وبلىس بويىنشا 44 مىڭ كوپبالالى جانە 14852 از قامتاماسىز ەتىلگەن وتباسى بار دەسەك, ءوڭىر باسشىسى بۇل تسيفردى قايتا ناقتىلاۋ كەرەكتىگىن ەسكەرتتى. بۇعان دەيىن تاراز قالاسى بويىنشا 11 ارنايى توپ قۇرىلىپ, قالاداعى بارلىق 4620 وتباسىنى تۇگەلدەي ارالاپ شىققان. ءدال وسىنداي تۇگەندەۋ جۇمىستارى اۋداندار مەن اۋىلدار دەڭگەيىندە دە مۇقيات اتقارىلۋ كەرەك.
اسقار مىرزاحمەتوۆ كوپبالالى جانە از قامتىلعان وتباسىلاردىڭ 70 پايىزى اۋىلدى جەرلەردە تۇراتىنىن ەسكەرىپ, الەۋمەتتىك جاردەماقىدان بولەك, ولاردى جۇمىسپەن قامتۋ شارالارىنا بارىنشا تارتۋ قاجەتتىلىگىن اتاپ ءوتتى. ەلباسى تاپسىرماسىنا سايكەس اۋىلداردى دامىتۋ, بولاشاعى بار اۋىلداردى ىرىكتەۋ بويىنشا دا ناقتى جۇمىستار قولعا الىنباق. ول ءۇشىن ءار اۋىلدىق وكرۋگتەن ءبىر-ءبىر اۋىل شارۋاشىلىق كووپەراتيۆتەرىن قۇرۋدىڭ وزەكتىلىگى ءسوز بولدى. بۇل باعىتتا از اقشا ءبولىنىپ وتىرعان جوق. تەك اۋدان اكىمدەرى تاراپىنان ۇيلەستىرۋ جۇمىستارىن شيراتۋ قاجەت.
سونداي-اق, جيىندا ەلباسى باعدارلاماسىنداعى تۇرعىنداردى تازا اۋىز سۋ, كەڭ اۋقىمدى گازداندىرۋ, ساپالى دەنساۋلىق ساقتاۋ قىزمەتىنە قولجەتىمدىلىكتى قامتاماسىز ەتۋ, بارلىق دەڭگەيدەگى اكىمدەردىڭ جۇمىسىن جانداندىرۋ باعىتىنداعى تاپسىرمالاردى ورىنداۋ شارالارى دا جان-جاقتى قاۋزالدى. ايتا كەتۋ كەرەك, بۇل باعىتتارداعى جۇمىستاردى جۇيەلەۋ وبلىستا وتكەن جىلدان-اق قولعا الىنعانى بەلگىلى. ناتيجەسىندە بىلتىر اۋىز سۋ بويىنشا 10 نىسان پايدالانۋعا بەرىلدى. ناقتى تالداۋلاردىڭ ارقاسىندا اۋىز سۋ قۇبىرىنا قوسىلماي وتىرعان 149 مىڭ تۇرعىن انىقتالىپ, ونىڭ 7 مىڭى اۋىز سۋمەن قامتىلدى. بۇل ورايدا بيىل 50 مىڭ تۇرعىندى قامتۋ جوسپارلانۋدا. ال, گازداندىرۋعا كەلەتىن بولساق, بىلتىر قۇنى 43 ميلليارد تەڭگەنى قۇرايتىن 84 ەلدى مەكەندەردى گازداندىرۋدىڭ جوبالىق سمەتالىق قۇجاتتارى دايىندالعان. اعىمداعى جىلى بۇل ەلدى مەكەندەرگە گاز قۇبىرى قۇرىلىسىن جۇرگىزۋ جۇمىستارى باستاۋ الماق. 3 جىلعا جوسپارلانعان بۇل جۇمىستار ىسكە اسقان جاعدايدا وبلىستاعى گازداندىرۋ كورسەتكىشى 48 پايىزدان 70 پايىزعا ارتپاق. سول سەكىلدى وتكەن جىلى وڭىردە 39 مەديتسينالىق نىسان سالىنىپ, پايدالانۋعا بەرىلدى دەسەك, الداعى ءبىر جارىم جىلدا قالعان 60 ەلدى مەكەن العاشقى مەديتسينالىق كومەك كورسەتەتىن نىساندارمەن تولىعىمەن قامتىلماق. اۋدان جانە اۋىلدىق وكرۋگ اكىمدەرىنىڭ جۇمىس ناتيجەلىلىگىن ارتىرۋ ءۇشىن ارنايى جۇيەنى بەكىتۋ ءىسى دە قولعا الىنعان.
جيىندا اسقار مىرزاحمەتوۆ ەلباسى باعدارلاماسىنداعى تاپسىرمالاردى ءوڭىر دەڭگەيىندە جەمىستى جۇزەگە اسىرۋ ءۇشىن بارلىق باعىتتاعى جۇمىستاردى جانداندىرۋ كەرەكتىگىنە توقتالدى. ول ءۇشىن ەسەپ-قيساپ شارالارى اتقارىلىپ, ءىس-شارالار جوباسى بەكىتىلمەك. ءوڭىر باسشىسى بيىلعى بارلىق ينديكاتورلىق كورسەتكىشتەردى ورىنداۋ جولىندا وسى باعىتقا اسا باسىمدىق بەرىلەتىنىن باسا ايتتى.
حاميت ەسامان,
«Egemen Qazagstan»
جامبىل وبلىسى
