«مەملەكەتتىك كورپوراتسيا – ەلىمىزدىڭ بارلىق ايماعىن قامتىعان بىرەگەي ۇيىم. 18 مىڭ جۇمىسشى مەملەكەتتىك قىزمەتتەردىڭ ساپالى كورسەتىلۋىنە ءوز ۇلەسىن قوسىپ ءجۇر. ولاردىڭ ارقايسىسىنىڭ يننوۆاتسيالىق يدەياسى مەن ۇسىنىسى قاشاندا قولداۋ تابادى. جۇزەگە اسقان بىرنەشە جوبا – وسىنىڭ دالەلى», دەپ ءوتتى Town hall شاراسىنىڭ اشىلۋى بارىسىندا ءسوز سويلەگەن مەملەكەتتىك كورپوراتسيانىڭ باسقارما توراعاسى ابىلايحان وسپانوۆ.
بىرەگەي يدەيا اۆتورلارىنىڭ ءبىرى – ءانۋار قوجاحمەتوۆ. ول قىزمەتكەرلەردىڭ ەمحانادان الاتىن ەڭبەككە ۋاقىتشا جارامسىزدىق پاراعىن ونلاين فورماتقا كوشىرۋدى ۇسىندى. «بىردە دوسىم ەمحانادان العان سىرقات پاراعىن جوعالتىپ, قايتا الۋعا باراتىنىن ايتتى. ال ەگەر سول قۇجات ءۇشىن مۇلدە ەمحاناعا بارۋدىڭ قاجەتى بولماسا دەگەنىمدە, بۇل بۇرىننان قالىپتاسقان دۇنيە عوي دەپ جاۋاپ بەردى. ءبىز بۇرىننان قالعان جۇيەنى وزگەرتۋدەن قورىقپاۋىمىز كەرەك. تسيفرلى ءومىر – قاعازباستىلىقتان ارىلۋعا كومەكتەسەدى, قاراپايىم قازاقستاندىقتاردىڭ ءومىرىن جەڭىلدەتەدى», دەدى ءا.قوجاحمەتوۆ. ايتا كەتەيىك, ەمحانادا بەرىلەتىن سىرقات پاراعىن ونلاين جۇيەگە اۋىستىرۋ ۇسىنىسى دەنساۋلىق ساقتاۋ مينيسترلىگى تاراپىنان قولداۋ تاۋىپ, بۇگىندە ونى تەحنيكالىق تۇرعىدا جۇزەگە اسىرۋ بويىنشا جۇمىستار جۇرگىزىلۋدە.
كەزدەسۋگە يندونەزيادا وتكەن ازيا پارا ويىندارىنىڭ جۇزۋدەن 2 دۇركىن جەڭىمپازى ەرجان سالىمگەرەەۆ تە قاتىستى. مەملەكەتتىك كورپوراتسياعا 2018 جىلى جۇمىسقا ورنالاسقان سپورتشى بيىلعى «100 جاڭا ەسىم» جوباسىندا جەڭىمپاز اتانعان. توعىز جاسىندا ترانسفورماتور بۋدكاسىنا توققا ءتۇسىپ, ءبىر اياعى مەن قولىنان ايىرىلعان ول قايسار مىنەزىنىڭ ارقاسىندا قيىندىقتاردى ەڭسەرىپ, سپورتقا ارالاسىپ, تاعدىر تالكەگىنە مويىمادى. «سپورت مەنىڭ ءومىرىمدى تۇبەگەيلى وزگەرتتى. قيىندىقتارعا توتەپ بەرىپ, ماقساتقا جەتۋ – باستى مىندەتىم. وسى جىگەرىممەن مەملەكەتتىك كورپوراتسيانىڭ دامۋىنا دا ءوز ۇلەسىمدى قوسقىم كەلەدى», دەيدى ەرجان سالىمگەرەەۆ.
بۇگىندە, مەملەكەتتىك كورپوراتسيادا مۇمكىندىگى شەكتەۋلى 600-دەن اسا قىزمەتكەر جۇمىس ىستەيدى. «ازاماتتارعا ارنالعان ۇكىمەت» ەلىمىز بويىنشا مۇگەدەكتىگى بار ازاماتتاردى ەڭ كوپ جۇمىسپەن قامتىعان بىردەن-ءبىر مەكەمە. «ولارعا قولداۋ كورسەتىپ, دەنى ساۋ ازاماتتارمەن ءبىر قاتاردا جۇمىس ىستەۋگە مۇمكىندىك بەرۋ – ادامي رەسۋرستاردى باعالايتىنىمىزدىڭ كورىنىسى», دەيدى كورپوراتسياداعىلار.
Town hall فورماتىندا وتكەن شاراعا مەملەكەتتىك كورپوراتسيانىڭ باسقارما مۇشەلەرى, وڭىرلىك فيليال باسشىلارى, استانا فيليالىنىڭ قىزمەتكەرلەرى, جيىنى 500 ادام قاتىستى. باسقوسۋ بارىسىندا كورپوراتيۆتىك مادەنيەت دياگنوستيكاسى جوباسىنىڭ قورىتىندىسى ايتىلىپ, تسيفرلى مادەنيەتتى قالىپتاستىرۋعا نەگىز بولاتىن كورپوراتيۆتى قۇندىلىقتار ايقىندالدى. شارانىڭ ماقساتى – قىزمەتكەرلەردى كومپانيانىڭ كۇندەلىكتى جۇمىسىنا بەلسەندى اتسالىسۋعا ىنتالاندىرۋ, سەرۆيستىك مادەنيەت دەڭگەيىن جوعارىلاتۋعا جۇمىلدىرۋ.
«ەگەمەن-اقپارات»
