«قوستانايدا شاڭعى سپورتى كەڭ ءورىس العان. اتاقتى يۆان گارانين, ولگا سەلەزنەۆانىڭ جەڭىستەرى قوستانايدىڭ اتاعىن الىستارعا ءماشھۇر ەتكەن ەدى. جەرلەسىمىز الەكساندر كوليادين پاراليمپيادادا چەمپيون اتانىپ, مىقتىلىق پەن شىنىعۋدىڭ, ەڭبەكتىڭ قۇدىرەتىن تاعى ءبىر دالەلدەدى. بۇلاردان باسقا بۇگىندە جاستارىمىز دا قىسقى سپورتقا بەلسەنە قاتىسىپ, وبلىس اتىن شىعارىپ ءجۇر. مىسالى شورت-ترەكتەن جاسوسپىرىمدەر اراسىندا وتكەن الەم چەمپيوناتىندا الەنا ۆولكوۆيتسكايا, حاديشا باقتىگەرەەۆا, گلەب يششەنكولار حالىقارالىق سپورت شەبەرى نورماسىن ورىندادى. ال وڭتۇستىك ساحاليندە وتكەن تۇڭعىش قىسقى حالىقارالىق «ازيا بالالارى» ويىندارىندا شاڭعى تەبۋگە قاتىسقان پاششەنكو ۆالەريا, شورت-ترەكتەن ۆاديم سادوۆنيكوۆ التىن مەدالدى جەڭىپ الدى. وسىنداي جەتىستىكتەردىڭ بارلىعى دا جاس كەزىنەن شىنىعۋدىڭ ارقاسىندا مۇمكىن بولادى. سوندىقتان بۇگىنگىدەي بۇقارالىق سيپات الىپ وتىرعان شاڭعى مەرەكەسىنىڭ ماڭىزى زور» دەدى مارات قونىسباي ۇلى.
شاڭعى فەستيۆالىنىڭ اۋىلدىق, اۋداندىق ساتىلارى ون بەس مىڭداي ادامدى قامتىدى. وبلىس ورتالىعىندا باستالعان فەستيۆالدە مىڭ قارالى ادام شاڭعى جولدارىنا شىقتى. جالپى وبلىس وڭىرىندە بەس مىڭداي ادام شاڭعى سپورتىمەن اينالىسادى. فەستيۆالگە تەك جاستار عانا ەمەس, شاڭعى اۋەسقويلارى جانە كاسىپورىن مەن مەكەمەلەر قىزمەتكەرلەرى, ستۋدەنتتەر مەن وقۋشىلار دا قاتىستى.
«وبلىستىق قوعامدىق دەنساۋلىق ساقتاۋ دەپارتامەنتىنەن بۇگىنگى فەستيۆالگە 17 قىزمەتكەر قاتىسىپ وتىر. ولاردىڭ بارلىعى دا شاڭعى سورەسىنەن كورىندى. ءبىز الدىمەن قىسقى سپورتتىڭ دەنساۋلىق كەپىلىنىڭ ءبىرى ەكەنىن كورسەتكىمىز كەلدى» دەيدى وسى دەپارتامەنتتىڭ ديرەكتورى ورال بەكماعامبەتوۆ.
فەستيۆال ەرتەڭ جالعاساتىن بولادى.
ءنازيرا جارىمبەت,
«ەگەمەن قازاقستان»
قوستاناي
