وسىلايشا, الماتىدا باستالعان ءۇش كۇنگى قوعامدىق قابىلداۋ بارىسىندا بيزنەس وكىلدەرى مەملەكەتتىك ورگاندارمەن ءبىر الاڭدا وزدەرىن تولعاندىرعان ماسەلەلەر بويىنشا پىكىر الماستى. ۇلتتىق ەكونوميكا مينيسترلىگىنىڭ دەپارتامەنت ديرەكتورى اسلانبەك جاقىپوۆ وسى كەزدەسۋدە كاسىپكەرلەر تاراپىنان ايتىلعان كوپتەگەن ساۋالدى تىڭداپ, ۇسىنىس-پىكىرلەرىنە نازار اۋداردى. وتىرىستىڭ وزەكتى تاقىرىبىنا اينالعان جەر ءبولۋ, ساۋلەتتەندىرۋ, سالىق, جارناما ماسەلەسى مەملەكەتتىك ورگانداردىڭ نازارىنا الىندى.
«اتامەكەن» ۇقپ الماتى قالاسى كاسىپكەرلەر پالاتاسى ديرەكتورىنىڭ قۇقىقتىق ماسەلەلەر جونىندەگى ديرەكتورى ايتۋار قوشمامبەتوۆتىڭ ايتۋىنشا, 2014 جىلدان بەرگى ارالىقتا كاسىپكەرلەردى تولعاندىرعان ماسەلەلەردىڭ ارنايى تىزبەسى جاسالعان. ولاردىڭ قاتارىندا سىرتقى جارناما تولەماقىسى, ساۋدا نۇكتەلەرىنە تۇتىنۋشىلاردىڭ قولجەتىمسىزدىگى, قالا بويىنشا سالىق كولەمىنىڭ جوعارىلىعى, اۆتوتۇراق, ت.ب. ماسەلەلەر بار. بۇگىنگى كۇنگە دەيىن جارناما ورنالاستىرۋدا تۇيتكىلدى جايتتار كوپ. وسى ورايدا جۇرگىزىلگەن كەلىسىمدەر بويىنشا كاسىپكەرلەردىڭ ەرىكتى تۇردە رۇقسات الىپ, سالىق تولەۋىنە وراي ارنايى حات جولداناتىن بولادى. بيزنەس سالاسىنىڭ جۇمىسىنا بىرقاتار كەدەرگى كەلتىرىپ وتىرعان قالاداعى اۆتوتۇراقتاردىڭ قولايسىزدىعى دا وزەكتى جايت. وسى باعىتتا دا قولعا الىنعان شارالار ءوز شەشىمىن تاۋىپ كەلەدى. ال كاسىپكەرلەر پالاتاسىنا سوڭعى ءۇش جىلدا بەلگىلەنگەن سالىق كولەمىن تومەندەتۋگە بايلانىستى تۇسكەن وتىنىشتەرگە وراي ءتيىستى ورگاندار تاراپىنان ارنايى جۇمىستار جۇرگىزىلۋدە.
قاراعاندى وبلىسى كاسىپكەرلەر پالاتاسىنىڭ ديرەكتورى, ساراپشى گۇلنار قۇربانباەۆانىڭ ايتۋىنشا, بۇگىندە كاسىپكەرلىك سالاسىندا مەمەلەكەتتىك باقىلاۋ ورگاندارى تاراپىنان كەتەتىن كەمشىلىكتەر جەتكىلىكتى. سونىمەن قاتار جەر ءبولۋ, تەحنيكالىق رۇقسات قۇجاتتارىن بەرۋ, توقساندىق ەسەپ وتكىزۋ كەزىندەگى ءجيى بولاتىن وزگەرىستەر, سالىقتىڭ كوبەيۋى, جارناماعا سالىناتىن ايىپپۇلدار كاسىپكەرلەردىڭ نارازىلىعىن تۋعىزۋدا. ال كاسىپكەرلەرگە جۇيەسىز, ورىنسىز سالماقتىڭ ءتۇسۋى كولەڭكەلى بيزنەسكە جول اشاتىنى ءسوزسىز. سونىڭ سالدارىنان بيۋدجەت سالىقتان قاعىلىپ, تۇتىنۋشى ساپاسىز تاۋارعا تاپ بولادى. مۇنىڭ سىرتىندا الەۋمەتتىك ماسەلەلەر دە جەتكىلىكتى.
ال قازاقستان كاسىپكەرلەرى فورۋمى ديرەكتورىنىڭ ورىنباسارى گۇلنار قۋانعانوۆا بۇگىنگى بيزنەستىڭ تىنىسىن ءدوپ باسقاندا مەملەكەتتىك قولداۋ كىمدەرگە جاسالادى, سۋبسيديالار كىمدەرگە بەرىلەدى دەگەن ساۋالدار مازالايتىندىعىنا توقتالدى. سەبەبى, سۋبسيديالاردىڭ قولجەتىمسىزدىگى تۋرالى ماسەلە سوڭعى ۋاقىتتا كاسىپكەرلەردى ءجيى تولعاندىرىپ كەلەدى.
كاسىپكەرلەر مەن بيزنەس وكىلدەرىنىڭ اشىق الاڭى كوكەيدە جۇرگەن ارى شەشىمىن تاپپاي كەلگەن بىرقاتار ماسەلەنىڭ وڭ شەشىمىن تابۋىنا ىقپال ەتىپ, ءتيىستى ورگاندار قاپەرگە الماي وتىرعان جايتتارعا قوزعاۋ سالدى.
ەلۆيرا سەرىكقىزى,
الماتى
