ءبىر عانا تۇركىستان وڭىرىندە پارتيانى قولدايتىن ميلليونداعان ازامات ەڭبەك ەتۋدە. ساياسي ۇيىمنىڭ بۇگىنگىدەي بيىك دارەجەگە جەتۋىنە ءوز مۇمكىندىگىمە قاراي ۇلەس قوسىپ كەلەمىن. 2003-2006 جىلدارى پارتيانىڭ وڭتۇستىك قازاقستان وبلىسى فيليالىن باسقاردىم. وسى جىلدارى ءار ەلدى مەكەندە, ءىرى مەكەمەلەردە باستاۋىش پارتيا ۇيىمدارىن اشىپ, مۇشەلىككە لايىقتى ازاماتتاردى تارتتىق. سول ءۇش جىلدا پارتيا مۇشەلەرىنىڭ سانىن 700 مىڭعا جەتكىزگەن ەدىك. ال قازىرگى تاڭدا تۇركىستان وبلىسىندا پارتيانىڭ 255 باستاۋىش ۇيىمى, ميلليونعا جۋىق مۇشەسى بار. العاشقى قۇرىلعان كۇننەن بەرى پارتيا حالىقپەن بىرگە بارلىق سىنداردان, قيىندىقتاردان ءوتىپ, وسىنداي بەلەسكە كوتەرىلىپ وتىر. ەلباسى ن.نازارباەۆ ءوزىنىڭ ءبىر سوزىندە «نۇر وتان» پارتياسى ۇلكەن, ناعىز ساياسي كۇش رەتىندە حالىقتى, حالىقتىڭ كۇش-جىگەرىن «قازاقستان-2050» ستراتەگياسىندا ايتىلعان ۇلكەن ماقساتتارعا جەتۋ ءۇشىن بىرىكتىرۋ كەرەك ەكەنىن ايتقان بولاتىن, ياعني ساياسي ۇيىمنىڭ الدىنداعى باستى ماقسات – مەملەكەت باسشىسىنىڭ, مەملەكەتتىڭ ساياساتىن حالىققا جەتكىزۋ, ناسيحاتتاۋ, حالىقتىڭ كۇش-جىگەرىن ءبىر ارناعا توعىستىرۋ, ءبىر مۇددەگە بىرىكتىرۋ. جانە وسى جىلداردا پارتيا جۇمىسى نەگىزگى مىندەتتەردى ورىنداۋ باعىتىندا اشىقتىق, جاۋاپكەرشىلىك, ناتيجەلىلىك, ەسەپتىلىك قاعيدالارىمەن جۇرگىزىلىپ كەلەدى. ەڭ باستىسى, حالىقتىڭ سەنىمى مەن قولداۋى ايقىن سەزىلەدى. ويتكەنى بەرىلگەن بارلىق ۋادەلەر ءاردايىم ورىندالۋدا, ناتيجەلى جۇمىستار تۇراقتى تۇردە اتقارىلۋدا. پارتيانى حالىققا جاقىن ەتە تۇسكەن جوبالار دا ءوز جەمىسىن بەرۋدە. مىسالى, جەرگىلىكتى جەرلەردەگى قوعامدىق قابىلداۋ بولىمدەرى تۇرعىندارمەن تىعىز بايلانىستا جۇمىس ىستەدى. ءاربىر ازامات ءوزىن مازالاپ جۇرگەن نەمەسە جەكە ومىرىندە تۋىنداعان ماسەلەلەر بويىنشا قوعامدىق قابىلداۋ بولىمدەرىنىڭ كومەگىنە جۇگىنە الدى. وندا ءتيىستى سالا باسشىلارىمەن, قۇقىق قورعاۋ ورگاندارى وكىلدەرىمەن, پارلامەنت دەپۋتاتتارىمەن كەزدەسۋگە, ءوز ماسەلەسىن ايتۋعا مۇمكىندىك جاسالدى. قوعامدىق بولىمدە كوتەرىلگەن ماسەلەلەر زاڭدى شەشىمىن تاۋىپ جاتتى. ياعني, ساياسي ۇيىم حالىقپەن جۇمىس ىستەۋدىڭ ناقتى ۇلگىسىن كورسەتتى. جاستار ساياساتى, از قامتىلعان وتباسىلار, جۇمىسپەن قامتۋ, باسپانا سىندى الەۋمەتتىك ماسەلەلەر ساياسي ۇيىمنىڭ نازارىنان تىس قالعان ەمەس.
وسى جىلدارى حالقىمىزدىڭ سەنىمىنە يە بولعان, جاقسى باستامالاردىڭ جارشىسى بولا بىلگەن پارتيا ۋاقىتشا تۋىنداعان قيىن كەزەڭدەردە دە تۇرعىنداردىڭ جانىنان تابىلا الدى. بۇگىندە نۇروتاندىقتار ەلباسى نۇرسۇلتان نازارباەۆتىڭ ءاربىر جولداۋلارى مەن ۇلت جوسپارىن, «ماڭگىلىك ەل» ۇلتتىق يدەياسىن, «بولاشاققا باعدار: رۋحاني جاڭعىرۋ», «پرەزيدەنتتىڭ بەس الەۋمەتتىك باستاماسى», « ۇلى دالانىڭ جەتى قىرى» اتتى باستامالارىنان تۋىندايتىن مىندەتتەردى ورىنداۋ جولىندا ۇلكەن جۇمىس اتقارىپ كەلەدى. ەلىمىزدىڭ نەگىزگى قۇندىلىقتارى مەملەكەتتىك تاۋەلسىزدىگىمىز, كەلىسىمى مەن اۋىزبىرشىلىگى, تاتۋلىعى, مەملەكەت ەكونوميكاسى مەن ەلدىڭ الەۋمەتتىك الەۋەتىنىڭ جاقسارۋى دەيتىن بولساق, وندا سول بەيبىتشىلىگىمىز بەن تاتۋلىعىمىزدى ساقتاپ, نىعايتۋعا اتسالىسىپ جۇرگەن ساياسي ۇيىمداردىڭ بىرەگەيى – «نۇر وتان» پارتياسى.
شالاتاي مىرزاحمەتوۆ,
«نۇر وتان» پارتياسى تۇركىستان وبلىستىق فيليالى ساياسي كەڭەسىنىڭ مۇشەسى
