ەكى كۇن بۇرىن «بارىس» اتالمىش قارسىلاسىنان 4:1 ەسەبىمەن باسىم ءتۇستى.
سوندىقتان «تورپەدو» بۇگىنگى ويىندا ەسە قايتارۋعا تىرىساتىنى بەلگىلى ەدى. نيجني نوۆگورود قالاسىنىڭ كومانداسى ءدال سولاي جاساۋعا بارىن سالدى.
كەزدەسۋ باستالعاندا قوس كوماندا دا ويىن تىزگىنىن ءوز قولىندا ۇستاۋعا تىرىستى. كوپ جاعدايدا «بارىستىڭ» باسىمدىعى بايقالىپ تۇردى. دەگەنمەن ولار قورعانىس شەبىندە قاتەلىككە ءجيى بوي الدىردى. سونداي ءساتتىڭ بىرىندە «تورپەدو» حوككەيشىسى انتون ۆولچەنكوۆتىڭ قانجىعاسى مايلاندى.
وسىلايشا رەسەيلىك كوماندا العا شىقتى. بۇدان كەيىن «بارىس» جىگىتتەرى شابۋىلدا كوبىرەك بوي كورسەتتى. الايدا دەگەنىنە جەتە العان جوق. ەسەسىنە ءبىرىنشى كەزەڭنىڭ سوڭىنا تامان «تورپەدو» تاعى ءبىر شايبا سوعىپ كەتتى. بۇل گول 18-مينۋتتا ميحايل ۆارناكوۆتىڭ ەنشىسىنە جازىلدى.
ەكىنشى كەزەڭدە «تورپەدو» باسىمدىعىن ارتتىرا ءتۇستى. ەكىنشى كەزەڭنىڭ باستالعانىنا ءبىر مينۋت وتپەستەن روبەرت سابوليچ ءبىزدىڭ قاقپادان ساڭىلاۋ تاپتى. ول 26-مينۋتتا ەسەپتى بۇدان دا ۇلعايتا ءتۇستى. وسىلايشا تابلودا «تورپەدونىڭ» باسىمدىعىن كورسەتكەن 0:4 ەسەبى جازىلىپ تۇردى. ويىن بارىسىندا ەلوردالىق حوككەيشىلەردىڭ شابۋىلى كوبىرەك ءوربىپ جاتتى. دەسە دە قورعانىس شەبىندەگى قاتەلىك كوزگە انىق كورىندى. سوعىلعان شايبانىڭ بارلىعى وسىنداي قاتەلىكتەر سالدارىنان بولدى. ءوز قاقپاسىنا ءتورت شايبا سوقتىرىپ العان «بارىس» ەندى العا ۇمتىلماسا, جەڭىستىڭ اۋىلى ۇزاپ كەتەتىنىن انىق ءتۇسىندى. ناتيجەسىندە 28-مينۋتتا انتون ساگادەەۆ قارسىلاستار قاقپاسىن ءدال كوزدەدى. ال 32-مينۋتتا دميتري شەۆچەنكو ەسەپ ايىرماسىن قىسقارتتى. ەسەپ 2:4.
ءۇشىنشى كەزەڭدە «بارىس» حوككەيشىلەرى العا ۇمتىلدى. دەگەنمەن ءوز ويلاعاندارىن جۇزەگە اسىرا العان جوق. كەيبىر ۋاقىتتا ساتتىلىك جەتىسپەي جاتتى. ال 54-مينۋتتا «بارىس» ساپىنان داررەن ديتس «تورپەدو» قاقپاسىنان ساڭىلاۋ تاپتى. ەسەپ 3:4. ەندى ءبىزدىڭ كومانداعا تارازى باسىن تەڭەستىرۋگە مۇمكىندىك تۋدى. «بارىس» حوككەيشىسى مەتتيۋ فرەتتين 59-مينۋتتا تارازى باسىن تەڭەستىردى. ەلوردالىق جىگىتتەر 0:4 ەسەبىمەن جەڭىلىپ جاتىپ, وسىلايشا ەسەپتى تەڭەستىرۋگە مۇمكىندىك الدى. ويىن وۆەرتمايعا ۇلاستى. جەڭىس شايباسىن رومان ستارچەنكو سوقتى. وسىلايشا «بارىس» قارسىلاسىنان ەكىنشى ويىن قاتارىنان باسىم ءتۇستى.
