ءۇش كۇنگە سوزىلعان عىلىمي باسقوسۋعا ازەربايجان, قازاقستان, قىرعىزستان, تۇركيا ەلدەرى ءبىلىم جانە عىلىم مينيسترلىكتەرىنىڭ وكىلدەرى, ساراپشى-عالىمدار قاتىستى.
وقۋلىق باعدارلاماسىن تالقىلاۋعا ارنالعان باسقوسۋدا سويلەگەن سوزىندە اكادەميا باسشىسى دارحان قىدىرالى: «بۇگىن ءبىز تالقىلاپ وتىرعان وقۋلىق ارقىلى بالالارىمىزدىڭ بويىندا سوناۋ وتۇكەننەن باستالىپ, بالقانعا دەيىن سوزىلعان كەڭ گەوگرافيالىق مەكەنگە, كيەلى جەرلەرگە قاتىستى كوزقاراس قالىپتاسادى. بۇل - ءبارىمىز ءۇشىن ۇلكەن ولجا, بايلىق», - دەدى. سونىمەن قاتار ۇيىم باسشىسى وقۋ باعدارلاماسى ءساتتى دايارلانسا, وقۋلىقتىڭ دا ساپالى بولارىن اتاپ ءوتتى.
جيىندا ساراپشىلار تۇركى كەڭەسىنە مۇشە ەلدەردىڭ مەكتەپتەرىندە فاكۋلتاتيۆتىك ءپان رەتىندە وقىتىلاتىن «تۇركى الەمى گەوگرافياسى» وقۋلىعى مەن وقۋ باعدارلاماسىنا قاتىستى ويلارىمەن ءبولىستى. تۇركى مەملەكەتتەرىندە گەوگرافيا ءپانىن وقىتۋدىڭ ەرەكشەلىكتەرىن ورتاعا سالدى. سونداي-اق ساراپشىلار حالىقارالىق تۇركى اكادەمياسىنىڭ ورتاق وقۋلىقتى ازىرلەۋدە ىقتياتتىلىق كورسەتىپ, جۇيەلى قىزمەت اتقارعانىنا ريزاشىلىقتارىن ءبىلدىردى.
ەستەرىڭىزگە سالار بولساق, «تۇركى الەمى گەوگرافياسى» وقۋلىعى مەن وقۋ باعدارلاماسى 2018 جىلدىڭ 3 قىركۇيەگىندە شولپان-اتادا وتكەن تۇركى كەڭەسى مەملەكەت باسشىلارىنىڭ ءVI سامميتى دەكلاراتسياسى مەن تۇركى كەڭەسى ءبىلىم مينيسترلەرىنىڭ 2015 جىلعى 5 قىركۇيەكتە استانادا وتكەن ءتورتىنشى باسقوسۋىندا قابىلدانعان شەشىمگە سايكەس ازىرلەنۋدە. بۇدان بۇرىن TWESCO «ورتاق تۇركى تاريحى» جانە «ورتاق تۇركى ادەبيەتى» وقۋلىقتارىن ازىرلەگەن بولاتىن.
