پارلامەنت • 26 اقپان، 2019

سەناتورلار قورعانىس ونەركاسىبىنىڭ كاسىپورىندارىندا بولدى

42 رەتكورسەتىلدى

25 اقپاندا پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا باستاعان كوميتەت مۇشەلەرى ەلىمىزدىڭ قورعانىس سالاسىنداعى الدىڭعى ساپتاعى ونەركاسىپتىڭ ءبىرى – بروندى تەحنيكا شىعاراتىن «قازاقستان پاراماۋنت ينجينيرينگ» ماشينا جاساۋ كاسىپورنىندا بولدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

سەناتورلار قازىرگى زامانعى كۇردەلى تەحنيكانىڭ سىرتقى «بروندالعان قاباتىنىڭ» قۇرىلىسىنان باستاپ دايىن ونىمگە دەيىنگى ءوندىرىس بارىسىمەن تانىستى.

سونداي-اق كاسىپورىننىڭ جوعارى تەحنولوگيالىق مۇمكىندىكتەرى، ونىڭ ىشىندە شىعارىلاتىن ءاربىر ماشينانى كەز-كەلگەن تاپسىرىس بەرۋشىنىڭ تالاپتارىنا بەيىمدەي الاتىن كونسترۋكتورلىق بيۋرونىڭ جۇمىسى دا كورسەتىلدى.

2015 جىلعى 20 قاراشادا ەلباسى اشقان زاۋىت مينادان قورعانىسى كۇشەيتىلگەن بروندى دوڭگەلەكتى ماشينا جاساۋدىڭ جاڭا تەحنولوگياسى بويىنشا اسكەر مەن ارناۋلى بولىمشەلەرگە ارنالعان ماشينا شىعارادى. ولاردىڭ استى 10 كگ تروتيل جارىلعىشى مولشەرىندەگى جارىلىسقا شىدايتىن بالليستيكالىق جوعارى قورعانىسقا يە ءارى تاسادان جاسالعان شابۋىلدارعا توتەپ بەرە الادى.

زاۋىت جۇمىسى باستالعاننان بەرى تاپسىرىس بەرۋشىلەرگە ارناپ 4x4 دوڭگەلەكتى بروندالعان «ارلان» جانە «الان» ماشينالارىن شىعارۋ جولعا قويىلدى.  2018 جىلدىڭ سوڭىندا قورعانىس مينيسترلىگىنە ارنالعان «بارىس» 6ح6 دوڭگەلەكتى برونەترانسپورتەرى سىناقتان ءوتتى.

قازىرگى ۋاقىتتا زاۋىت ۇڭعىسى 30 مم بولاتىن وتاندىق «اڭسار» زەڭبىرەگىمەن قوسارلانعان 7،62 ۇڭعىلى قاشىقتان باسقارىلاتىن پۋلەمەت قوندىرىلعان 8x8 دوڭگەلەكتى «بارىس» برونەترانسپورتەرىن سىناقتان وتكىزۋگە كىرىستى.

قازىرگى كەزدە كاسىپورىنداعى جەرگىلىكتى ونىمدەر دەڭگەيى 72 پايىزعا جەتتى، بۇل ىشكى تۇتىنۋشىلارعا باعانى تومەندەتۋگە جانە الەمدىك نارىققا باسەكەلەستەردىڭ ونىمدەرىنەن ساپالى ونىمدەر شىعارۋعا مۇمكىندىك بەرەدى. «قازاقستان پاراماۋنت ينجينيرينگ» مەكەمەسىنىڭ باس ديرەكتورى ەربول ءسالىموۆتىڭ ايتۋىنشا، كومپانيا وتاندىق ساتىپ الۋشىلار قوياتىن تالاپتار ارتا تۇسسە دە ونىمدەر قۇنىن تومەندەتۋمەن قاتار، قازاقستاندى قورعانىس سالاسىنداعى حالىقارالىق نارىعىنا لايىقتى تۇردە پاش ەتۋ ءۇشىن ءوندىرىس پەن تەحنولوگيالىق جەلىنى كەڭەيتىپ وتىر.

سەناتورلار سونداي-اق «قازاقستان اسەلسان ينجينيرينگ» مەكەمەسىندە دە بولدى. بۇل كومپانيا تۇندە جانە كۇندىز كورسەتە الاتىن، جىلۋ شىعاراتىن زاتتاردى كورەتىن، بارلاۋ اسپاپتارى مەن كاسىبي بايلانىس قۇرالدارىن وندىرۋگە جانە ساتۋعا ماماندانعان. ەلىمىزدىڭ قارۋلى كۇشتەرى مەن باسقا دا الەۋەتتى قۇرىلىمدار كاسىپورىننىڭ نەگىزگى تاپسىرىس بەرۋشىلەرى جانە كومپانيا ءونىمى قۇرامىنىڭ 58 پايىزى قازاقستاندىق بولىپ تابىلادى. 2017 جىلى تۇركيا مەن وزبەكستانعا ەكسپورتتىق كەلىسىم جاسالدى. ەندى تمد ەلدەرى مەن شەتەلگە دە ءونىم شىعارۋ جوسپارلانىپ وتىر.

حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەلەرى سولتۇستىك قازاقستان، ماڭعىستاۋ، شىعىس قازاقستان وبلىستارىنداعى قورعانىس سالاسىنىڭ كاسىپورىندارىندا بولىپ، ولاردىڭ الەۋەتى مەن وزەكتى ماسەلەلەرىمەن تانىسىپ قايتقان بولاتىن.

شارا پارلامەنت قابىلدانعان «قورعانىس ونەركاسىبى جانە مەملەكەتتىك قورعانىستىق تاپسىرىس تۋرالى» زاڭ مەن زاڭناماعا قورعانىس جانە اەروعارىش ونەركاسىبى، اقپاراتتاندىرۋ سالاسىنداعى اقپاراتتىق قاۋىپسىزدىك ماسەلەلەرى بويىنشا تۇزەتۋلەر اياسىندا بولدى. بۇل قۇجاتتار مەملەكەتتىڭ قورعانىس تاپسىرىسىن قالىپتاستىرۋ، ورنالاستىرۋ جانە ورىنداۋ ۇدەرىسىنىڭ تيىمدىلىگىن ارتتىرۋعا، سونداي-اق ەلىمىزدىڭ قورعانىس ونەركاسىبىنىڭ الەۋەتىن دامىتۋعا باعىتتالعان.

سوڭعى جاڭالىقتار

ۇقساس جاڭالىقتار