ەلباسىمىز ن.ءا.نازارباەۆ ءوز سوزىندە: «زاماناۋي تۇرعىدا دەنساۋلىقتى ساقتاۋ قىمبات, ستاتسيونارلىق ەمگە ەمەس, سىرقاتتاردى ساۋىقتاندىرۋ ىسىنە بەيىمدەلۋ كەرەك» دەپ اتاپ ايتقان ەدى. بۇگىنگى تاڭدا ەلىمىزدەگى ەمدەۋ مەكەمەلەرى حالىقارالىق ستاندارتتارعا ساي مەديتسينالىق قۇرىلعىلارمەن جابدىقتالعان. مەديتسينا سالاسىنىڭ ماماندارىن دايارلاۋ دەڭگەيى دە تۇرعىندارعا ساپالى دارىگەرلىك كومەك كورسەتۋگە كەپىلدىك بەرىپ وتىر. ونىڭ زاماناۋي تسيفرلىق جۇيەگە كوشىرىلۋى – جۇرتشىلىقپەن اراداعى بايلانىستى جاقسارتىپ, جۇمىستى ءتيىمدى تۇردە جوسپارلاۋعا, دارىگەرلىك قىزمەتتى وڭتايلاندىرىپ, ساپاسىن ارتتىرۋعا ءوز سەپتىگىن تيگىزۋدە.
بۇل ورايدا تسەلينوگراد اۋدانىندا دا ءبىرشاما جۇيەلى ىستەر قولعا الىنعان. قوياندىداعى دارىگەرلىك امبۋلاتوريا اعىمداعى جىلدىڭ قاڭتارىنان باستاپ جۇرتشىلىققا, سونىڭ ىشىندە بالالار مەن ەرەسەكتەرگە بىردەي قىزمەت كورسەتىپ كەلەدى. اتاپ ايتقاندا, العاشقى مەديتسينالىق-سانيتارلىق كومەكتەن باستاپ, تەراپەۆت, ەندوكرينولوگ, كارديولوگ, وفتالمولوگ, اكۋشەر-گينەكولوگ, بالالار دارىگەرلەرى ماماندىقتارى بويىنشا سىرقاتتارعا كومەك كورسەتىلەدى.
ورتالىقتا سونىمەن قاتار, جوعارى كاتەگوريالى حيرۋرگ, ۋرولوگ جانە ورتوپەد-تراۆموتولوگ سياقتى ماماندار ناۋقاستاردى قابىلداپ, كەڭەس بەرەدى. مۇندا رەسپۋبليكالىق بيۋدجەتتەن قارجى بولىنۋىنە بايلانىستى مەديتسينالىق قىزمەتتەر تەگىن كورسەتىلەدى. 2017 جىلى پايدالانۋعا بەرىلگەن وسى دەنساۋلىق ورتالىعى ەكى قاباتتى عيماراتتا ورنالاسقان, جالپى اۋماعى 400 شارشى مەتردى قۇرايدى.
بايقال ءبايادىل,
«Egemen Qazaqstan»
تسەلينوگراد اۋدانى
اقمولا وبلىسى
