قازاقستان • 26 اقپان، 2019

سولتۇستىك قازاقستاندا 90-نان استام اۋىلدى سۋ باسۋ قاۋپى بار

315 رەتكورسەتىلدى

توتەنشە جاعدايلار جونىندەگى دەپارتامەنت ماماندارىنىڭ ايتۋلارىنا قاراعاندا قىزىلجار وڭىرىندە سۋ تاسقىنىنىڭ قاۋپى جوعارى بولۋى ىقتيمال.

بۇل بولجامدى جەرگىلىكتى سينوپتيكتەر دە جوققا شىعارمايدى. ويتكەنى، قاردىڭ كوپ جاۋىنا بايلانىستى سۋ تاسقىنى ورتاشا جىلدىق كورسەتكىشتەن جوعارى بولاتىن ءتۇرى بار.وسى جاعدايلار ەسكەرىلىپ، بيىل قارعىن سۋعا توسقاۋىل قويۋ شارالارىن ءجىتى  جۇرگىزۋ ءۇشىن  رەسپۋبليكالىق بيۋدجەتتەن 400 ميلليون تەڭگەدەي قاراجات بولىنگەن.

«مونيتورينگ قورىتىندىسى بويىنشا  90-نان استام ەلدى مەكەننىڭ قاۋىپتى ايماققا جاتاتىنى، ال تىكەلەي وزەن ساعالارىندا ورنالاسقان18 اۋىلدىق جەرلەردە قورعانىس شارالارىن قۇرۋ مۇمكىن ەمەس ەكەنى انىقتالدى. سوعان قاراماستان تاسقىننىڭ الدىن الۋدىڭ، ادامداردى قاۋىپسىز جەرلەرگە ورنالاستىرۋدىڭ  بارلىق جۇمىستارى اتقارىلادى»، دەيدى وبلىستىق  توتەنشە جاعدايلار جونىندەگى دەپارتامەنتتىڭ باستىعى راميل كامالوۆ.

ەۆاكۋاتسيالىق كوميسسيانىڭ وتىرىسىندا  توتەنشە جاعداي كەزىندەگى تۇرعىنداردىڭ قاۋىپسىزدىگىن قامتاماسىز ەتۋدەگى دايىندىق جايى تالقىلانىپ،  ءىس-قيمىل جوسپارىنا  بىرقاتار تۇزەتۋلەر ەنگىزىلدى. پەتروپاۆل قالاسى، ەسىل، تايىنشا، اققايىڭ اۋداندارى سۋ تاسقىنى قاۋپى اناعۇرلىم جوعارى ايماقتارعا جاتقىزىلدى.  ءۋاليحانوۆ اۋدانىنداعى بوگەت كۇردەلى جوندەۋدەن وتكىزىلىپتى. جولدار نىعىزدالىپ، نىعايتىلىپتى. بۇل ماقساتتار ءۇشىن جەرگىلىكتى قازىنادان دا قارجى قاراستىرىلعان. سوڭعى 4 جىل ىشىندە 84 اۋىلدا سۋدان قورعانىس بەكەتتەرى تۇرعىزىلعان.

وبلىستىق اكىمدىكتىڭ وتىرىسىندا ايماق باسشىسى قۇمار ىرگەباەۆ  ايتىپ كەلمەيتىن اپاتتىڭ الدىن الۋ، زاردابىن ازايتۋ، ەلدى مەكەندەردى قورعاۋ، ادام، مال شىعىنىن بولدىرماۋ، تۇرعىنداردىڭ قالىپتى ءومىر سۇرۋىنە جاعداي جاساۋ ماسەلەلەرىن ەرەكشە ەسكەرتىپ، ءتيىستى ورىندارعا بىرقاتار مىندەتتەر جۇكتەدى.

وبلىستىق  تجد قاراماعىندا 45 تەحنيكا، جەكە قۇرامداردا 255 ادام، 10 ءجۇزۋ قۇرالى بار.

«كوكتەم-2019» رەسپۋبليكالىق كوماندالىق-شتابتىق وقۋ-جاتتىعۋ شاراسى اياسىندا قۇتقارۋشىلاردىڭ كاسىبي ازىرلىكتەرى تەكسەرىلدى.

ءومىر ەسقالي،

«ەگەمەن قازاقستان»

سولتۇستىك قازاقستان وبلىسى

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار